الحمد لله اولا ً و آخراً حيث أنعم علينا بنعم عظيمة لا تعد و لا تحصى فالولادة عملية معقدة تكفل بتسهيلها رب العالمين فلا يوجد امرأة ظلت حاملا ً للأبد ..
لا بد يوم و يأتي الفرج حيث تمتزج مشاعر متعددة في تلك اللحظة .. خوف و ترقب .. فرح و تفاؤل و ألم لا بد منه ..
ثم يبدأ سيناريو مختلف لكل قصة ولادة ,,
بعد ما تفلسفت عليكم بالفصحى الحين بعطيكم اياها بالعامي ..:42:
هذا الطفل الثالث ما شاء الله .. و الحمل هذا فيه اختلافات عن اللي قبل لإختلاف الظروف .. من السابع كان معي طلق و كانت الدكتورة باستمرار تحذرني من الولادة المبكرة و مرة صرفت لي حبوب تهدئة الطلق بس الحمد لله اني ما أخذتها و حاولت اخفف من شغل البيت و ألزم الراحة قدر الإمكان .. و الحمد لله مشت الأمور ..
طبعا ً توقعت اني مجرد ما أدخل التاسع بأولد بس اللي حصل ان الطلق شبه اختفى حتى اني كنت أحس الراس تحت و لمن صرت في التاسع ارتفع ..
كنت خايفة اولد وبناتي يدرسون بس عطلوا و الولادة لا حس و لا خبر !
خلاص و قتها بدأ الإحباط يلعب فيني خصوصا ً اني في بناتي أكلت من العاشر اسبوع و اسبوعين و لا تجي الولادة الا بتحريض و مرة أخذت طلق صناعي !
رفعت ايديني لربي و دعيت بكل يقين ان الله يفرجها علي و اخواتي المسلمات .. و ألحيت بالدعاء و ربي ما يخيب الرجا سبحانه ,,
مشيت و شربت حليب بالقرفة و حلتيت و صرت اجلس في البانيو الدافي جدا .. بس ما فيه بوادر !
لمن بقى ثلاث أيام و أقفل التاسع و أخش في العاشر طلعنا ليلتها للسوق أنا و زوجي و بناتي و كنا من زمان ما طلعنا مع بعض زوجي كل الفترة اللي راحت ماله خلقنا و مشغول و كان كثر خيره اذا ودانا السوق و رجع ياخذنا ,, عشان كذا ما قدرت امشي كثير ,,
بس ذيك الليلة مشيت لا بأس و أكلت سينابون مع اني ما كنت مشتهيته لكن قلت يالله قرفة يمكن تفيد ..
المهم .. جينا البيت و تعشيت خفيف .. بس بعد ماصليت الفجر حسيت ما فيني نوم رحت اشرب موية و جلست في الصالة و حسيت بمغصة خفيفة ..
شوي و رجع الألم ثانية و ثالثة و أقول اكيد خرابيط خل أروح انام و يختفي كل شي ..
رحت نمت خمس دقايق و احس بمغصات قصيرة وخفيفة ما يمدي احس فيها الا تروح ..
و احاول أنام ما قدرت .. و بدأ القلق يساورني :)
لمن جت الساعة 8 جتني مغصة قوية قمت من طولي دخلت الحمام لقيت مسحة دم و انتو بكرامة .. عرفت وقتها انو الدعوى جد .. رحت جبت لي تمر و لهوم حق الطلق معطيتني اياه خالتي ( طبيبة شعبية ) بس قالت لي ما تاخذيه غير لمن يبدأ الطلق ..و جربته في بنتي اللي قبل و ماشاء الله سهل علي الولادة و قصر مدة الطلق ..
اخذت من اللهوم ملعقة مع موية و اكلت كم حبة تمر و رحت أجهز اغراض بناتي و اغراضي و ادخل الملابس بالشنط و كل شوي المغص يزيد و حاولت احسب المدة بينهم كانت غير منتظمة مرات 4 دقايق بينهم و مرات 8 دقايق على الساعة عشرة صحت بنتي و صارت تسألني وش فيك يا ماما و أنا اقولها تعبانة شوي ,,
و الساعة 11 صحى زوجي و سألني وش فيك قلت له افطر بسرعة شكلي ما بطول ,,
ضحك قال لي من جدك ؟؟ انتي لازم تاخذي العاشر .. قلت لا يا قلبي أنا دعيت ربي و ربي ما يخيبني ,, و الأخ مو مصدق ,, يشوفني أتألم و مستغرب !
شوي صدق و بدأ يحسب لي الطلقات ,,
دخلت الحمام على اذان الظهر و نزلت السدادة المخاطية .. توضيت و قلت بأصلي حتى لو كان مالي صلاة اخاف بدري على الولادة .. لإن ببنتي نزلت السدادة الساعة 7 صباحا وما ولدت الا الساعة اربع العصر ..
كنت محتاااارة أروح للمستشفى و لا بدري .. المغصة قوية بس قصيرة و مو منتظمة مرة .. قلت خل أحاول آخذ راحتي قبل أطلع المستشفى و تمددت على السرير و صرت بين الطلقة و الطلقة أغيب عن الدنيا و أصحى على الألم ما حسيت الا ذيك المغصة و طق فتحت الموية و اقوم منفجعة واطير للحمام على بالي بتصب الحنفية زي ما قالوا البنات .. بس كانت قليلة قد فنجان تقريبا ُ بس اللي خوفني انها مو صافية و فيها نقط خضراء؟!
و حسب معلوماتي ان هذي علامة مش كويسة لإن معناتها ان البيبي يكون متبرز جوا و لازم يطلع فورا ً ..
انخررررشت و صرت اخبص مدري و ش اسوي يالله بسرعة بطلع للمستشفى مدري و ين الشبشب و ين عبايتي حالتي حالة ..
عقب ما كنت قمة الهدووء صرت قمة الهبال و ابكي ..
كويس اني تذكرت وحطيت ألويز و لا كان عفست الدنيا ..
ودعت بناتي و انا اخربط بالكلام ابسوي نفسي عاادي بس مبين علي و طلعنا ..
و ركبت بالسيارة ورى تحسبا ً لأي طارئ :)
كانت الساعة 2 الا عشر الظهر ..
و طيران على المستشفى و مع كل مغصة تصب الموية و انا ارتجف و ادعي ربي ..
تقريبا ً المشوار 13 دقيقة جاني طلق يمكن 8 مرات ..
خلاص وصلت ركبت عربية ما قدرت امشي عشان الموية اللي تخرخر ..
المستشفى استقبالهم بارد نوعا ً ما .. أقول للنيرس انا مو أول بيبي و اللي فيني ولادة الحين يالله وديني قسم الولادة قالت لا لازم بابا يخلص أوراق قام نفخ فيها زوجي و مير تدفني من غير نفس و وقفت تسولف مع خويتها شوي بعدين كملت فيني الطريق .. عاد أنا قمت أتكلم معها شوي أبيها تعبرني طبعا ُ بالإنجلش عشان يحترموني .. بس أنواع التخبيص وقتها ..
اخيرا ًوصلت القسم جت توزني و اقولها موية تصب مقدر أوقف و هي طناش .. قلت بالطقاق خل أحوسهم ..
دخلت غرفة الولادة و لبست لبس المستشفى وأقول للمرضة الموية مو نظيفة يعني البيبي في خطر تقول لي ما اعرف انا .. انتظري تجي الدكتورة ؟
عشر دقايق لين جات القابلة و قامت تسألني متى فكت الموية و قاستني قالت 6 سم .. الحمد لله ..
قلت بسرعة عطوني أبرة تخفيف الألم مو اذا قربت أولد تعطوني اياها ..قالت استني يجي ملفك من الدكتورة !
قهروني بهالسالفة الألم لاعب فيني و الطلق أكلني ..
طيب و ين الدكتورة قالوا بغرفة العمليات شوي و تخلص ..
انتظرت تقريبا ً 40 دقيقة جات الدكتورة و قاستني بيدها اللي كبر راسها بعدين عطوني الإبرة .. قالت 6 ونص !
قلت لزوجي شكلي مطوولة روح تغدى و ارجع لي العصر ..
طلع من عندي و ركب السيارة و تذكر شغلة و جاء يعطيني اياها و لقاني ..........:icon28:
يوم طلع من عندي شرفت الدكتورة العربجية ما شاء الله عن 10 رجال قالت اسحبوا البول بالقسطرة ..أنا رفضت لإني ما أحب القسطرة تعوووور و تسبب سلس بول عقب ..( وهذا اللي صار لي )
بس ما عبرتني و لا عطتني وجه .. جت الممرضة و انا أقول لا لا قالت لازم لازم .. قلت خلوني أروح الحمام و أنا أهرج على روحي الا هي مدخلتها و مخلصة .. و أنا اتعور و أهاوش و لحد لمي !
جت الدكتورة و رفعت رجولي على الحديد يعني وضع ولادة أنا استغربت توني 6 سم شلون بتولدني ذي .. قامت دخلت يدها لين حلقي و أنا صرخت من قلب قلبي .. قلت حرام عليك أنا لسا قالت مافيه وقت حبيبتي تبغين البيبي يموت هو متبرز جوا لازم يطلع الحين .. و أنا عاد أستسلم !
و تدخل يدها مرتين وثلاث كل ما طلعت يدها أحسب الولد طلع من شدة الألم!
خلاص بغيت أمووووت و تقولي يالله ادفعي يا ماما ..وين أدفع ما فيني طلق ..
على جية زوجي و أنا أدعي ربي و اصرخ صراخ مكتوووم لإن الدكتورة لو طلعت صوت على طول تهاوشني لا لا ادفعي بدل ما تصرخين .. بس اسلوبها عفش مررررررة !!
و ادفع ادفع من غير طلق و هي تدخل يدها و انا آآآه خلاص الألم وصل القمة .. يارررب يااارب لا تحرمنا الأجر و عظم أجر اميماتنا يارب العالمين ..
شوي جاتني مغصة قوووية و دفعت طلعت يدها وولدي مع بعض و الحمد لله طلع للدنيا بسلام ..
و بعدين خيطتني لإنها سوت لي توسيع بس ما اذكر متى لإن الألم فوق مستوى التركيز بهالشي ..
جلست ساعة كاملة تخيط مدري ليه ؟؟
و الف الحمد لله على سلامتي و سلامة ولدي ..
------------------------------
المستشفى : الحمادي
الدكتورة : إكرام
----------------------
المميزات : مستشفى خبرة مريح نفسيا ً لإني ولدت فيه من قبل و الغرفة واسعة و مريحة - الدكتورة جريئة و ما عندها وقت ممكن لو تأخرت و انتظرت الرحم ينفتح كان البيبي تأثر بالموية لإنه متبرز فيها ..
السلبيات : المستشفى زحمة و الممرضات مشغولات الى حد ٍ ما و كل شي بطيء خصوصا ً اذا طلبت يجيبون ولدي أو ياخذونه الحضانة ..
الأكل أقل من عادي يالله لك الحمد ..
الدكتورة جلفة و عربجية ما تعطي وجه و لا فيها ذرة حنان و يدها كبر راسها خلتني أحس بألم ولادة ولدي وولادة يدها حسبي الله على بليسها ..
يعني ممكن لو صبرت لين يجيني طلق يطلع البيبي بشكل طبيعي مو بيدها جابت كل شي .. و كانت تخوفني أكثر من تشجعني ..
سألت الممرضة عقب قلت لها كيف انا كنت 6 سم والدكتورة ولدتني ؟؟ .. طبعا ً سألت الممرضة لإن الدكتورة ما عطتني وجه :09: .. قالت لمن فرغنا المثانة انفتح الرحم ؟؟ أنا مدري حسيتها تصريفة ..
لكن .. الف الحمد لله اولا ُ و آخرا ً ..
دعواتكم ان الله يقومني بالعافية و تتحسن نفسيتي لإني مرررة منعفسة من الإكتئاب اللي بالنفاس .. و ان الله يهدي و لدي و يخفف عنه المغص ..و يسخر لي زوجي و يهديييييه ..
الأخت الصغرى @alakht_alsghr_1
عضوة فعالة
يلزم عليك تسجيل الدخول أولًا لكتابة تعليق.
الحمد لله على سلامتك ومبروك ما جبتي ......
بس نقدر نعرف مكونات اللهوم وإلا سر المهنة :)
بس نقدر نعرف مكونات اللهوم وإلا سر المهنة :)
الصفحة الأخيرة
وسلامة البيبي ,,,,,,,,,,,,,,,,,,,,,,
ويااااااارب تطلعين من النفاااااااااااس على خير واحلا عروس