تجربتي مع احلام ابو شوك ومستشفى السعودي البريطاني

السلام عليكم ورحمة الله وبركاته
ماعليش بنات اذا لقيتوا اي خطا أنا داخله بالايباد ويكتب على كيفه
المهم اول ماحملت نصحوني اخواتي اروح الدكتوره احلام ابو شوك بمستشفى اسرة المجد الطبي في البديعه
اول الأشهر ماكنت مرتاحه معها كثير كانت طول الوقت مكشره
على العموم مرت فترة حملي على خير معاها لما دخلت التاسع اتفقت معاها تولدني بالسعودي البريطاني طبعا سعر الولاده 7700 جناح الاميره ومع الخياطه التجميليه زيادة 500 ريال يعني التوتل 8200
بس الغريب لما جيتها ومعاي الالم طلق وسوت لي تخطيط الطلق خذت حقه اعتقد المفروض يكون تبع البكج اقلها مرات معدوده واذا استهلكتها ادفع حقها مثلا مرتين وبعدين الثالثة ادفع حقها على العموم حقها 150 عندها مع ان كلها جهاز وشغلوه مادري على وشو 150
سوت لي تحريض بنفس الوقت وقالت لي روحي للبيت والرحم فاتح 1سم ولسى بدري عليك كان لي 39 اسبوع
وقالت لي عشانك بعيده اذا حسيتي بشي روحي اي مستشفى خاص ثاني يعني دافعه لها وبروح ادفع بمستشفيات ثانيه مادري على ايش ادفع حق البكج اجل طبعا متابعة الحمل ب 1700 ريال
صرت اروح لدكتوره ثانيه غير الدكتوره احلام على شان الكشف وخاتم ياصرف
المهم بعد يومين نزلت علي موية الراس وكانت واصله للارض دقيت عليها وقلت لها قالت روحي مستشفى واكشفي شوفي وش تقول طبعا الساعه 9 ونص بالليل مافيه دكتوره بتستقبلني هالوقت المهم رحت وقالت لي اللي على الكاونتر عندها زحمه وينتهي دوامها خلاص
رجعت دقيت على الدكتوره احلام وقلت لها قالت اجل مالك الا تروحين للسعودي البريطاني الحين وتدخلين إسعاف بس يكون بعلمك يمكن ينومونك يوم يومين يمكن اسبوع كل هذا بتدفعين حقه خارج لفلوس اللي عطيتيني ويمكن يعطونك طلق صناعي ولازم يعطونك مضاد عشان الموسع نزلت منك وكله محسوب عليك قلت لها صعبه ادفع لك 8000 وادفع للمستشفى شغلات ثانيه تعالي وسويلي تحريض والا. طلق صناعي وخلاص خليني اولد مابي أطول والمويه تنزل مني قالت ماقدر أجي أنا الحين اصلا في السعودي البريطاني ازور وحده ولدتها الفجر انتي اذا حسيني بشي دقي علي قلت لها لو رائحه للبريطاني على طول ماراح يكلفني كل هذا زعلت وقامت تهاوش مع اني ماقلت شي غلط
المهم رحت للبريطاني وطلعوني تنويم وأعطتني ابرة المضاد وركبوا لي الغذايه سألوني بتولدين عندنا والا مع دكتورتك قلت لا مع دكتورتي قالت اجل دقي عليها كلميها دقيت عليها قلت السالفه كذا وكذا واني أخذت المضاد والحين طلعوني فوق قالت إيه طيب بس أنا ماراح أجي وفلوسك ارسلي زوجك يجي يأخذها بكره الصباح
تخيلوا الموقف معاي طلق وهم الولالده وتقول لي باخر لحظه أنا ماراح أجي أنغبنت وانقهرت جلست أصيح من القهر وزوجي يهديني والممرضه ياعمري تحسب خائفه من الولاده مادرت اني مغبونه من حركتها مره بس بصراحه دعيت عليها وقت ولادتي من القهر
بالأخير المضاد ماحاسبوني عليه وا المسكن اللي اعطوني اياه وقت الولاده ولا أخذوا حق الخياطه التجميليه بس حاسبت حق الولاده بجناح الاميره واخذت يومين زياده للاستقبال وحق اللابره اللي أعطوها للطفل بعد ماسالوني طبعا ووافقت عليها
يعني لو جايتني احلام كان دفعت لها ودفعت للمستشفى زياده وبتكلفني اكثر
وللعلم لعوزوني على مأخذا الشيك منهم حق ولادتي جلست فوق الاسبوع رايح زوجي جاي من عندهم