تجربتي مع التكيسات وارتفاع هرمون Fsh

السلام عليكم ورحمة الله
الموضوع رد على ارتفاع هرمون Fsh
وعدت أكتب تجربتي للفائدة وجتني رسائل على الخاص يطلبون اذكر تجربتي
والمعذرة تأخرت بكتابة الموضوع
ولا قدرت ارد بالخاص لأن عدد مشاركاتي قليلة
نبدأ بسم الله:
بعد ولادتي الأولى استخدمت مانع لمدة سنتين وتركته
وكل شهر انتظر الحمل وتنزل الدورة
وحتى نزولها مب مثل قبل متقطعه وخرابيط مررره
يومين تنزل الثالث توقف الرابع اشوف شي بسيط وخلاص
الدكتورة قالت انتظري الى 6 شهور طبيعي التأخير وتمضي الشهور وعلى نفس الحال
المهم بديت رحلة الفحوصات والتحاليل
حللت الهرمونات طلع شي مرتفع وشي منخفض يعني الهرمونات متلخبطه😔
جاني احباط كيف وش العلاج
قالت الدكتورة اصبري بنشوف التبويض تعالي بعد الدورة بأسبوعين وأروح قالت عندك تكيسات كثيرة ومافيه بويضات ابد مافيه إلا حويصلات
ولا بويضة ناضجة😰
قالت عشان يصير حمل لازم يكون حجم البويضة على الأقل 16
قلت وانا كم الحين؟
قالت ماوصل حجمها حتى 4
لازم تبدين بكورس تنشيط وتحتاجين إبر
كتبت لي الابر وقالت تعالي الشهر الجاي
طلعت منها والدنيا سوداء بوجهي
وقررت اني مااروح لها ثانيه ولا اشتري الأبر
وماادري وش اقول لزوجي
بس قررت اني مااعلمه خفت يتأثر نفسياً أو تسوء نظرته لي
قلت تقول امورك تمام بس انتظري فترة
المهم رحت الشهر الي بعده لاستشاريه ثانيه وريتها التحاليل قالت مفروض قبل كورس التنشيط تاخذين علاج ينزل الهرمونات ويعدلها
وعطتني دوفاستون قالت كوليه اسبوع وبعده بأربع ايام نزلت الدورة
خامس يوم من الدورة قالت تاكلين كليمن منظم الدورة واكلته ونفس الوضع مافيه حمل
قلت خلاص بتوجه للطبيعه وبفعل بأسباب ثانيه غير الطب
صرت من ثالث يوم بالدورة
اجيب كاس مويه مغلي احط فيه ميراميه وبردقوش واغطيه ربع ساعه واشرب بالصبح وبالليل لمدة اسبوعين
استمريت عليه تقريبا 4 شهور
وقريت عن غذاء ملكات النحل وشريت كبسولات رويال جيلي 1000 ممتازه جداً اقروا عنه أكثر للفائدة
صرت اكل حبه يومياً
اخر شي سويته رحت لحرمه تمرخ
وقلت لها سالفتي قالت خلي اشوفك
يوم مرختني قالت عندك سدد وميلان وشوي نزول بالرحم
قالت تعالي بكره وبعده
طبعاً التمريخ ايام الدورة
وعطتني ورقه قالت جيبي هالاغراض من العطار واخلطيهن وألهمي منه كل صبح ثلاث ملاعق
أول ليله بعد التمريخ جاني ألم فضيع مااقوى اتنفس من شدة الآلم
الوقفه صعبه والجلسه صعبه
رحت وأخذت زيت زيتون وقريت فيه رقية الرويس ودهنت بطني وظهري ونمت
قمت الصبح الحمد لله احسن
ولهمت من الخلطه
مااتذكر الكميات بالضبط بسألها عنها واكتبها لكم إن شاء الله
بعد ماطهرت من الدورة قلت بروح اشوف التبويض لعله تحسن
ورحت لاستشارية سعودية كبيرة ومعروفه على مستوى رحت وانا متحمسه اني بستفيد منها
يوم دخلت وقلت لها قصتي قالت تبين احلل لك الهرمونات حللت
بس أتمنى إنك ماعاد تراجعين عندنا المره الجايه خوذي موعد عند عيادات العقم
انصدمت قلت وشلون عقم وانا عندي بنت😳
قالت عادي عقم ثانوي يجي اي حرمه
قالت شوفي لازمك تحللين هرمونات واشعة الصبغة واذا كل شي سليم تبدين بكورس تنشيط ولازم زوجك يجي معك يفحص بعد
طلعت منها متحطمة جداً
بس قلت بيقين يارب مهما بلغت هالدكتورة من العلم تبقى جاهله أمام قدرتك
وقمت أردد هالدعاء لحد ماوصلت البيت
(اللهم إني أبرأ إليك من حولي وقوتي إلى حولك وقوتك فإنه لا حول ولا قوة لي إلا بك)
اسميه دعاء المعجزات وأهم شي الترديد مع اليقين
رايحه انا على اساس بشوف التبويض ورجعت حتى ماشفته من تحطيمها الله يسامحها
بس كان عندي أمل كبير بالله
المهم تمر الأيام وانتظر الدورة وتتأخر يومين وحللت منزلي ولله الحمد والمنة طلع خطين😭😭❤️
ماأنسى فرحتها يارب كل متأخرة تذوق هالفرحة عن قريب
وذكرت الاستشاريه قلت ليتها تدري
سبحان الله الكلمة الطيبة صدقة وتأثر
**خلاصة التجربة اسأل الله أن ينفع بها:
1- دوفاستون وكليمن لتنظيم الدورة
2- شرب كاسين من منقوع البردقوش والميرامية
3- كبسولات رويال جيلي1000
4- التمريخ واللهوم
5- رقية الرويس بزيت زيتون والدهان اثناء الدورة البطن والظهر
6- الدعاء وخاصة دعاء المعجزات ترديده بيقين


دعواتكم لي الله يتمم حملي على خير وأشوف جنين بصحة وعافية
والله يرزق كل محروم بالذرية الطيبة الصالحة المباركة