تجربتي مع الدكتور بندر العبدالكريم في التحفيز

السلام عليكم ورحمة الله
موضوعي زي ماهو مبين لكم بالعنوان
بحكي لكم تجربتي في التحفيز مع الدكتور بندر العبدالكريم الله يجزاه خير
لأني كنت متخوفه من الموضوع جداً ولا حصلت احد كاتب تجربته بالتفصيل اللي يشبع فضولي ويريحني قررت اني بعد التجربة بكتب لكم كل التفاصيل اللي كنت احتاجها
طبعاً بالبداية راجعت عنده وحسب حالتي قرر لي التحفيز المناسب لي
اعطاني حبوب كليمين وفيتامينات امشي عليها واسوي اشعه بتاريخ هو يحدده لي وعلى حسب الاشعه يشوف اذا البطانه تمام والا لسى
مشيت اول شهر ع البرنامج العلاجي وماوصلنا للسماكة المطلوبه لبطانة الرحم
والشهر الثاني كانت الامور تمام بفضل ربي و موعد التحفيز الاول صادف يوم سبت 😫 اليوم ال١٢ من الدوره !
حتى المنسقات قالو مايصير وش هاليوم لكن حدده لي الدكتور بنفسه حسب حالتي وكتبها لي بالوصفه
ويوم السبت ماياخذ غير المواعيد الرسميه !
تواصلت معهم و ارسلني ع المنسقات وحولوني ع الدكتورة ابتسام تسوي لي التحفيز !
كانت طايره مو مصدقه بتسوي تحفيز لاحد 😐
وبس تمدح فيني وبصراحه م ارتحت نهائي
اخر شيء نادت النيرس تبع الدكتور بندر وتعلمها كيف تسوي لي تحفيز 😢😭
تقولون كيف قبلت وانا ادري انها تتعلم علي ! بقول مضطره ماكان عندي غير هالباب
وبصراحه ماشفت من هذي التجربة شيء سيء فقط انه شعور خوف انها تتدرب علي مع انها كانت تقول لي انا اعرف ودايم اسويه بس انا فاهمه كلامها مع النيرس ب الانقلش كانت تلقنها تلقييين وش تسوي
المهم التحفيز نفسه ايش !
هو ياحبي لك تنسدحين ع سرير الفحص النسائي المعتاد
ويفتحون لك بالحديده اللي توسع عادي كأنك تفحصين
بس بعدين تضغط النيرس ع بطني لتحت والدكتوره تكون معها ابرة طويله تسوي لك خدوش داخل
الامر متعب كأنه الم دوره قوي شوي بس مجرد ماتشيل ايدها يوقف الالم تدريجي
نزل معي دم خفيف لايذكر بعد التحفيز
وبعدو تقومين وعادي الامر ترى ي بنات يعني بس لحظة الخدش تحتاجين صبر شووي وينتهي


وصحيح بنات قبل التحفيز الثاني بيومين نزل علي بني كثير ما ادري وش هو لدرجة حسبته بداية دورة
بس الدكتور بندر يوم جيته قال عادي


اما الدكتور بندر ف حدد لي موعد للتحفيز الثاني بيوم ٢١ للدورة وتأكدت من انه يناسبه ومايحولني ع احد ثاني نفس المره الاولى
وكنت شايله هممممم كيف بيكشف علي وياربي استحي وحالتي حاله
لا ي بنات الامر سههههل
بعبايتي كنت و النيرس لبستني زي البنطلون سااااااترني تماما بس الفتحة مبينه وشغله كان سريع واخف من ابتسام بفرررررق
بنات ثواني اخذ مني قلييله ماشاءالله سريع
هذا اكثر شي كنت شايله همه ولا احد طمني من خلاله انو كيف بيكون وضعي كيف بيكشف علي
لا ي بنات بعبايتك وامورك مستوره 🙏🏻
اهم شي اي شي يقوله لكم الدكتور خلوه يكتبه بالتفصيل في الورقه لان ينسون وش قالو لك والمنسقات لازم يسألونك تحتاجين اثبات يعني 😆


و بس الحمدلله هذي تجربتي بكل التفاصيل
اذا افدتكم تكفون ادعو لي لاتنسوني من دعواتكم 🙏🏻♥️