تجربتي مع تأخر الحمل يمكن غيري يستفيد

السلام عليكم ورحمة الله و بركاتة

من فترة تقريبا ٣ شهور كنت مقبله على عملية حقن مجهري وكنت ادور على اي تجمع يساعدني في هالمرحله خصوصا اني قررت مااتكلم لاحد نهائيا

ولقيت تجمعات المنتدى ودخلتها اشارك بعضويتي القديمه

قصتي بأختصار
تزوجت ٢٠١٥ وكالعاده اجلنا موضوع الحمل في البدايه علشان نعيش حياتنا

بعد سنتين قررنا نبدأ محاولات وشهر ورا الثاني يمر ومافيه اي نتيجه كل شي سويناه بدون فايده و صار لازم مراجعه مستشفى

بدأنا تحاليل لي و اشعه صبغة وغيرها والنتيجه كل شي سليم ولازم الزوج يراجع

راح يحلل زوجي وجت النتيجه زيادة في اللزوجه وصرفو له مكملات ودواء للبلغم و نراجع بعد ٣ شهور لو ماصار حمل
واستمر فترة طويله بدون اي نتيجه
جربنا خلطات العسل و مكملات وكل شي بدون اي فايده

ومنها قررنا نبدأ مع عيادة العقم
وللاسف من اول محاوله قالت لي الدكتوره نتيجته سيئه و الحقن الصناعي بيفشل
ورجعت سويتها مرتين عند دكتورة ثانيه وفشلت

بعدها اخذنا بريك و بعد شهرين او ٣ نبدأ االحقن المجهري
وبعد ترجيع اجنه مرتين فشلت العمليات

كان داخلي شعور ان العمليه مابتنجح مااعرف ليش وماكانت صدمه
لدرجه قبل ارجاع الجنين المجمد رحت لدكتورة سهام في الحقيل وشرحت وضعي

والحمدالله كان من احسن القرارات اللي سويتها
طلبت مني تحاليل واللي اقدر اسويه في مستشفى حكومي سويته واللي ماتوفر سويته في الحقيل

طبعا الدكتوره ماانصدمت ان عملية الترجيع فشلت والسبب عندي مشكله في احد الجينات تمنع انغراس البويضه
وللاسف كل الدكاتره اللي مريتهم وطلبت منهم هالتحاليل رفضو يطلبوها لي و كل احد يقول لي سبب غير

كان يومي كله يضيع عالمواقع و الدراسات علشان يمكن يمر علي شي من تحليل او دواء يساعدني

طبعا خطة العلاج للحين مو واضحه بس نصيحتي لكل متأخره في الحمل

لاتتهاون بموضوع تحليل التخثر و الاجسام المضاده ولا تسمع اي احد يقول هذي ماتنعمل الا للاسقاطات المتكرره

في وضعي المشكله عندي تسبب اسقاط مبكر قبل الانغراس و طبيعي كل شي احاول فيه يفشل

غلطتي كنت مقتنعه بكلام دكاترتي و ان الحقن المجهري هو الحل وللاسف ماكان هو الحل نهائيا وكان استنزاف نفسي ومادي فقط وضياع وقت من عمري