تجربه الحج.......الله يوفقها اللي تساعدني...

اختي الغاليه
يكفيك انك نويتي الحج هذه فرحه لاتعادلها فرحه
الشي الثاني والله الحج سهل جدا
فقط اختاري حمله مشهود لها
بتوفير الوجبات والمواصلااااااااااااات اهم شي
وابناءك استودعيهم الله عند من تثقين فيهم
وسبحان الله اول متصلين مكه بترتاح نفسيتك وتنشغلين بالحج ولاتفكرين باي شي ثاني
اهم حاجه اوصيك فيها من الان اقرئي عن الحج
واذا تيسرت امورك وصلت مكه اجتهدي بقراءة القران وصلاة الضحى والليل
واياك اختي وضياع وقتك في ما لا ينفع
والله ستعضي اصابع الندم على كل لحظه ضاعت منك ولم تستغليها في طاعة الله والدعاء

وبالتوفيق اختي

الله يحقق لك امنيتك

احسك ريحتي نفسيتي شوي بترك عيالي

يقولون الاكل غير متوفر هناك؟ هل هذا صحيح وش اسوي انا؟



استغربت هالسؤال

كل شيء متوفر اختي ولله الحمد اكثر مابه اكلهم 24 ساعه طبعا تبع الحمله


انا حجيت العام والله يتقبل منا ومنكم كل شي ميسر ما تعبنا الا النظام الجديد وهو منع المواصلات في منى ومعهم حق الازدحام كان رهيب راح تاخذينها مشي من منى حتى النفق وبعدين تلقين المواصلات


والله ييسر لك

العيال وكلي امرهم لله وخليهم عند اهلك وبيحفظهم ربي لك سبحان الله اذا قرب الحج يقوى قلبك

كلف الحج بس الحمله 6300


خذي معك مصحف والسواك وكتب دينيه خاصه بالحج ترجعين لها مع ان معك بالحمله داعيات راح يوجهونك ويجاوبون على اي استفسار لاتنسين مقص الاظافر ومقص الشعر بنادول خافض الحراره مانع الدوره الملابس تكون صيفيه وقطنيه افضل


احب انبهك اذا احد منكم يشتكى من انخفاض السكر او الضغط انتبهي تنسين تاخذين حلوى مص يكون ملازم لك في الشنطه لانه مرت علينا مواقف مايعلمها الا الله في النقل كثرت علينا حالات الاغماء بسبب طول المسافه والانتظار المطول خاصه قبل دخول مكه

بتوفيق يالغلا ان شاء الله اكون افدتك

الله ييسر لك حجتك...أنا حجيت السنه اللي فاتت وكان عن طريق حمله وهي تكون متكفله بالاقامه والأكل(لا تحاتين) الحج كان ولله الحمد ميسر بشكل ماتتصورينه وكنت قبل أحاتي الرجم بس كان من أسهل المناسك ولله الحمد بعد التوسعه خلوه ثلاث طوابق...الصعوبه راح تكون في الطواف عشان الزحمه وفي التنقل لأن الشوارع مزحومه للآخر أذكر العام الماضي لما طلعنا من مكه الى عرفات أخذنا تقريبا ست ساعات في الباص!!!
راح تحتاجين جلابيات واسعه وخفيفه لأن الدنيا حر ,,ملابس داخليه اللي تستعمل مره وحده وترمى اللي تباع في الصيدليات عشان ماتقعدين تغسلين كل شوي,,,,صابون وشامبو غير معطر يباع في الصيدليات وممكن تستعملين صابون الغار وسدر بس عموما وقت الاحرام قصير يعني أول ماتحلون احرامكم تقدرون تستعملون الصابون والشامبو العادي,,,مزيل العرق,,,,مصحف(مهم) ,,,وكتب الأدعيه راح تتوزع عليكم من الحمله,,,فرش أسنان ومعجون,,,فرشاة شعر واستشوار(ضروري)للتجفيف,أنا لما رحت ما أخذت استشوار وصرت أدور عالغرف والحريم يدورون مثلي نبي استشوار سلف عشان التجفيف لأنك تسبحين وتجين للغرفه مكيفه وتبين تنامين ماتعرفين!
ملابس مرتبه للعيد ومكياج بسيط عشان تحسين بالعيد لأن كل الحريم يتزينون يوم العيد بما فيهم مسؤولات الحمله,,,عباتين يكون قماشهم خفيف ومايكونون طوال عشان ماتنحاسين بالطواف,,, شاحن الجوال ومممممممم اذا ذكرت شي رجعت الله ييسر أمركم ولا تضيعين وقت في الحج احرصي على الدعاء وختم القرآن...بالتوفيق

الله ييسرلك حجك انا حجيت قبل اربع سنوات .... وطبعا كنت اسال كثير عن الرمي والطواف وغيره ولكن سبحان الله اللي يروح مو مثل اللي يسمع
في الحج روحانيه رائعة وخصوصا يوم عرفه كان من اجمل الايام كل شخص مشغول بنفسه اللي يقرا واللي يصلي واللي يدعي .....................يالله نفسي احج مرة ثانيه
بالنسبة للاكل متوفر سواء مع حمله او بدون اهل الخير كثير
لا تنسينا من دعواتك