تجربتي مع الظلم

السلام عليكم..
سجلت خصيصًا في هذا المنتدى أجمل من الرائع بسبب وجود أشخاص راقين أحب أطرح موضوع مهم جدًا تأثرت منه في حياتي.
أول شيء أعرفكم بنفسي أنا بنت عمري 27 عشت بين عائلة وظروف صعبة، يعني المجتمع الي عشت فيه للأمانة مايقدر الشخصيات الضعفاء مثلي.. عانيت كثير من حقد وكراهية وعداء كلهم اجتمعوا لكن الله ما يترك أحد الحمدلله تعرضت لظلم من العائلة بوجه الخصوص هذا الشيء خلا الناس الي برا ماتحترمني للأسف لأنه إذا عائلتك ما أعطوك قدرك مافيه شخص بوجه الدنيا راح يحترمك عشان كذا قررت أقوي من شخصيتي لكن الي صار العكس تماما تعرضت لاضطهاد بمعنى الكلمة وربي بنات حرفيا مايمر يوم إلا أبكي ابتداء من اب  ظالم وقاسي مرورا بإخوان وأخوات والله العظيم سوء تعامل انتهاء بامرأة اب ما أدري كيف.

طبعا في البدايه ماكنت أعرف الي أتعرض له ظلم لما استوعبت على نفسي يوم بعد يوم حسيت انهم يخبرن عني أشياء كثير وربي يعاملون الخادمات أفضل مني تخيلوا احنا بقرن  ٢١ ولسى هذولا العينات موجودين ومين من أقرب الناس الي مفروض يكونون سندك في هذي الحياة مع ان مادية أهلي كويسة مره لكن فيه سوء تعامل واضح بحقي يمكن لاني كنت الطرف الأضعف جا الضغط علي.

بقولكم قصة حدثت لي من سنه 2013 بديت من تويتر كنت طفشانه وجلست أغرد لما الله دلني على شخص سويت له إضافة بدون ما أتواصل معه لأني مو من النوع الي أكلم الرجال لكن هذا الشخص كان بمثابة فاتحة خير لي كشف لي زيف أهلي خصوصا أمي الي كانت تخبي أشياء كثير عني وتتهمني بأشياء كثر لما جا وقت أقسم بالله يا بنات ما سويت ولا شيء حتى دعاء ما أذكر اني دعيت على أحد لكن سبحان الله أمي دخلت غيبوبه في المستشفى فجأة وتوفت !!! مستوعبين نهاية الظلم فترتها أمي كانت ما تكلمني وأنا كنت أتجنبها اتقاء لشرها للامانه مو عشان شيء ثاني لكن كنت محتاجه فعلا انها تتركني بحالي وقدر الله وماتت تخيلتوا !!! توفت وهي ظالمتني !!! انا مصدومه بجد بجد ما أقدر اتكلم لأحد عن هذا الموضوع عشان تعرفون الناس تتكلم مع اني قد تكلمت وندمت لكن بصراحه ماتوقعت توصل النتيجه لكذا أمي الله يرحمها ماكانت انسانه متعلمه فيمكن كانت تعامل الناس بعنف لأنها ماتدري عن الحكم لكن الظلم مو شيء سهل أبدا أبدا.

فعلا والله بعدها كل شيء تعدل الحمدلله رجعت لدراستي وكملتها لكن للامانه نفسيتي حاليا محطمه وسيئة بسبب الي صار، أمي كانت تصرخ علي وتتجاهلني وتحرض إخواني وأخواتي ضدي وتسيء معاملتي حرمتني من أشياء كثير مثل الطلعات عشان أشتري أغراض اللبس والأكل بالإضافة ان علاقتها مع ابوي كانت فيها مشاكل كثير مع ذلك مارحمتني راجعت العياده النفسيه عشان أتخلص من الي انا فيه وهي عادي تشوف ومبسوطه بعدين انتهى فيها الحال وصلت انها تتهمني بأشياء ما سويتها !!!

انا الحين تأثرت مره والله أسامحها ولا ما اسامحها والله مو بيدي هالشيء تعرفون الانسان مرات يمر بلحظات ضعف لكن هي ماتركت مجال لي طول حياتي كنت ضعيفه وما قدرت اني بنتها.


أتمنى تساعدوني كنت بكتب أكثر لكن هذا الي طلع معي الحين وشكرا