تجربتي مع اطفال الانابيب في مستشفى فرح في الاردن

السلام عليكم ...

كيف حالكن يا خواتي ؟
اكتب موضوعي و انا في الاردن و لم اعد بعد الى بلدي

اهلي عندهم بيت صيفيه في الاردن و كل صيف يهربوا من حر السعوديه و يجون هنا .. المهم الشهر الماضي لما جتني الدورة كلمتني امي و قالت لي ما دام عليكي الدورة ايش رايك تيجين هنا .. قلت لها طيب فكره .. و قلت لها الصراحه ما عندنا فلوس دحين .. قالت لي ابوكي يدينكم ... توكلت على الله و حجزت و سبحان الله تيسرت الحجوزات و ما توقعت الاقي حجز ابدا ..

و سافرت و بديت آخذ منشطات و تحاليل دم و ابر مدري كم ابره اخذت...... و الماده يلي كانوا يحطوها في الابره كانت تحرق و اصرخ وقت ما آخذها بس قلت هذا كله يهون عشان الضنا .
و تعبت كثييير من الادويه ... الحمد لله على كل حال ..
و سبحان الله كل شي كان ميسر و مريح .. و الصراحه المستشفى ممتازه و مريحه و الممرضات حبوبات .. و الدكتور زيد رجل رائع و فيه دكتور ثاني تدخلون عنده الاول و بعدين زيد يشوفك .. و انا دخلت عند الدكتور محمد درويش و ما شاء الله عليه شخص رائع ... ..

و جااااا وقت التبويض ... و كلمت زوجي و سبحان الله لقى حجز في نفس اليوم ... و جا وقت سحب البويضات و اخذ العينه ... و كل شي تمام .. و انا طلبت بنج موضعي وقت السحب ..فيه الم اثناء السحب بس محتمل هذا بالنسبة لي ما احب البنج الكامل فيه ناس تفضله و كل واحد على راحته ..
قالوا لي البويضات كويسه و الحيوانات المنويه كويسه و كلمونا بكره و نعطيكم نتيجة التلقيح..

كان كل شي ميسر و الامور تمام و متفائله و حسيت انها راح تنجح .. حتى قلت باني راح اقعد هنا عند اهلي الى موعد النتيجه و اذا صار حمل راح ارمضن عندهم ...

كل شي كان تمام و النفسيه عال العال و كلمتهم .. قالوا لي بويضه واحده تلقحت ... سالتهم كيف قوتها كويسه .. قالوا لي اي كويسه مره و انقسمت و صارت جنين و راح نرجعه فيكي . انبسطت كثييير و تفاءلت و حسيت بمشاعر امومه اتجاه هذا الجنين و كنت مره متحمسه انهم يغرسوه فيني و ابدئي بالمثبتات .. و قلت لماما مبروووك صار عندك حفيد واحد حتى الآن و ان شاء الله راح يزدادوا .. و بشرنا اهله و انبسطوا و عشت لحظات حلوه و انا قلبي مع هذاك الجنين . و قالت لي البويضات الباقيه احتمال كبيييير انها تتلقح .. كلمينا بكره ..
جاا بكره و كلمتهم و قالت لي البويضات الثانيه ما تلقحوا .. قلت لها يعني راح ترجعون لي جنين واحد .. قالت لي البويضه هذيك تلقحت بس ما انقسمت ..... قلت لها كييف يعني و انتوا امس قلتولي انها انقسمت و صارت جنين !!!!!!! ما ردت علي ...

انا هنا تحطمت و نلاشت آمالي كلها .. و بكيت من قلب ...... قالت لي كلمينا بكره احتمال ينقسم الجنين ..
كلمتهم و انا شايله الامل من بالي .... قالت لي كلميني بكره مره ثانيه راح نعطيه آخر فرصه .. سالتها عادة كم يوم تعطون البويضه فرصه قالت ثلاث ايام و اذا ما انقسمت خلاااص نرميها .. و للاسف فشلت عملية التلقيح و لم تتلقح و لا بويضه و لم ينقسم هذا الجنين..

طبعا بكيت و حمدت ربي على كل شئ .... و فقدت الامل .. قلت من البدايه ما نجحت !!!!!!!!!!!!!!!
يعني على الاقل اذا نجح التلقيح بس فشل التثبيت بعيدها مره و اثنين و ثلاثه .. بس ما صار تلقيح من الاصل و البويضه يلي تلقحت ما انقسمت !!!!!!!!!!!!!! سالتها البويضات كويسه قالت لي اي .. الحيوانات المنويه كويسه قالت اي .. طيب ليش ما صار تلقيح .. قالت الله اعلم ...

انا لحد الآن يا خواتي مو قادره استوعب ... حاسه نفسي في كابوس و نفسي اقووم منه ....
ما تلقحت و لا بويضه ... :(

و انا الحمد لله طووول الفتره هذي كنت حاطه املي برب العالمين وحده لاني عارفه انه اطفال الانابيب مجرد اسباب و الرزق بيد الله وحده لا شريك له ..

و طووول الوقت كنت ادعي و اقرأ اذكار الصباح و المساء ..

و انا مرت اخوي ما شاء الله تبارك الله على وشك ولاده ... كيف راح اروح بلدي و ازورها في المستشفى و انا عمليتي من البدايه فشلت ... مو عارفه ايش اسوي و الله تعبت .... يعني اول كنت اقول راح اعمل انابيب .. بس الآن التلقيح ما نجح ايش الفائده من اني اعملها ايش يلي راح يتغير الوبيضه هي نفسها بويضتي و الحيوان المنوي هو نفسه ..

نفسي اصحى من هذا الكابوس ...
معناها و الله اعلم كان يصير تلقيح داخل جسمي بس انقسام لا ..

هذي هي قصتي يلي فشلت من البدايه ..

بس الصراحه المستشفى رائعه و الطاقم اروع .. و حتى ايام المنشطات ما كان يعطوني منشطات و يخلوني لا كانوا يراقبون هرمونات التبويض و يفحصوها اول باول عشان اذا صار اي خلل في هرمون معين ينادوكي و يعطونك ابره تنظم الامور مثل ما صار معاي ... تكلفة العمليه تقريبا 12 الف ريال سعودي مع التحاليل و هم راح يرجعون لي فلوس الترجيع لانه ما صار و لله الحمد ..

و انا بعد شوي راح اروح عند الدكتور زيد الكيلاني عشان يشرح لنا ايش نسوي و ايش الحل ..

الحمد لله على هذه الحال و على كل حال ..
:(

ادعولي خواتي انه ربي يعوضني خير و يفرج عني همي ..

و ممكن سؤال مين صار معاها كذا و لما عملتها مره ثانيه صار التلقيح ؟؟؟؟ و لا في كل مره مستحيل يصير التلقيح ؟؟