تجربتي مع الحقن المجهري

السلام عليكم ورحمة الله وبركاته
مساء الخير حبيباتي

احب انقل لكم تجربتي مع الحقن المجهري وتأخر الحمل.

انا متزوجه لي ٩ سنوات وبعد سنتين من الزواج قال زوجي خل نراجع يمكن في مشكله تأخر الحمل رحنا المستشفى سوينا كل التحاليل قالو كل شي تمام بس في ارتفاع بسيط هرمون الحليب وماياثر واخذت منشطات ويصير التبويض جدا ممتاز ونحدد اوقات الجماع مع الاستشاريه ومع الأسف تجي الدوره بوقتها 😔تعقدت وزعل وصيح وزوجي يهديني يقول معليه صدقيني الله بيرزقنا لا تستعجلي انا مابي اعيال إلا منك ولا مابي إلا آخر العمر ومن مستشفى إلى مستشفى وكل نفس الشي كل شي سليم سليم قلت له خل نجرب مستشفى النساء والولادة يمكن ماره عليهم نفس حالتي رحنا حولونا الرياض لان مافي حل عندهم رحت الرياض سوو تحاليل من جديد قال كل شي سليم بس هرمون الحليب مرتفع اشوي اعطاني علاجات وسويت تحاليل بعد ٣ شهور قال كل شي تمام بعد سنه اذا ماصار حمل تعالو نشوف حل طبعا تحطمت لان زوجي يقولي نسوي اطفال انابيب وانا اقوله لا شنو يقولون الناس عني لما اقتنعت ورحت الرياض قالو بعد سنه هنا قمت ابكي استجنيت قالي زوجي دام كل شي سليم والهرمون نزل قال نسويها على حسابنا وافقت بتردد لان اعرف ظروفه ضل هو يسأل عن مستوصفات والمستشفيات لين قالو له عن مركز سمير عباس ومسوين عرض ١٠ آلاف العمليه رتب أموره وفرحنا بس ١٠ الألف قلت كلها شهر واحمل رحنا قالت تحاليل و تجريب ادويه يمكن طلعنا ٢٠٠٠ ريال وزوجي ساكت دفع ١٠ حق العمليه عشان مايروح العرض عطونا موعد مع ثاني يوم الدوره رحنا تابعت التبويض الدكتوره قالت كل شي تمام الشهر الجاي نسوي تنشيط وسحب وبسوي حقن مجهري افضل من أنابيب انا مافهم ولا زوجي ضل يبحث في النت ويعلمني وانا حطيته هو بالوجه والي يقوله اسويه للاسف متكملت فرحتي جت كرونا واتا اخاف ولا طلعت من البيت لين بعد عيد الفطر كنت اخاف أنصاب جاء زوجي كلمني قال خل نكمل العمليه والعلاج تأخرنا واجد وانا متردده قالي اذا مابتسويها قولي عشان اسحب المبلغ وخلاص انتظري الرياض حاول مسكين يقنعني لين اقتنعت خايفه من كرونا وخايفه فشل العمليه رحنا قالت بتسوي تنشيط عطتني ابر كل يوم ثنتين وكلفو زوجي قريب ٣٠٠٠ ريال مع حبوب ودفع المسكين تحاليل وعفسه هو ساكت ياخذ ويدفع جاء موعد سحب البويضات سحبوها ودوني الغرفه وانا اتكلم مع المنوم زوجي كان يبكي من الكلام الي قلته بعدين سئلته شنو قلت مارضى يعلمني المهم جت الدكتوره قالت مافي ارجاع هذا الشهر تعالو مع الدوره انصدمت حيل كنت مفكره يسحبوهم بعد ٣ ايام يرجعوهم سكتت الالم بطني من الابر ماقدر اتحرك كثير كل الم جسمي كله لين نزلت الدوره فرحت رحت المستشفى قالت الرحم سميك تعالي مع الدوره الثانيه انقهرت حيل قعدت اصيح وزوجي يقول صبري كل تأخيره فيها خيره وضليت انتظر الدوره كل شهر كنت اتمنى تتاخر عشان اصير حامل ومن سويت السحب اقول متى تنزل عكس انتظرها تنزل المهم نزلت ورحت لها قالت في لحمية الرحم ولازم منظار هنا قلت حق زوجي خلاص مابي لا اعيال ولا شي تعبت نفسيا وكل خساره فلوس وانت ماعندك سئل قال٣٥٠٠ ريال قال ماعندي قالت الدكتوره انا بكلم المسؤول يسوي تخفيض لك سوها تقريبا ٢٥٠٠ ولما جينا موعد قبل المنظار بيوم عشان تتأكد قالت الدكتوره ماشوف اللحميه قلت الحمدلله قال زوجي سوي منظار احتياط و أطالع فيه وهو هادئ ورايق يتكلم بثقه عشان يطمني ورتاح. المهم سوت منظار يمكن ١٠ دقايق طلعت قالت حق زوجي الحمدلله كل شي سليم بس خدشت الرحم عشان يساعد على تثبيت الاجنه الشهر القادم وعلاجات كالعاده هنا خلاص احسب الأيام تجي الدوره عشان ترجيع الاجنه جت الدوره ورحت قالت كل شي تمام بعطيك فتمينات وثبتات من الحين لين موعد الإرجاع رحنا قبل يومين سوت فحوصات قالت كل شي تمام عطتني موعد الإرجاع وانا مرتبكه وخايفه ضليت يومين مانام عدل احاتي وخايفه رحت الموعد وزوجي ينتظر تم الإرجاع ٣ اجنه وباقي ٣ قالو اذا تبو تجمدوهم سنه ١٥٠٠ عشان اذا فشلت العمليه او شي قال زوجي بكل ثقه لا الله بيرزقنا واثق من قدرة رب العالمين قالت الدكتوره بعد ١٤ يوم تحليل رقمي ورجعت الشقه منسدحه تحميلات ومثبتات وزوجي مسكين يجهز الفطور قبل الدوام واذا رجع يطبخ العشاء ويكنس ماتجي ٩ في الليل إلا نايم من التعب وانا اسبح وادعيه وصلوات نزل مني خفيف لون بني علمت زوجي انا خايفه قالي ما عليك تطمني صدقيني بتحملي ليلة ١٤ مانمت احاتي من الساعه ٧ انا بالمستشفى زوجي علم الدكتور ان نبغى تحليل رقمي لان مسوي حقت مجهري وكذا وسويت التحليل قال بعد ساعتين يطلع طلعنا ندور بسياره ولما رجعنا
.
.
.
.
.
.
.
مبروك المدام حامل دموع فرح سجدت شكر مو مصدقه مو مستوعبه زوجي يقول اخيرا بجي احد يقولي بابا اخيرا بسمعها

دعواتك لي ربي يتمم لي على خير ويرزق كل محرومه يارب.


نصايح حق الي يفكر يسوي حقن مجهري مركز سمير عباس

كلفتنا تقريبا جميع التكاليف ٢٥ الف ريال الله يعين زوجي يسدد😔

🔹️اذا معها تأمين طبي اذا عطوها الوصفه تروح تاخذهم من اي مستشفى يشمله تأمينها كذا توفر كثيير يقارب ٦٠٠٠ ريال.

🔹️اذا معها تأمين طبي أول زياره تاخذ اسم التحاليل وتسويهم مستشفى يشمله التأمين توفر مبلغ كويس.

🔹️اسم الدكتوره غزاله شاطره ودقيقه وتأخذ احتياطها بكل شي حتى المنظار قالت بكيفكم بس نصيحه سووه.

الي معها اي استفسر انا حاظره

ادعو لي ربي يتمم لي على خير ويرزق المحرومين 🤲