تجربتي مع خلع الورك لبنتي

السلام عليكم
حبيت انقل تجربتي للي عندهم اطفال فيهم خلع ورك
طبعآ خلع الورك نوعين
يكون من الولادة.. او يكون احد خلع وركة مثل اللي يشيلون الاطفال من ارجلهم او وراثي
وتقدرون تقرون عن موضوع خلع الورك الولادي..
قصتي مع خلع بنتي عشان الكل يستفيد..
طبعآ اكتشفت خلع بنتي متأخر واللي زاد الخلع المهد او الكوفة عشان كذا لازم تتاكدون من سلامة اطفالكم اول ماينولدون
يوم شافها الدكتور وأكد وجود الخلع بالاشعة والفحص السريري اعطانا موعد لإجراء عملية الجبس
وقال ع بال مايجي موعدها لازم لبس حفاضتين فوق بعض
وجاء موعد العملية مع التخدير ولازم تكون صايمة12ساعة
وهي ثلاث مراحل..
الاولى جبس من نصف الظهر الى أخر الساق مع فتح الفخوذ اقصى قدر ممكن وفتحة صغيرة مكان منطقة الحفاض
عاد تخيلوتقعد كذا شهرين لاتتحرك ياقلبي ولاشي بس نايمة ع ظهرها حتى الاكل بصعوبة خصوصآ ان عمرها سنة ونص وصياح وبكاء وقل نوم
والدكتور حذر من بلل الجبس خلف الظهر او عند الافخاذ والا يصير عفونة والتهاب بالجلد وتضطر لتغير الجبس والتعرض لتخدير وهذا يضرها خصوصآ انها صغيرة


المرحلة الثانية ..
نفس الاولى وتستمر لمدة شهرين
المرحلة الثالثة..
جبس من الفخذ الى نهاية الساق بدون جبس ع الظهر وعمود بين الساقين يعني يكون شكلةمثل حرف A ..
ويستمر لمدة شهرين
كلها فيها تخدير ولازم عناية لايتبلل الجبس
يعني المدة بالاجمالي ستة شهور
وبعدها خلاص يفكون الجبس..
لكن عانيت لمدة ستة شهور او 7
ان الافخاذ مع السيقان رخوووة جدآ لاتسطيع الجلوس ولاالوقوف وتستمر فاتحة فخوذها كآن عليها جبس وفيها قشووور
القشور عالجتها بدهنها بزيت زيتون
اما رخوة عظامها حاولت اعالجها بشراب حليب وحلبة وعلاج فيتاميناات ببحث عن اسمة
والحمدلله تحسنت
الملاحظات?.. بعد ماصارت تمشي ان القدم شبة مايل الساق فية تقوس بسيط كلها من الجبس
نصائح?.. تفيد الامهات لطفلها اوطفلتهاالمخلوعين بالورك
1-اذا تبلل الجبس افضل شي تنشفينة بالاستشوار حتى ينشف عشان مايتعفن ويلتهب الجلد وتضطرين لتخدير وتغير او تقلبين الحفاظة وتدخلينها من تحت يعني بين الجبس والظهر وبكذا مايوجعها ظهرها من قساوة الجبس ولايتبلل وتغيرينة كل يومين
او تلفينة بنايلون تبع السندوتشات
2-حاولي هالفترة تكثرين لة من الالعاب عشان تبعد عنة الصياح والملل لان كل هالوقت بمكان واحد وبدون حركة
3-ايضاآ حاولي فترة الجبس ماتطلعين من بيتك لان صعب تتحركين وتشيلينة وغير انظار الناس


4-اذا بيجيك احد ولااضطريتي تطلعين الافضل لبس ملابس اكبر من عمرهم يعني فستان واسع من تحت يغطي الجبس
5- اذا بتسلين بنتك وتتمشين فيها سواء برا ولابالبيت حطيها بعربة الاطفال لكن احشيها بمخدة كبيرة عشان السيقان تكون طالعة لبرا
6- لاتنسين وقت النوم ترفعين الظهر مع الراس على مخدة عشان مايتقوس ظهرها




واكيد هالفترة متعبة ومؤلمة جدآ وطويلة لكن وش نسوي مالنا الا الصبر...والدعاء


وتكفون اللي استفاد من موضوعي
ادعولي بالشفاء ويسخرلي
ويخليلي عيالي
ويدعي لوالديني بالعافية ويجعلها صدقة عني وعنهم..