غَيَمَ☁️ @ghym_15

عضوة فعالة

تجربت تسقيطي في مستشفى المانع . . .ارجو الافادة

السلام عليكم ورحمة الله وبركاتة

اخواتي بنات حواء كيفكم اتمنى انكم بصحة وعافية :). . . بناات انا راح اقلكم تجربتي واللي صار لها مثلي او تعرف حد صار له مثلي يا ليت تفيديني بشي . . . انا تزوجت ولله الحمد بعد زواجي علطول حملت ولله الحمد يعني ما كان في تاخيرر بالحمل ولا شي . . . المهم كان حملي اوكي وكنت متابعة مع الدكتورة اول باول يعني ابد ما فووت ولا مووعد وكانت كل الفحوصات ولله الحمد سليمة . . .

يوم وصلت للشهر الخامس يعني في الاسبوع 21 كنت اذا اشتغلت بالبيت وتعبت اشوي ينزل عليه مويه ما تكررت كثير تقريبا مرتين وما عاد جت ولكن مشكلتي قلت انها افرازات عااديه لانه ابلشتني الدكتوره منال كل ما سالتها عن شي تقول عادي طبيعي طبيعي افرازات طبيعيه :09: المهم طنشت الموضوع وخلاص ما عاد نزل علي شي بعدها بخمس ايام جاتني اوجاع ببطني مره قوية استمرت تقريبا ساعيتن وهدت اليوم اللي بعده نزل علي خيوط دم المهم علطول رحنا الطواري واستقبلونا وفحصوو سونار وقالو لي ما فيك شي هذا الجنين بعد ما شاء الله عليه نشيط في الحركة . .

بس للاسف كانت دكتورة ما عندها رحمة وتوها جديده قالت لازم افحص من اسفل عشان اتاكد ان الرحم مسكرر طبعا انا عييت بس زوجي حاول فيني واقنعي صراحة وجعتني :icon33: الله يسامحهاا وقالت الرحم مفتوح لازم اسوي له ربط وعلطول سالت انتو تامين والا كاش واضح عليها همتها فلوس العملية :mad:. . .

هنا زوجي قال لها لا وقفي اتصلو على الإستشاري محمود خلووه يجي دقو عليه وفعلا اجى بس ما خليته يفحص من اسفل . . فحص بس سونار وقال فعلا عنق الرحم مفتوح بس اللي جنني وشلون الدكتوره قبل اشوي فحصت بالسونار وتقول ما فيك شي و الدكتور خذا زوجي لبرا وكلمه وقال له عنق الرحم مفتوح :( وما نقدر نسوي شي لانها بالشهر الخامس وما ينفع نسوي ربط لانا لو حاولنا نسوي اي شي راح نسقط الجنين ولكن الله يعوضك خيرر وخلي زوجتك بالتنويم الين ربك يفرج عليها . . .

يعني الدكتوره الخبله اللي كانت تبي تسوي ربط ما تدري وش السالفة . . .طبعا انا رفضت اتنوم وزوجي بعد ما كان مقتنع في كلامهم المتناقض شك فيهم صراحه فاخذني ورحنا لمستشفى النساء والولاده بالحسا ودخلت الطوراي وعلطول دخولني على الدكتورة فحصت سونار وقالت لي مو مبين شي وقلت لها اني كنت في مستشفى خاص وبهذلوني قلت لها على القصه قعدت تتكلم عليهم وتقول لي لا ما عليك منهم وعطني حبوب ديفستون مثبته للحمل تقول استخدميها وارتاحي وان شاء الله ما فيك الا العافية صرراحة تتطمنت وزوجي بعد تتطمن ورحنا للبيت بس للاسف ما قدرت انام من الاوجاع ونزل علي دم بعد والساعة 7 الصباح رجعنا للطواري مستشفى المانع لانا مسجلين فيه عشان التامين برضوه فحوصات وقالوو لازم تنويم عاد وش اسوي لو على كيفي ما تنومت دخلتت التنويم وفحوصات وسونار مع المختصه وقالت فعلا عنق الرحم مفتووح ولكن خليك بالتنويم الين نشوف حالتك تتحسن او نشوف حل قعدت بالتنويم 5 ايام وكان ينزل علي دم مررررره كثيرر كنه نزيف طبعا اجتمعو كذا استشاري بالمستشفى ونادو زوجي وقالو له راح نسوي عمليه ربط واحتمال تنجح واحتمال تفشل وبكذا راح نسقط الجنين اذا انت موافق وقع لنا صراحة كان مره متردد ولكن بعد الاستخاره والاستشارة رفض العمليه وقال نخليها على الله اذ لنا فيه نصيب راح ناخذه . . .

يوم الاربعاء الدكتوره سوت طلب تحويل لمستشفى ارامكو الظهران يعني كانو يوم السبت راح ينقلوووني ولكن ولله الحمد يوم الخميس الساعه 3 الفجرر تعبت مرررره وجاتني الام كسررت الاشياء اللي حولي الله لا يوريكم سويت بلاوي ويارب لك الحمد على كل حاال سقطت :44: . . . . سقطت في 10/3/2011 صراحة تعبت نفسيا ولكن الحمدلله على كل حاال . . . ويا جعله شفيع لنا يوم القيامه . . .

الى الان صار لي تقريبااا 4 شهوو الثلاثة الشهور الاولى انا كنت ما ابي احمل وما استخدمت اي موانع استخدمت العزل . . . في الشهر الرابع اللي هو هذا الشهرر كان ودي احمل وتاخرت على الدورة 5 ايام وكنت مأمله اني حامل لاني دورتي منتظمه ولكن يارب لك الحمد دورتي نزلت وما كان في حمل . . .

اولا اسفة على الاطالة بسررد قصتي ولكن للفائده . . . هذا شي مقدر ومكتوب ولكن غلطتي ان خليت الدكتوره تفحص من اسفل لاني اكتشفت بعدين انها تقدر تعرف عن طريق السونار اذا هو مقتوح او لا فنصيحة لجميع الاخوات لا تخلي احد يفحصك من اسفل الا اذا كان في ولادة . . .

وفي شي بعد يوم رحت عند عمتي ام زوجي قالت لي في ممرخة مشهورة ويمدحونها خلينا نوديك لها تشوف وش عندك الصراحة ما كنت مقتنعه بس ما حبيت اكسر بخاطرها وقلت خلنيني اجرب ما ني خسرانه شي رحت عند الممرخة عجووز رايحه فيها صراحه تخووف مدري كيف مرختني اشوي وقالت لي عندك اكياس ع المبايض وياالله وجعتني بغت تفقع بطني صراحة ما صدقت كلامها يعني بالله لا عندها شهادة ولا سونار ولا اي شي من هالتقنيه وش عرفهاا معاد كملت معاها . . .

اللي ابي اعرف يا اخوات هل في حد صار معاه مثلي وفعلا صار معاها اكياس على المبايض؟ . . وبعد ابي اعرف وش سبب اني ما حملت هالشهر تتوقعون في شي احتاج افحص ؟ . .

واخيرا :26:

انا ان شاء الله اذا حملت قالو لي لازم نسوي لك ربط المشكله اللي بيسوي الربط الاستشاري لانه هو افضل واحد في المستشفى يسويها اسمه محمود عبدالبصير في مستشفى المانع الاحساء صراحة متردده عشانه رجال وبعد زوجي محتار بين نارين ما يبي الدكتور لانه رجال وما في غيره في دكتوره اسمها منال اللي كنت اتابع معاها بس صراحه محد يمدحها اللي جرب ياليت يقول لي وعطوني رايكم . .

10K

يلزم عليك تسجيل الدخول أولًا لكتابة تعليق.

تسجيل دخول

أم حسام القمور • 13 سنة

حبيبتي الحمدلله كل كل شيئ والله يعوضك
قصتك مثل معاناتي ببكري بالتمام اللهم انا بالشهر السادس ولدت وجبت ولدت وتوفى نس ما سسسوا فيك لما انتهيت ورحت اراجع عند دكتورتي قالت ان كل البكريات يكون اول واحد ويكونون يوسوسون كثير فمن جهتنا لازم نطمنها مو نخوفها
المهم يا قلبي حملت بعدها على طول سويت ربط اخر الثالث عشان ما تنعاد المأساه والحمدلله جبت بنت واللحين حامل ومقرره ربط طبعا بخاص بسويه لان الحكومي والعسكري ما يسووون الربط لين يطفشونك والا تسقطين ما بعد سووه لك المهم نصيحه اول ما تحملين سووي ربط في خاص وبعدين راجعي بحكومي ولما تقربين تولدين فكيه بالخاص وانتي براحتك تبغين تجلسين تولدين عندهم والا تروحي حكومي المهم تسوين اللي يريحك والله يعوضك بغير اللي فقدتيه والله الى اللحين ما نسيت معاناتي والابر والكشف فيه بس الحمدلله كل شيئ بأجره

اما بالحمل جربي خذي كلوميد حبه وجده بثالث يوم من الدوره لمده 5 ايام وان شاء الله تحملي جربيها الشهر الجاي وشوفي والله يفرح قلبك عاجلا غير آجل

غَيَمَ☁️ • 13 سنة

مشكوورة اختي ام دانة والله يجزيك الفردوس الاعلى والله يعوضك خيرر فيما فقدتي ويجعله شفيع لكما يوم القيامة . . . اختي عندي كذا استفسار منك لو سمحتي كيف كان معاك الربط تعبتي يوم العمليه وبعد العمليه ويوم فك العملية خصوصا ان الفك بدون تخديرر . . . كيف كانت حياتك كنتي تمارسينها عادي والا لا لانهم قالو لي تبقين نايمه على ظهرك ولا تتحركين كثيرر فما ادري كيف كانت تجربتك . . . ومشكورة اختي . .

*ام خالد* • 13 سنة

هلا فيك اختي الحساسه الحمد الله على سلامتك وربي يعوضك خير ان شاء الله...
بالنسبه للكشف من تحت هذا شي عاادي انا سويته بالشهر الرابع ...بسبب كانت عندي الام فضيعه اسفل البطن..
وطلبت الدكتوره تسوي لي كشف من اسفل بالسونار....
وشافت ان الرحم مسكر ومافي خوف ...بس طلبت مني الراحه ..وكتبت لي دوفستون...
يمكن اللي صار معاك ان الرحم مفتوح وعشان نزل معاك دم طلبت الكشف من تحت عشان تتاكد من اذا الرحم مسكر اولا..
لو سويتي ربط مثل ماقالت الدكنوره يمكن افضل لك... بس قدر الله وماشاء فعل...
وبالنسبه للمستشفى الولاده والاطفال كيف تقول مو مبين شي معها...وانتي فيك الالام...ماعندهم سالفه...
لكن الحمد الله على كل حال....
الله يعوضك بالحمل السليم عاجلا يارب..

وردة بوك • 13 سنة

الله يعوضك خير وشدي حيلك الشهر القادم وربي بيعوضك خير بإذن الله أنتي وكل وحده محرومه من الخلفه

ويرزقك أخوي الذَكر الصالح له تقريباً10 سنوات ولم يرزق بشيء لأن عنده ضعف في الحيونات المنوية
اللهم آمين

غَيَمَ☁️ • 13 سنة

أم خالد انتي موو فاهمة الموضوع بالضبط انا كان الكيس نازل اشوي يعني لازم اول شي يحالو يدفونه داخل وبعدين يسوون ربط وعاد انتي عارفه الكيس مره ظعيف ما راح يتحمل راح ينفقع واذا انفقع يعني خلاص لازم اسقط هي مو فاهمة الدكتورة يوم جا الاستشاري هو رفض الربط يقولو ما نقدر نسوي شي لو حاولنا نسوي ربط راح نسقطها قبل موعده الربط يكون بنهاية الشهرر الثالث . . . . الله يجزيك الفرودوس الاعلى مشكووره اختي . . .

وردة بوك مشكووره حبيبتي على مرورك ودعوواتك والله يرزق اخوك ان شاء الله الولد الصالح . . . ويرزق جميع المحرومين . . .