On Air @on_air

عضوة نشيطة

تجربتي لبخور يعالج آلالام الظهر

بسم الله الرحمن الرحيم

قد يكون هذا هو موضوعي الأول في القسم ..
لكني كنت مداومه على دخوله ، واستفدت منه كثيرا
ومشاركتي معكم لعرض تجربتي مع موضوع الأخت * MOoON *

مشكلة الاااامك الغييييييييييير طبيعية استفيدي وادعيلي

لعل الله ان يجعل فيه الفائده كما استفدت منه .

:
:

في البداية بقولكم وش الي كنت أعاني منه بالضبط ..
ألم شديـــــــد أسفل الظهر إلى درجة أني اتلوى من الألم ،
تعب في كامل الجسم بدون ماأبذل مجهود ،
صداع في أوقات متفرقه ، ألم في الركبتين والساق

ولأني مابقا علاج مااستخدمته لألم الظهر ولافاد
وكنت مااستغني عن لزقات الظهر أبد ، لازم كل بعد فترة احط منها
صرت ادور على أي علاج ثاني غير الادوية ، لين الله دلني على موضوع الاخت * MOoON *
وأصريت اني اجربه بعد ماقريت الفوائد الي فيه.

المهم إني تشجعت وإشتريت الأغراض لعمل البخور
ولقيتها بسهوله عند محل عطارة كبير ،
يعني لاتدورونه في المحلات الصغيره لانهم مايجيبون كل الاعشاب،
وتوكلت على الله وبديت

أحضرت المواد وطحنتها بنفسي في البيت
كانت أصعب مرحلة هي الطحن
أخذ 4ساعات تقريبا
طبعا عانيت كثيرا أثناء التحضير وشعرت بضيق فضييييييييع
كنت بهون أكثر من مرة بس كنت اتعوذ من الشيطان
واجبرت نفسي اني اكمل ومااخلي احد يجهزها بدالي .

وهذي ملاحظاتي ونصايحي للي بيجربها :

1/ كانت مطحنتي صغيره عشان كذا اخذ كل هالوقت ،
وبعض الاعشاب كان لازم اكسرها او ادقها بالهاون أو أقصها بالمقص بعدين اطحنها
فالأفضل تطلبين من العطار يطحنها لك أمامك وإذا ماعنده مطحنه الشكوى لله الأفضل انتي تسوينه

2/ كنت طول فتره التجهيز اقرأ آية الكرسي والمعوذات وأنفث على الخلطه
وأحاول اكثر من الإستغفار والدعاء أن يجعل الله في هذا البخور علاجاً لي بإذنه

3/ الميعة السائله الأفضل تحطين علبتها في ماء حار لانها جامده
وماراح تقدرين تطلعينها من العلبه الا اذا ذابت ،
ويفضل قبل لاتبدين بالطحن تحطين العلبه في صحن عميق
وتصبين عليها الماء الحار وتغيرينه كل مابرد

4/ نقصت علي السوائل فزدت الماء وأتوقع ماراح يفرق لانه بيتبخر في الأخير

5/ شكل العجينه تكون متماسكه جدا ماتكون سائله ولا متناثره .

6/ لما جيت أكورها خليتها كور كبيره يعني بحجم الليمون الأخضرالصغير
وأتوقع كذا أفضل عشان أطول وأنا أتبخر

7/ كانت للخلطه ريحه فضيعه اول ماطحنتها وخلطتها ،
ريحه شينه مررررة وكنت شايله هم لاتكون ريحتها كذا لمااتبخر ،
بس الحمد الله ان ريحة البخور كانت عاديه كأنها ريحة ( جاوي ) تقريبا
وماهي خانقه أبد لاني انا فيني ضيق تنفس والحمد الله ماتأثرت أبد ،
وكنت خايفه انها تسوي ريحة كريهه بالبيت لاني ماابي احد يعرف بهالموضوع لين اخلص
لكن الكل توقع انه بخور من الدرجه الثالثه وماحسوا بشي

8 / خليتها لمدة خمس ايام فوق الثلاجة لين مانشفت تمام وبعدين حطيتها بعلبة قزاز كبيرة

9/ لما كنت أتبخر كنت أحطه في مبخرة صغيره عشان اقدر اتحكم فيها ،
كنت البس بجامه واحط المبخرة ورا ظهري لمدة لاتقل عن ثلاث دقائق ،
أحس بشوية حرارة بس استحملها ، بعدين احطها على بطني ،
وأمشي المبخر على يدي ورجلي وراسي يعني كل جسمي تقريبا ،
وبعدها ابخر البيت كله ، وكنت اتبخر مرتين زي ماذكرت الاخت
مرة بعد صلاة الفجر ومرة قبل صلاة المغرب بساعه وداومت عليها لمدة شهر كامل .

بدأت بالبخور تاريخ 3/1/2007 في وقت كانت الآلام قويه علي ،
ومن بعد الله ثم هالبخور انا الحين في حال ثاني ياربي لك الحمد
الألم كله رااااح مااحس بشي بظهري ابد ، كنت مااقوى اجلس من الوجع ،
والحين غير يالله لك الحمد
والله شي غريب ماكنت اتخيل ان البخور ممكن يكون علاج و الحمد الله الي يسره لي

ملاحظة:
إستخدمت في هذه الفترة ولأيام متفرقه ( الحلبه ) ،
وأتوقع ان لها تأثير مساعد ومعروفه لشد الظهر
والآن مداومه عليها في اول ثلاث ايام الدورة
والي تقول ريحتها وريحتها والله لو ريحتها وش ماتكون
المهم الصحة والعافيه واني ارتاح عقب العذاب الاول
وصدقوني الي نظيفه وتتروش يوميا ماتطلع لها ريحه ابد
وانا مجربتها ،جربتها منقوعه بحليب ومطحونه وحب ،
ولقيت اريح شي وافضل شي المطحونه بمقدار نص الملعقه الصغيره ،
واذا انتي موظفه خذيها بعد ماتجين من الدوام وتروشي قبل لاتروحين
والله ماتطلع لك ريحة ابد ، الي تطلع ريحتهم هم الي يقعدون باليومين مايتروشون.

:
:

وفي الاخير مااقول الا الله يرزقك يا * MOoON * ووالديك الجنه
أسأل الله العظيم رب العرش العظيم ان يجزيك خير الجزاء
وان ييسر امورك ويوسع عليك في الدنيا والآخر
وأن يفرج همك ويجعل لك من كل ضيق مخرجا
وأن يجعلك من اهل الخير الدالين عليه
وأن يثيبك عليه خير الثواب
ويسخر لك الخير كله ويحفظك من كل الشرور
وجزاك الله خيرا

:
:

والي حابه تستفسر عن اي شي انا حاضره
ودعواتكم لي

يلزم عليك تسجيل الدخول أولًا لكتابة تعليق.

تسجيل دخول

الأمل بالله كبير • 17 سنة

ماشالله والله خبر يفرح
جزاك الله كل خير يارب
والله يعطيك الصحه والعافيه ولايحرمك منها يارب العالمين
والله يجزي اختنا موون كل خير ويوفقها ويسعدها
ويوفقك اختي ويسعدك دنيا وآخره

On Air • 17 سنة

جزاك الله خير اختي الأمل على كلامك

ومشكورة على حضورك

اناسيم • 17 سنة

اختي الله يتمم عليك ياليت تحطين الرابط للموضوع ابغي الطريقة

"جيتـــــارا • 17 سنة

On Air • 17 سنة

حبيبتي اناسيم الرابط موجود في اول الموضوع

وهذاهو مرة ثانيه عشانك

http://forum.hawaaworld.com/showthread.php?t=708312