تجربتي مع الأنابيب وارجاع الأجنة

السلام عليكم ورحمة الله. الحمد لله من قبل ومن بعد . ادخل لكم بتجربتي على طول ،الحمد لله انا سليمة وزوجي عنده شوي مشاكل لكن عادي ننجب وقالوا لي افضل شي لك الأنابيب .. المهم ياطويلات العمر احكي لكم تجربتي من البداية لأجل اللي بتستفيد ،عمري باخر الثلاثينات ، و سبق سويت طفل أنابيب مرتين ونجح لكن تتوفى الأجنة ببطني بالاشهر الأخيرة وكان الجنين سليم وسبب الوفاة مجهول .. الله يجعلم شافعين لي .. هالمرة قلت يلله نجمع فلوس لأجل نسوي العملية من جديد والحمد لله جمعنا الفلوس وبدينا العلاج .. بالبداية طبعا لازم يسوون لك تحاليل انت وزوجك ، وانا لي كم شهر اخذ فوليك اسيد وفيتامينات ، وزوجي ياخذ فيتامينات . .. ، . تاريخ ..١٤/٩/٢٠٢٢ نزلت علي الدورة .. بعدها بيومين سويت الاشعه وقالوا لي الحمد لله كلش زين يلله خل نبدا كورس التنشيط ، توكلت على الله وقلت يلله وانا مبسوطة ..انا بسجل لكم التواريخ واللي دفعت عشان تستفيدون ( .٥٠٠ + ٧٥٣ المنشط) بيومها كامل اللي دفعته للصيدلية حسب احتياجاتي ١٩٠٠ ريال .. اول موعدالكشفية دفعت عليها ٣٠٠ ريال والأشعه دفعت ٢٧٥ .. ضرب الابراللي شريتهم لمدة اربعة ايام ضرب الابرة باليوم الواحد ٢٧ ريال . .. رحت للموعد بعد ماخلصت الادوية يعني بعد اربع ايام وقالوا لي لسه تحتاجين زيادة تنشيط وابر مثبته قلت اوك تمام دفعت ٩٠٠ وشوي اذوية جديدة(١٤٣ قيمة الابرة المنشطة الواحدة وانا اخذت ثلاثة والابر المثبته ب٤٢٩ ريال) وخلصت الكورس الثاني ورجعت لهم وثم قال يلله الحين زيادة جرعة وابرة تفجيرية ومثبته طبعا بأيام مختلفة ) للأمانه نسيت كم دفعت يومها ، المهم وارجع بعدها وسويت سونار طبعا الأشعه مرة تكون مراجعه ما ادفع .. وجا وقت العملية دفعت كامل الحساب ١٥٢٤٠ ريال .. ، وسويت العملية وطلع سبع بويضات زينه ، وزوجي اخذ العينه . وكلموني ثاني يوم قالوا لي تلقح ٥ اجنه قلت الحمد لله ،،،، المهم اليوم الترجيع الظهر وكلموني الصباح وقالوا لي للأسف ولا جنين صالح كلهم مايصلحون … كنت متجهزة الحين اروح ارجع الأجنه ، مفروض الحين انا هناك ارجع ولكن يارب لك الحمد العوض الجميل من الله سبحانه ، الحمد لله حمدا كثيرا طيبا مباركا فيه …. كلمتهم قلت وش السبب ماكملت قالوا لازم اروح اشوف … عاد بروح الحين واشوف ان شاءالله .. المهم انه مو كل مرة لازم تضبط الأنابيب ، انا مرتين ضبطت وهالمرة ماضبطت ، المرة اللي قبل كان ١٣ بويضة وتلقح اجنه كثير ، وهالمرة ولا جنين ضبط ، فاللي وده تستوعبونه انه ممكن هالشهر يكون انتاجك انت وزوجك مو زين ولكن الشهر اللي بعده يكون ممتاز ، يعني اللي تفشل مرة لا تعتقد انه الفشل دايم ، لا هو سبحان الله كل شهر يختلف ترى ،، باذن الله ابشركم بعد فترة بحملي وتبشروني ،، وابشركم بولاده لجنين تام متعافي يارب