تجربتي مع توسع حوض الكلى للاجنه او توسع الحالب

بادخل في الموضوع مباشره واحكي تجربتي مع ابني لما شخصوا في الحمل ان عنده توسع في حوض الكليه او توسع في الحالب
الحمدالله على نعمه
لما قالوا لي التشخيص كنت ابحث كثير عن احد كانت عند اطفالهم نفس الحاله عشان كذا قررت اكتب قصتنا
في البدايه عرفوا وشخصوا حاله ابني على الشهر السابع وحولوني على دكتوره متابعه اجنه وحمل مهدد لان حملي فيه كان يجيني نزيف وكانت الدكتوره تاكد على شرب كميات كبيره جداً من الماء ٣ لتر في اليوم او قريب منها.
وما يسوون شيء وانا حامل فقط متابعه لكن التوسع للجنين كان يزيد الى وصل الى ١٢ سم يعني فوق المتوسط واقرب لمرحله الحاجه للتدخل الجراحي بعد الولاده.
ولدت اول يومين في التاسع جاء طفلي وزنه ٢٣٠٠ ورضاعته جداً ضعيفه فصار عنده جفاف وارتفع الصفار فاخذوه للحضانه وجلس على المغذي تحت الاضاءه. وكان من اصعب المواقف اني اخرج بدونه لكن الحمدالله على نعمه وكرمه. جلس خمس ايام وكنت كل ما اروح اسأل هل جاه موعد عن طبيب المسالك او لا ؟ لان دكتورتي وصتني ما اطلع الا بموعد لانه لو ماجاه موعد صعب يرجع يدخل تحت متابعه الدكتور وقالت اصري وطالبي بكل قوه بالمواعيد وفعلاً بعد خمس ايام خف الصفار ووصل الى اعلى حد طبيعي وشالوا عنه الاضاءه وجاني موعد المسالك وموعد عند قسم الكلى وموعد اشعه نوويه واشعه صوتيه للكلى فطلعته على مسؤليتي.
بعد كم يوم لاحظت الصفار خف كثير ورحت وديته قسنا الصفار صار طبيعي فرحت طهرته وبعدها بيوم جاه إسهال شديد ومعاه دم وديته الطواريء لنفس المستشفى اللي يتابع حالته فدخلوها التنويم والحمدالله على قضاءه طلع عنده التهاب في البول والبراز وقالوا هذا طبيعي اللي عندهم توسع لازم يطهر اول يوم ولاده لانه عرضه للالتهابات لكن بسبب الصفار والجفاف ما قدرنا نطهره فجاه الالتهاب. وجلسنا في المستشفى على المضادات حتى كمل عمره ٤٠ يوم سبحان الله الدكتور يقول بعد الاربعين تقوى مناعة الطفل وممكن نخرجكم واعطونا مضاد وقائي يستخدمه يومياً.
لمًا كنا في التنويم سوينا الاشعه الصوتيه زي اشعه الحمل بنفس الطريقه يسوون للطفل
وسوينا الاشعه النوويه كانوا يعطونه ماده في الوريد ويحطونه تحت جهاز الاشعه لمده نص ساعه يصورون الماده وهي تمشي في الجسم حتى تطلع مع البول سبحان من علم الانسان ما لم يعلم.وبعد ٣ ساعات نرجع يصورون صوره وحده للجسم
هي الاشعه النوويه كانت شويه متعبه خاصه انهم ما يبغون الطفل يتحرك في الاشعه فكانوا يلفوه ويثبتوه في السرير وانا ولدي كان كثير البكاء فتعبنا شويه فيها وخفت يعيدوها بس الحمدالله طلعت واضحه.
بعد ما طلعنا من المستشفى جانا موعدنا مع الدكتور وهو عمره شهرين عادوا الاشعه الصوتيه ودخلنا على الدكتور قال انه خلال هذا الفتره بين الاشعتين مافي تحسن يذكر. وعنده الكليه اللي عندها التوسع تعمل بنسبه ٤٠/ بدل ٥٠/ الحمدالله ماعنده ارتجاع في البول ولا انسداد لكن بنعطيه فرصه الى عمر ٥ شهور اذا ما تحسن بنتدخل جراحي
هو طبعاً التوسع ما ياثر على الطفل ابداً لكن اذا استمر تبدأ الكليه اللي فيها توسع تتوقف بالتدريج او تثبت على التصريف البطيء ، والانسان ممكن يعيش بشكل طبيعي بربع كليه. فهذا البطء ما يأثر على الانسان الطبيعي لكن لو كبر وجاه عرض مثل مرض السكر او صار له حادث لاسمح الله وتاثرت الكلى فبيكون عرضه اكبر للفشل الكلوي. فطالما ممكن يعالجون الوضع وترجع الكليه طبيعيه بتدخل جراحي فليش ما يسوونه بس لازم يسويه وهو صغير حتى ترجع الكليه لعملها الطبيعي
لما صار ولدي خمس شهور عادوا الاشعه الصوتيه وطلع مافي تغير يذكر فقرر الدكتور له عمليه لكن زوجي طلب مهله اسبوع نستشير دكتور ثاني ونستخير ورحنا لدكتور ثاني قال نفس كلام الدكتور لازم تدخل جراحي وقال لنا الحمدالله انكم عند افضل دكتور مسالك اطفال في السعوديه وهذا استاذنا احنا نرجع له في الاستشاره فاذا قال فامشوا على رأيه واستخرنا ورجعنا الكتور حتى يحدد موعد العمليه لكن الدكتور فاجأنا بتغيير رايه قال باخليه شهر كمان ونعيد الاشعه ولا تعتمدين علي يا بنتي في العلاج لان كل شيء بيد الله.
وكانه نبهني لان ما اعتمد على الاسباب وارجع لمسبب الاسباب وبدأت اقرأ على ولدي الفاتحه كل يوم سبع مرات مع الدعاء والابتهال والصدقه.
بعد شهر رجعت للدكتور وعدنا الاشعه والحمدالله انفك الضيق في الحالب وخف التوسع ورجع اقرب للطبيعي والحمدالله اللي بيده كل شيء وقادر على كل شيء. بعدها وقف الدكتور المضاد الوقائي وصرنا على المتابعه كل ٣ شهور وانا ما ازال مستمره على الفاتحه كل يوم. لما صار عمره سنه عدنا الاشعه النوويه صدق تعبنا فيها لانه اكبر عمر لما يركبوا ابره المغذي ولما لفوه وحطوه على سرير الاشعه كان يبكي طول وقت الاشعه.وكان صعب تثبيته للتصوير و الحمدالله تحسن عمل الكلى بفضل الله ووصل الى ٤٩٪؜والحمدالله حتى يبلغ الحمد منتهاه.
الحين مستمرين بالمتابعه قال الدكتور حتى يصير عمره ٥ سنين باذن الله.
وصدق الدكتور كل مره اروح له يقول يابنتي انا علي اتابع الحاله لكن مو انا اللي اعالجها خليك مع اللي يعالج ويشفي
والله يشفي مرضانا ومرضى المسلمين ويقر اعيينا بعافيت ابنائنا وصلاحهم يا رب.