تجربتي مع مركز طاقات تبع حافز / لا يخص القسم

انا اقولكم عن معاناتي معاهم
أتصلو علي مركز طاقات ( عند الغرفة التجارية في جدة )تقريبا في شهر محرم ورحت لهم ... اعطونا ورش عمل..اخذت معاهم 4ورش عمل هي( ورشة عمل عن اجتياز المقابلة الشخصية, تعزيز الثقة, اداب العمل, كيف تسوق مهاراتك)..
ولكل وحدة تروح عندهم كانت لها مشرفة توظيف تتابع معاها و تجيب لها وظائف تناسبها سألتني عن مؤهلاتي وايش الوظائف إلي تناسبني واذا ابغى اختلاط أو لأ , صراحة حسستني وهي تسألني انها ما راح تجيب اي وظيفة ما تناسبني...وقالتلي انو عندي 3 فرص اذا رفضتها يقطعو الاعانة.
طبعا اخذت ايميلي وكانت يوميا تقريبا ترسل لي اعلانات عن وظايف... وخلتني اسجل في مواقع التوظيف زي موقع بيت ومهنتي وبيزات وغيرها..
أنا شهادتي بكالوريوس وعندي شهادة خبرة تدريس سنة في المدارس الأهلية ودورة ادخال بيانات ومعالجة نصوص وقلتلها ما ابغى اختلاط وعندي اطفال عشان كذا ما ابغى الدوام لوقت متأخر.
المهم مشرفة التوظيف جابت اول وظيفة في مكتب سفر وسياحة اتصل على العملاء ( رجال ونساء) واسوق لعروضهم والراتب 2000 والدوام من 9ل 5 ورحت المقابلة الشخصية بس الحمد لله جاء الرفض منهم.
ثاني وظيفة في شركة امريكانا ( هارديز وكنتاكي ) برضه خدمة عملاء ارد على العملاء إلي يتصلوا ويطلبو طلبات واخد الطلبات والراتب 4000 والدوام من 11 إلى 7 وساعة بريك يعني ل 8 وورفضتها (المقابلة الشخصية مع واحد مصري)
ثالث وظيفة كمان خدمة عملاء في شركة تروج عن مشاريع الراتب 3000 الاف والمقابلة كانت في مركز باب رزق جميل ورحتها بس صراحة خبصت في المقابلة وطالبين الوحدة يكون عندها اسلوووووب اقناع قوي عشان تقنع العملاء يساهمو في المشروع والحمد لله ما اتصلو عليا
رابع وظيفة في سوبر ماركت مرحبا وظيفة ادارية (ادخال بيانات) طبعا انا رفضتها على طول ولا سألتها عن االراتب ولا الدوام وو قتها قالتلي رفضتي وظيقتين باقي لك فرصة أخيرة..
وقبل اسبوعين اتصلت عليا وقالتلي ان وقتي معاهم انتهى المفروض بس 3 شهور أنا زادت المدة معايا ( أتوصت يعني).. ودحين مهمتي لوحدي اني أدور على وظايف على وهما ما راح يبحثو لي على وظايف.:42:
واخيرا يا بنات زي ما أنتو شايفين جابتلي وظايف عكس إللي طلبتها يعني قلتلها ما ابغى اختلاط ولفت على الموضوع وجابتلي وظيف اتصل على رجال ونساء أو المقابلة تكون مع رجال وحتى لو كانت بيئة العمل نسائية بس مديرك المباشر يكون رجال الوظائف الاربعة كلها كذا.
غير كذا الوظايف اللي ارسلتني لها لبنات الثانوية والدبلوم والبكالوريوس مافي فرق عندهم.
واغلب وظايفهم اختلاط أو كاشيرات أو بائعات في محلات نسائية وطبعا الدخول للعائلات أو خدمة عملاء
هذي تجربتي معاهم والله على ما أقول شهيد....