تجربتي مع الدعاء باسم الله (الرحمن الرحيم ) وسرعة استجابته تعالى

تجربتي مع الدعاء باسم الله الرحمن الرحيم وسرعة استجابته تعالى

اول شي السلام عليكم جميعاً

اليوم حبيت اكتب لكم عن تجربتي مع الدعاء باسم من اسماء الله الحسنى" الرحمن الرحيم"

انا يا بنات من فترة طويلة جداً يمكن من سنتين وانا تجيني ضيقة بالصدر وحزن بشكل مستمر ومفاجئ واشتكيت لكل الناس اهلي وصديقاتي بس احس محد راضي يفهمني او يدري وش فيني، ولا احد قدر يساعدني، وانا نفسي ما ادري وشو له هالحزن وهالضيقة، اكيد عندي اسبابي زي كل الناس بس صدقوني ما توصل لدرجة الضيقة اللي امر فيها احياناً اواصل الليل بالنهار من الحزن ولا اعرف اوقف هالشي ابد

ما ابغى ادخلكم بالجو السئ اللي كنت فيه بس حبيت توصل الفكرة

المهم يوم وانا اقلب باليوتيوب واسمع محاضرات وابغى اعرف وش الحل مع مشكلتي وش اسوي ما خليت دعاآ ولا صلاة ولا ذكر حتى كنت اقوم الليل واقرا البقرة بس ما احس بفايدة
لقيت محاضرة للدكتور عمر خالد اسمها الرحمن الرحيم
جزاه الله عن المسلمين كل خير...

والله يا بنات جا يوم وضاقت بي الارض الافكار براسي ما وقفت وكلها حزينة وتضيق الصدر ولا عرفت وش اسوي ليلي بنهاري حزن وكئابه قلت حيلتي وحسيت اني خلاص ما اقدر انفع نفسي ابد
وتذكرت اسم الله الرحمن الرحيم ورفعت راسي للسما و طالعت فوق وحسيت ان ربي يشوفني ودمعتي سبقت كلامي وقلت بس بس بس يا رحمن يا رحيم يا رحمن يا رحيم يا رحمن يا رحيم

بعدين قلت بس يارب اشرح لي صدري

والله يا بنات بكيت كم ثانية كذا بعدين سكت وحسيت كن جبل من الهموم طاح من فوق راسي وقلبي

وقمت عادي ما كأن فيني شي وقعدت اسولف مع اختي واتمشى بالبيت اللي يشوفني يقول هذي كذابة ما فيها الا العافيه ولا كانت تبكي ولا شي

اقسم بالله انه اسم زي السحر

وانا ادعي ربي استشعرت بداخلي ان ربي ينظرلي ويحن علي بلحظتها تخيلت ما فيه احد بالكون غيري وربي يطالع فيني ورحمني لحظتها رحمة عظيمة واعطاني انشراح في الصدر والله انها رحمة ما تقدر عليها امي... ما اذكر ان امي قد رحمتني كذا بحياتها ابد

بعدها عرفت اسم الله الجميل هذا لان اعرف ان رحمة ربي وسعت كل شي ربي ارحم من الام بابنها وربي ما نزل على لارض الا واحد في المية من الرحمة والباقي التسع والتسعين عنده سبحانه عشان نقدر دايم نطلب منه اذا ضاقت فينا الارض بما رحبت

اذا جيتي تدعين بهذا الاسم استشعري قدرة الله وحدة بالرحمة وانك انتي نفسك عاجزة عن رحمة نفسك ،، تعرفين موقف الام لما يتالم ولدها من اي اذى ويجلس يبكي لامه وامه ترحمه وتبكي معه يمكن بعد،.
طيب قد مر عليك موقف وحدة تبكي قدامك وحزنتي عليها واتمنيتي لو تقدينها باي شي من عندك
طيب عمرك مريتي بموقف حزنتي على واحد فقير او متسول و رحمتيه وقعدتي تتخيلين تخيلي ربي يطالع فيك وانتي تبكين وتنادينه تخيلي ربي يخلي الدنيا هذي كلها ويلتفت لك وحدك يوجهه تخيلي ان شالله علامات الرحمة مثل ما تتخيلينها على وجه الام اللي ترحم صغيرها
بس طبعاً لله المثل الاعلى( لحد يفهم غلط ويقول اني قلت تخيلي وجه الله،، ترا مو بعيدة تسوونها😂)
لا اقصد تخيلي علامات الرحمة تخيلي ربي قريب منك جداً جداً وانتي تبكين له زي ما تبكين لاعز انسان عندك زوجك او صديقتك او امك اكثر انسان تحسين لو بكيتيله رح يرحمك تخيليه مثل ربي واكثر

اسم الله الرحمن الرحيم هو اسم لاي دعوة انت حابه توجهينهها لله عز وجل اذا حسيتي ان محد رحمك ولا احد حس بحزنك وزعلك وضيقتك لا تذلين نفسك لمخلوق بس ارفعي راسك للسما زي ما سويت وسلمي امرك لله وقوليلها بكل خشوع و بصوت واطي (لان الله يسمعك) يا رحمن يا رحيم ارحمني برحمتك يا ارحم الراحمين وادعي الشي اللي بخاطرك والله ربي مارح يردك

اتمنى تستفيدون من الموضوع واذا دعيتوا ربي باي دعوة لا تنسون هذا الاسم العظيم وتيقنوا وحسوا فيه
واذا حبيتوا تشوفون محاضرة عمر خالد اللي عرفتني على هذا الاسم ادخلو اليوتيوب واكتبو عمر خالد الرحمن الرحيم

وصلى الله على محمد