تجربتي وبصدق ..

السلام عليكم ورحمة الله وبركاته..
كنت ناويه مانزل تجربتي الا بعد وصولي للهدف
بس بصراحه حبيت أفيد أخواتي في الله عل وعسى أحد يستفيد ويدعوا لأولادي بالصحه والعافيه
أخواتي أنا ماكنت عارفه أبدا إني دووووووووبه حتى جا هذاك اليوم وسافرت بالطايره وأول ماجلست عالكرسب وتقول المضيفه صكوا الحزام وأحوال اصك ولا بغى يتصكر
وجنب زوجي إنجليزي شايب متييييييين وصك الحزام بكل سهوله .. آآه يالقهر
وكنت أيامها أعاني من وجع الظهر لما أقوم من النوم ماقدر أتحرك على طول لازم انتظر ساعه أو أكثر وأنا ملزقه ظهري فكرسي حتى يهدا
وعرفت سر الوجع ..! ماغيره الوزن
ووزنت وطلعت 110 وخذيت قرار اني اول ما اوصل بلادي ابدا الريجيم
وفعلا بديت اول خطوه واهم خطوه الميزان الالكتروني عشان يوميا تراقبي الوزن
ولفيت عالمنتديات وشفت تجارب مني مناك وفي النهايه توصلت
1-ان الشاي الاخضر آساسي وكل ماكان معاه اضافات مثل.. الزنجبيل الطازج والنعناع والكمون والشمر والينسون والزعتر .. كل ماكان أفضل..
وتوصلت ..
2-إن الكيوي والاناناس يسدوا الجوع ويحرقوا الشحم
بعد اللي وصلت له بديت الريجيم في البدايه مشيت على ريجيم التخفيف بس الوزن ماعطاني نتيجه مريحه ..اوووووووه هذي 110 لازم ريجيم قوي وكل كم يوم أجرب ريجيم
جربت ريجيم اللبن والتمر ومالي يومين الا وانا منهاره ورجعت آكل الاخضر واليابس
وجربت دشتي وشفت الموت فعلا كنت بين الحياه والموت جاني هبوط ووجع في الرجول والله عبالي الروح بتطلع ونفس الشي طلعت منه اكثر شراهه
وأخيرا وبعد كل هالتجارب استقريت على ..ريجيمي المريح..
اول ما أصحى احط شاي اخضر واقطع زنجبيل ونعناع واحيانا اضيف كمون وينسون وشمر وزعتر -على حسب الموجود بس اهم شي الشاي التخضر - ماركة تونجنز اللي فعلبة حديد- ونعناع اشتريه من العطار او -ماركة رويال -وزنجبيل طازج هالثلاثه اساسي
احطهم كلهم في ترمس- ماعرف في السعوديه اذا لها اسم ثاني هذي اللي يحطون فيها الشاي-
وأكب عليهم ماي مغلي
خلصنا من شاي الاعشاب .. احيانا أسوي عصير عباره عن تفاح اخضر وكيوي وشرايح اناناس طازج وليمونه بقشرها.. لاحد يسالني عن المقادير لانه حسب الموجود احيان من حبه حبه اواكثر
الحين نجي للوجبه وهي عباره كيويتين وشريحتين او ثلاث اناناس طازج وسندوتش مكون من خبزتين توست اسمر محمص وعلية تونه مع ملعقة مايونيز لايت مع اوراق ملفوف وخس وفجل - حسب الموجود- وأحيان بدون الاوراق
نظامي اول ماصحى اكل 7 تمرات ولتر ماي وبعده بساعه تقريبا اشرب كاسة عصير او اكل كيوي واناناس بس وطول اليوم شغاله على الماي وشاي الاعشاب والعصير
والوجبه موعدها العصر واشرب معاها كاسة عصير برتقال المراعي والكيوي والاناناس اكلهم قبل وبعد السندوتش يعني كيويه واناناس قبل وكيويه واناناس بعد.. واحيانا لوجعت مرررره اخذ لي كيويه وكم شريحة اناناس وماكثر..
وبعد الساعه 6 ممنوع منعا باتا اي اكل بس ماي وشاي اأعشاب
واحاول اسوي اي رياضه نص ساعه او اكثر مشي او رقص او اي شي
والحمد الله حاليا وزني 87 والشكل كاني خاسه أكثر حتى عالعيد الكل تفاجأ الحمد والشكر لله وحده لاشريك له
وعل فكره احيان وااااجد اخبص بالاسابيع بس اكتشفت ان الوزن اللي يكتسب بالتخبيص ينزل بسرعه اكثر - سبحان الله-
وفي مره كنت عند عطار الشفاء - اعتقد انه عطار مشهور ومنتشر فاكثر من دوله ومقره مصر-
كنت اشتري النعناع والشمر وو..
فسالني قال تسوين ريجيم قلت له إيه فعطاني علبه كبيره مكتوب عليها شاي الريجيم - ومكتوب - هذي الخلطه من الاعشاب يوصي باستخدامها الدكتور عبد الباسط السيد
وهوعباره عن اعشاب وطريقته يشرب منقوع معلقه قبل الوجبه بنص ساعه
فجربته كم شهر ومالاحظت تغيير في نزول الوزن او انه اسرع
بس لاحظت انه يشد الجسم ويخفف الكرش والله أعلم .. مش متاكده يمكن من الشاي الخضر واللي معاه او من الكيوي ماعرف انا حسيت الجسم انشد من اعشاب عبدالباسط السيد وخفت الكرش بشكل واضح..
والحين نازله عالتخبيص ومن بكره ناويه أبدأ إذا شاء الله وهدفي 75 بإذن الله
حاولت من قلبي اكتب لكم كل شي بالتفصيل عل وعسى أحد يستفيد ةيكسبنا أجر
ربي يوفقكم ويحقق مناكم
سامحوني اذا مارديت عالاسئله بسرعه لاني مادخل كثير ..
ونصيحه لوجه الله اللي تبي تنحف لا تاجل اكثر من كذا حرااام العمر يعدي واحنا مخنوقين فوسط هالشحوم..
اكتشفت ان لي رقبه وان لي ملامح مدفونه تحت الشحم وان الحياه حلوه بخفه واني اقدر أركض ..
كنت لما امشي شوي ألهث ولما أرقص شوي وأعرق وألهث وماقدر أواصل
الحين امشي وامشي وامشي ولا أتعب وأرقص لين تنهد رجولي ولا أتعب .. خساره العمر اللي راح وانا بهذاك الجسم المتعب لا شكل ولا راحه نفسيه
لحقوا عماركم الحياه احلى واجمل مليون مره وانتي رشيقه
وبالتوفيق للجميع وسامحوني عالقصور .
على فكره هالريجيم ينزلك يوميا تقريبا نص كيلو او اكثر شوي وكل مابذلتي مجهود كل مانزلتي اكثر.