هذا المعالج ذكرت تجربة لي مختصرة عنه بموضوع سابق
وراسلوني بعض الاخوات يسالون عن التفاصيل ووعدتهم اعيد التجربة
وانزل موضوع بعدها ، وهذا انا اوفي بوعدي ..
اسم المعالج :
Inoar Brazilian Keratin Moroccan Treatment Kit
وهذي صورته
اولا اقول لكم على طبيعة شعري ، كيرلي جاف فيه نفشة ومتطاير
زي كذا
طبعا المشكلة مو بالكيرلات اساسا الشعر الكيرلي له جاذبيته
اذا الشعر اساسا كثيف والكيرلات منتظمة ومافيها نفشة وجفاف كبير ، لاحظو اقول جفاف
كبير لان الشعر الكيرلي اساسا يكون فيه نسبة جفاف ماتعيق ان الشعر يظهر بمظهر حلو
زي كذا
شايفين كيف الكيرلات منتظمة وحجم الشعر حلو ؟
تعمدت اختار صورة شعر طبيعي لان صور الممثلات تكون شعورهم
فيها معالجة بكريمات واشياء تطلع الشعر مررة مرتب وبدون ذرة نفشة
زي ميريام فارس مثلا ... وهو فعلا فيه كريمات ومستحضرات خاصة بالشعر الكيرلي
تضمن رطوبته وتشيل النفشة نهائيا ، تلاقونها ممكن بالصيدليات (ايضا بامازون)
اما لو الشعر كيرلي ونافش والكيرلات كل كيرلة شكل !
هذا ما ينفع له الا الفرد او الريلاكس ..
الفرد نعرفه الي يخلي الشعر ستريت مفرود زي المسطرة
الريلاكس مجرد يمغط - يمدد الكيرلات ويشيل النفشة من الشعر
انا لان شعري خفيف ما كان مناسب لي ابدا الشعر السايح الناعم
لان الشعر السايح الناعم جماله يكون كثير وكثيف ...
لذلك كنت اتمنى شعر ويفي بدون نفشة زي كذا
مع هالمعالج هذا حصلت على نتيجة مقاربة ، واتصور مع استمراري فيه
راح احصل مع الشهور الجاية على نتيجة زي الصورة الي فوق ..
طيب الان بكلمكم عن هالمنتج : هو معالج وفرد بنفس الوقت
يعالج الشعر من اثار الكيماويات زي الصبغات والملوثات وحتى كريمات الفرد
السابقة ويبني الشعرة من داخل ويقويها وتطلع صحية ومتغذية (مع نسبة لمعة تختلف حسب صحة التطبيق
ونوع الشعر )
حاولت اجيب لكم كم نسبة الفرد الي فيه لكن ما حصلت للاسف
الان نجي لطريقة التطبيق :
الادوات :
- مشط
- شباصات حجم كبير
- قفازات بلاستيك
- فازلين
- ماسك (الطبي الي ينحط على الانف والفم)
- مجفف
- مكواة سيراميك
- سفرة او فوطة
الوقت المتوقع : ساعتين على الاقل
الطريقة :
تغسلين شعرك بالشامبو مرتين ورى بعض
بالمرة الثانية تخلينه عشر دقايق على الشعر بعدين تغسلينه
بتلاحظين شعرك صار جاف بعد ماتطلعين من الحمام
لا تخافين هذي التهيئة الاولى للعلاج ..
تحطين السفرة او الفوطة على ظهرك ، تمشطين الشعر كامل
وتبدين تقسمين شعرك اربع اقسام وكل قسم عليه شباصة
تدهنين اطراف وجهك بفازلين لان الكريم لو جا على الوجه يحرق شوي
الان تحطين الكريم بالصحن الخاص وتلبسين قفازات البلاستيك ثم
تتجهين للحوش :)
ايه الحوش ما غيره او اي مكان مهوى تهوية كويسة لان الكريم ريحته
تخنننق جدا انا حذرتكم .. ولو عندك مروحة متنقلة يمديك تشغلينها بالمكان المفتوح
يكون احسن بعد ..
بعد ما تكونين بهالمكان المهوى بشكل كويس ، تلبسين الماسك
وتبدين تحطين الكريم على شعرك خصلة خصلة زي ما تحطين الصبغة بالضبط
لا تغرقين الشعر ولا تقللين الكمية حطي لكل خصلة الي يكفيها ويغطيها بالكامل ..
اهم حاجة : ابتعدي عن الفروة 2 سم
بعد ما تخلصين تمسكين المجفف ، وحوالي ربع ساعة تظلين تجففين
بعدها يبدا الجزء الصعب ، راح تستخدمين المكواة وتبدا الابخرة تطلع
طبعا هذي جلسة طويلة ، تمسكين خصلة خصلة (عرض الخصلة اصبعين
او ثلاث اصابع ) وتسرمكينها عشر مرات او 12 مرة وتحرصين ماتكون قريبة عند وجهك لان زي ما قلت لكم الابخرة تكتم ، لو حسيتي الماسك الي حاطته مانفع بطنيه بمنديل والبسيه مرة ثانية
انا ما قدرت اشتغل الا كذا .. وتكملين لييييييييييين تخلصين ..
طبعا بتلاحظين الكريم ملمسه زيتي شوي ، وبعد ما تخلصين فيه لمسة
زيت بشعرك ، مع انك تقدرين تغسلين بنفس اليوم لكن هالملمس الزيتي
بيخليك تستعجلين تبين تغسلينه بسرعة ، لكن المفروض تجلسين فيه 4 ساعات
على الاقل بعدين تغسلينه بشامبو خالي من البارابين والفوسفات
زي هذا
تلاقونه عند نزيه ب 95 ريال ، طبعا فيه انواع ثانية بالصيدليات
ليش هالشامبو الخالي من البارابين والفوسفات ؟
لان الشامبو العادي يسحب كل المواد من داخل الشعرة بما فيها مادة العلاج
فكانك ما سويتي شي ، انتبهو تضيعون تعبكم وتغسلون بشامبو عادي ..
بعد ما تغسلينه بتلاحظين شعرك صار :
طري وملمسه نااااعم وبتلاحظين هالشي من وانتي بالحمام
اختفت النفشة بنسبة 70 بالمية على الاقل
ثقلت الشعرة وترطبت وصارت صحية
اطراف الشعر ملتفة بشكل طبيعي وحلو
انا اساسا كنت بنزل هالموضوع بعد ما اجرب الصبغة السودا
بعد هالمعالج (لان شعري فيه شيب ) لكن قلت خل انزله اول ومتى ما جربت الصبغة
سويت تحديث للموضوع ..
س : هل راح يكون شعري ستريت بعد الفرد ؟
ج : يعتمد على طبيعة شعرك + شغلك اذا مضبوط وكل خصلة تسرمكت كويس او لا
لو شعرك ويفي احتمال كبير يطلع ستريت او شبه ستريت بعد الفرد ، لكن لو كيرلي
راح يطلع لك ويفي ، وتذكري هذا معالج فيه نسبة فرد اقل من باقي المستحضرات الثانية ..
س: اقدر احطه على شعر مصبوغ او تالف ؟
ج: اكيد لانه معالج ..
س: من وين احصل هالمعالج ؟
ج: من امازون ، فيه موقع اسمه سوق يبيع لك اياه بس ماني متاكدة اذا حاليا
متوفر عندهم او لا ، عموما الطلب من امازون ماهو صعب كل الي يحتاجه انه
يكون عندك بطاقة فيزا (في بطاقة من الراجحي خاصة للتسوق ) + بريد امريكي
ووقتها تشترين الي تبين ..
طبعا بامازون راح يكون متوفر باحجام مختلفة ، فيه سعة 250 مل (الي ممكن يستمر
لثلاث او 4 استخدامات ) وفيه الف مل وفيه لتر ..
س: كم يظل المعالج على الشعر ؟
ج : من 3 - اربع شهور
س : كم قيمة المعالج ؟
ج : 700 ريال وشي
س : اقدر اصبغ شعري بعدها بلون غامق او فاتح ؟
ج: ماني متاكدة صراحة لان ما حصلت بالنت دليل استخدام مفصل للمنتج
لكن تقدرين بعد اسبوع او عشر ايام تجربين تصبغين ...
س: كم مرة استخدم الشامبو الخالي من البارابين والفوسفات ؟
ج: كل ما غسلتي شعرك ، اصلا من تستخدمين هالمعالج انسي نهائيا
الشامبوات العادية واستخدمي دايما هالشامبو ..
س : اقدر استخدام ماسكات وزيوت للشعر بعد هالمعالج ؟
ج: اكيد ، اساسا لازم تستخدمين ماسكات تغذية بالاسبوع مررة
س- هل احطه على الفروة عادي؟
ج: لا ابدا لا تقربين للفروة خليه بعيد شوي عنها 2 سم
س: كيف ريحة المعالج على الشعر ؟
ج: بعد ما تخلصين تلاقينها ريحة حلوة مو كيماوية
مع ثاني غسلة تخف لين تختفي وتصير ريحة شعرك طبيعية