تجربتي مع الولاده و الطلق

السلام عليكم
انا بكر و اول تجربه لي طبعاً انا انسانه تخاف من الولاده وعندي فوبيا منها ومابي احس بشي كان مطلبي الوحيد طول ٩ الشهور الي مرت اني اولد عمليه عشان ما احس بالم
عموماً لما كنت حامل كان يجيني طلق كاذب الي هو مغص بالبطن كان يستمر كل نص ساعه يروح ويجي وكان محتمل مو قوي وكنت اروح المستشفى و اشيك ويقولو لي طلق كاذب و ما فيك شي
ومرت الايام , وجا يوم ولادتي كنت نايمه و تقريباً. س ٨ الصباح حسيت بالم اسفل ظهري قوي و مغص في بطني ماكنت اقدر اتحرك لما يجيني استمر ١٠ ثواني وراح وقلت برجع انام الا يرجع بعد ١٠ د
وصار يتكرر يروح ويجي كل ١٠د و الالم ماقدرت اتحمله وعرفت انه طلق
امي نقعت رجولي بمويا دافيه وملح واكلت رطب ٣ حبات وبعدها رحت المستشفى وكنت خايفه مابي اولد طبيعي ابي عمليه وكنت رافضه يسون لي تحريض عشان يشوفو الرحم كم فاتتح لان بصراحه فوق الم الطلق تحريض ما كنت متحمله شيء وقتها سكتوني وعطوني مسكن " كان يخدرني بس لمن يرجع علي الطلق كنت اتوجع " طبعاً لاني ماكله قالو لي ما نعطيك ابره ظهر لازم تكوني صايمه ٦ ساعات وتحملت الطلق و ماكان مهون علي غير امي و دعواتها بعدها س ٦ المغرب انفكت المويا وقعدت لين س ٩ الليل و انا اطلق وكل ماله يزيد وصار الطلق يجي كل دقيقتين ولما ودوني غرفه العمليات طبعاً وقتها وصل راس الجنين تحت وخلاص بيطلع وكنت منهاره وبس اطلب بنج ابي ارتاح 😢 و عطوني تخدير راس عشان بس يسكتوني شوي لين تجي الدكتوره وتعطيني ابره الظهر ولما تخدرت وقبل ما تغمض عيني اخر كلمه سمعتها القابله تقول شكلها تطلق !
وما صحيت الا يقولو لي يلا ما بقى شيء وكنت مغمضه عيوني و اصارخ ب اقوى ما عندي و علي البخار و ماكنت عارفه وش قاعد يصير فيني كنه حلم بس اصارخ 😩 وفجاه اسمع يقولو لي مبروك ولدتي طبيعي ..
سبحان الله ربي اختار لي اولد طبيعي وما حسيت بالولاده تيسرت
بس اكثر شي تعبني و هلكني هو الطلق
عشان تهونين من الم الطلق لمن يجيك خلي احد يهمز اسفل ظهرك ويمسح عليك راح يخف كنت اسوي هالطريقه وكنت اقرا سوره الزلزله واكل رطب و كنت ادعي ربي يسهل علي و الحمدلله 🤍…
الله يسهل على كل حامل ولادتها ويارب ييسرها لكم مثل ما تيسرت لي ..