تجربتي مع هالزيت ومع الخلطه الفاشله تحذير للبنات

كيف حالكم يالغاليات عساكم بخير ان شاء الله ..

يالغاليات حبيت اني افيد بعض البنات عن تجربتي باستخدامي لزيت

النمل للحد من نمو الشعر الغير المرغوب فيه ..


اولا خذيته من خارج المنتدى

الزيت مثل ما هو مذكور ببعض المنتديات انه اساسا من ايران

بصراحه طلبته من وحده من هنا بالمنتدى قالت سعره ما يقارب خمسين الى ستين والله ما اذكر

قلت حسافه بصراحه كثير عليه وحجمه مره صغير


المهم وحده من الصديقات رايحه شمال ايران سياحه

تقريبا هالكلام من قبل رمضان

واطلب منها الزيت وعطيتها الاسم بورقه ووصيتها تجيب لي ثلاثه منه


قلت عشان يكفي لو ابي اسوي اكثر من منطقه

والله لو اقول لكم كم سعره هناك ما راح تصدقون خمسه ريال بس :35:

ارحمونا يا تاجرات عشان الله يفتحها عليكم


خلاصة تجربتي

اولا استخدمته لاهم منطقه طبعا الوجه

كنت اسوي ليزر والم فضيع بكل جلسه وبعد سنه ونص اختفى الشعر

لكن بعدها بسنتين طلع من جديد وياريت مثل اول الا زااااااااااااد :44:


قلت ارجع لليزر لكن بصراحه رابع جلسه رفعت علم الاستسلام قلت خلاص ما فيني

صرت اجر روحي جر للعياده عشان بس اخذ الجلسه والله من كرهي لريحة حرق الشعر والالم الفضيع الي احس فيه


طبعا سويت تحاليل للهرمون كل شي تمام التمام بس الظاهر كلنا الخوات كذا مع ان خواتي نفع معهم الليزر

الا انا ما ادري ليه مع ان هم هرموناتهم متخربطه مو زيي تمام سبحان الله


المهم اتبعت التعليمات قبل استخدامي للزيت زيت النمل

اولا شلت شعر الوجه من جذوره

استخدمت مكينة براون الخاصه بالمناطق الحساسه مثل الوجه

بعدها غسلت وجهي بماء بارد

وبعدها كل مكان بالوجه سويت له مساج بالزيت

مرتين باليوم مره الظهر ومره بالليل كان هالتوقيت مناسب لي اكثر


المهم ان مرتين باليوم

وبصراحه ما كثرت واجد يعني الي يكفي للوجه بس مو لدرجة ان يسيل


بعض التاجرات تقول من اول مره تحسين ان خلاص ما عاد يطلع لك شعر

او بس يطلع لك وبر الشعر الناعم الي ماله لون


لا والله مو هالنتيجه الي حصلت عليها

الي حصل ان طلع لي شعر بعد اسبوع ونص

وانا بالعاده اسبوع ويطلع لي لو كان من غير ما اجرب الليزر او الزيت

ان كان بالليزر اسبوعين ويطلع كأني ما سويت شي


المهم بعد اسبوع ونص لما طلع كان خفيف لكن مو ذاك الزود ان انتبه ان فعلا قل لدرجة اني ارتحت او ما عاد يحتاج اني اشيله



عاد قلت دام ان فيه نتيجه مره خفيفه استمر

قمت شلته من جديد من الجذور وسويت نفس العمليه

بس لما كنت اشيل بالمكينه لاحظة شي عجيب

ان نهاية الشعره النقطه السوده مهي موجوده يعني شعر من غير الجذور

الظاهر ان الشعر الي كان موجود تحت الجلد طلع بس ماله جذور

قمت ودهنت روحي لمدة ثلاث ايام نفس المره الاوليه يعني الظهر والليل واسوي مساج خفيف

عشان يتشرب الجلد من الزيت


طلع لي بعدها بسبوعين ونص تقريبا يعني ارتحت هالمده

وبعد سويتها مره ثالثه وتقريبا هالكلام كان 18 رمضان

والى الآن ما طلع لي الحمدلله رب العالمين

لما ألمس وجهي احس ان فيه شعر خفيف لكن ما له لون

قلت اشوف بالشمس وفعلا الشعر ماله لون وخفيف مره قلت لما يطول خخخخخخ بشيله وبحط الزيت


مرتاااااااااااااااااااااااااااااااحه مره


وعلى فكره كل هالمرات الي جرتها ما وصلت الكميه حتى الى نصف العبوه الصغيره

والآن بباشر ببقية الجسم ان شاء الله وبريح نفسي من الحلاوه


ان شاء الله قدرت اني افيد بعض الخوات بالنسبه لزيت النمل وتجربتي

وعلى فكره ريحته نفس ريحة زيت الخروع يعني مشابه لريحته ما تقرف ابدا


.................


تجربتي الثانيه مع خلطة الجلسرين

وحده من العضوات هنا بالمنتدى الله يذكرها بالخير

والله يهديها كانت كاتبه عن خلطه

قالت شيلي منطقة الركب بالحلاوه

بعدها حطي خلطة كريم الجلسرين واخلطي الكريم مع ليمون وكمان مع سكر وقالت اول شي اخذي السكر مع زيت الجوز المر واقعدي سوي كسرب للمنطقه وبعدها حطي الجلسرين مع الليمون

وبعدها حطي النايلون حق الاكل غطي المنطقه كلها الين ما تحسين ان عرقتي بعدها

اخذي الليفه واقعدي فركي وراح تشوفين الفرق من اول تجربه

وبصراحه عليها اسلوب يجنن بالاقناع

وانا اقولها لكم بكل ما املك من جرأه

اتقي الله يا اختي ما يهمني لو دخلتي وجرحتيني بكلامك

المهم ان اوصل رساله للبنات

يا خواتي قمت اعاني معاناه ما يعلمها الا الله

حسيت بعدها بكم يوم بحكه شديده بنفس المنطقه الي طبقت عليها كلام الاخت

وزي الحبوب تطلع ولا تختفي مده كذا بكم يوم قمت والله اني اشك قلت يمكن من الفراش

وقمت ادور على الحشرات تحت فراشي ونقله زوجي للحوش عشان يصيده الشمس


مع ان فراشي ما صار له اربع شهور شاريته ولا عمري حتى عانيت من البق الحمدلله رب العالمين

البيت دايما يتعرض للتهويه والشمس


قلت يمكن من الزرع خصتا ان الحساسيه زادت الين اصابع الرجل

حبوب كأنه قرص

قمت ما اطلع اسقي الزرع بالحوش ابد

وما اعرض نفسي لحرارة الجو ابد

الين ما تعبت قلت لزوجي خلاص خذني لاخصائيه جلديه

اشوف وش بلاني اساسا ما جه ببالي ان من الخلطه

الين ما صدمني الدكتور قال استخدمتي وشو للمنطقه هذي

وتذكرت الخلطه وقلتها له قال

هذي الخلطات الي تبلشون نفسكم فيها انتوا الحريم لو ترحمون نفسكم منها كان انتوا بخير


قال لي تدرين لو كل وحده تجي تاخذ لها كريم طبي افضل لها من هالخلطات الطبيعيه والكميكل الي انتوا تخلطونه

وتتفننون فيه براحتكم ...

قال لي يا اختي حتى الاشياء الطبيعيه الي زي الخميره والروب والعسل لو خلطتيه راح يعطيك تفاعل سلبي

فما بالك الخلط بين الكريمات والاشياء الطبيعيه مثل الليمون والسكر والملح والخميره ....


ولا بعد انصدم لما قلت له اني غطيت روحي بالنايلون احس ان الدكتور اشوي ويطلع من طوره

قام قالي بعطيك كريمات للحساسيه الي فيك


وبعدها ابعطيك كريم راح يعجبك بالنسبه لتفتيح اللون بدل الخلطات

وفعلا يا خواتي شهر كامل وانا استخدم كريمات الحساسيه والله اني تعبت

حتى مع العلاج احس بحكه خصتا وقت ما اتسبح ويدفى جسمي والله وصلت لمرحله كرهت

نفسي اشوي وودي اقطع بجلدي من الحكه

ومع الكريمات صار يطلع زي الفقاعات خارج الجلد اتصلت على الدكتور قالي هذا هو

الوصخ الي انتي دخلتيه بجلدك وقت ما سويتي الخلطه و شفطها الجلد لداخل


وبعدها اشوي اشوي تحسنت حالتي والحمد لله رب العالمين

فأرجوكم يا خواتي لا تستخدمون اي شي من الخلطات حتى لو طبيعيه

والله زوجي يقول لي لو اصرب فلوس على كريمات موثوقه من اخصائي جلديه

ولا انك تسوين هالشي مره ثانيه


الآن حتى القناع الزبادي حارمني منه من كثر ما عانى من شكواي كل ليله ...


ان شاء الله اني قدرت انصح احد بتجربتي

ونطلبكم الدعاء يا اخواتي ان الله يرزقني ما اتمناه ان شاء الله ..