تجربتي مع فندق رمادا الهدا ( الطايف )

مساء الحر و الغبار .. مساء ما يليق إلا بأهل الرياض .. حبيبتنا الرياض رغم كل ما فيها من أجواء ساخنة ..
مساء الخير لكل الحوائيات ..حبيت أنقل لكم تجربتي مع فندق رمادا الهدا .. أنا رحت للطايف قبل اسبوع تقريبًا , يوم الأربعاء الماضي , و طبعًا قررنا نسكن برمادا الهدا .. لأسباب كثيرة ,.منها : أنه فندق خمس نجوم , و يقع في اعلى قمة في جبل الهدا , احنا مانحب نسكن في الطايف , نحب الهدا , و متعودين على فنادق خمس نجوم ..
و أنت تصعد جبل الهدا بالسيارة ترى أنوار الفندق في اعلى القمة ساحرة و خلابة ,, وصلنا , و طلبنا غرفة بآخر دور ( الدور السادس ) و قالوا لنا فيه صيانة , فأخذنا الدور الخامس , طبعًا سعر الليلة ( 750 ) ريال , شاملة للإفطار , طلعنا للغرفة , صغيره , و عادية جدا, و طبعاما تطل على الجبل , لأن المطلة سعرها ( 950 ) ريال !!!!! علشان تفرجين مضبوط على القرود !!!!! عمومًا دخلت الحمام بآخذ شور علشان الطريق من جدة حر , و تفاجأت مافي الحمام و لا فوطة ؟؟؟ اتصلنا بالاستقبال و طلبنا فوط , و جاء العامل و قال : مافيه فوط ؟؟:42:,, قال زوجي فندق 5 نجوم بدون فوط ؟؟؟ كيف ؟؟ قال الغسالة خربانه من يومين , و ما صلحناها !!!!! قال زوجي تجيبون فوط خلال 10 دقايق او أسترد المبلغ و أطلع من الفندق ...
لما جت الساعة 2 فجرا , تونا حاطين روسنا ببنام إلا و نسمع فوقنا خبط و تسحيب و حاله .. أتصل زوجي بالاستقبال و سألهم , تخيلوا وش كانت الإجابه ؟؟؟؟؟؟؟؟؟ قال الموظف والله فيه اعمال صيانه !!!!! :icon33:
و من بكره كان زوجي حاب يقيل بعد صلاة الظهر , لأننا نصحى بدري ,, توه نايم له نصف ساعة إلا و يشتغلالدريل فوقنا !!!!!!!! تابع أعمال الصيانة :icon28:
بوفيه الفطور , بعد الساعة عشره ما يتجدد , يعني لقيت شيء تاكله , و إلا توكل على الله !!!!
و طبعا شلنا أغراضنا و طلعنا لجدة على طول ..
كيف تكون بلادنا سياحية و الفنادق بهذه الصورة ؟؟؟؟ أين إدارة الفندق من الصيانة في وقت الشتاء حيث ان الطائف مصيف و زوارها في الصيف ؟؟؟ لماذا يتم تسعير الفندق بهذا السعر و هو يفتقد لأدنى مقومات الخمس نجوم ,, تدرون العمال وش يقولون لزوجي ؟؟ يقول هذا فندق ( زيرو ) ستار , هذولا العمال متفشلين من كثر شكاوى النزلاء ,, الفندق عليه إقبال كبير خاصة من المعاريس , ياقلبي عليهم شكلهم ماجربوا الخمس نجوم برا علشان كذا متحملين ,,, أو إنهم تورطوا و مالهم غيره ...
ياليتهم يطلون على جيرانهم في الإمارات و يشوفون كيف فنادق الثلاث نجوم ,, و يتعلمون منها علشان يسوون خمس نجوم !! الطائف مصيف رائع رائع , أجواء أوروبيه , لكن ينقصه توفير السكن الراقي .. الله يصلح الحال .