:بسم الله الرحمن الرحيم
اليوم حبيت اكتب في هذا الموضوع
بياختنا
وتجاربنا ايام الطفوله
طبعاً فيه اشياء مشتركه
يعني اغلب الذكور مسوينها
وادخل بالموضوع على طول
تشغيلة الموتر:
طبعاً انا كأي طفل وده يجرب السواقه
وده يودي اهله ويجيبهم
وكنت اذا لعبت مع اخواتي حريم ما العب معهم الا سواق
ولا ولد جيرانهم المضطهد(سيتم ذكر ذالك فيما بعد)
المهم الوالد شافني متعلق بهالموضوع
فحب يفرحني ذاك اليوم
قالي وش رايك تشغل السياره
طبعاً انا مو فرحت بغيت انهبل من الفرحه
تخيلو بشغل السياره
عطاني المفتاح وهو جمبي
قال دق سلف يا بعدي
ياويليه على ذاك الشعور
كني مدمن ما تعاطى من أسبوع
ومن ذاك اليوم ما يروح ابوي لمشوار الا وانا مشغل له الموتر
ويجي ذاك اليوم اللي تصفقت فيه تصفق
كنا مسافرين لأحد القرى وساكنين عند قرايبنا
وكان قريبنا ذا خربانه سيارته وقال لابوي باخذ سيارتك بمر الورشه بشيك على موتري
طبعاً خوينا ذا معه (ددسن) وجلنطه خربان
فهو متعود اذا جاء يوقف السياره يحطه بالثاني
رجع خوينا ذا من مشواره
وقف الموتر وحطه بالثاني
وبعد مرور وقتن كثير
قالو اهلي نبي نروح للسوق
انا ما صدقت خبر بروح اشغل الموتر واتميلح قدام عيال
هاللي رايحين عندهم
رحت لأبوي وانا كلي ثقه
قلتت عطني مفتاح الموتر
قال سم
ركبو اهلي
استلملت مقعد القياده
دخلت المفتاح بكبر
وادق سلف!!
بدا الموتر ينتع
وامي صفقت في الطبلون ستطعشر الف مره
وانا من الخوف ما وخرت يدي
اخر شي فكيت يدي
الا والموتر موقف عند المسجد في اخر الشارع
اول ما وقف الموتر التفت على امي
طاح نقابه
وجبهتها محمره ورامه
طكتني بمخمس
ضيعت علومي
طلع ابوي وشاف الموتر بعيد
طبعاً ما لزخني
وبعد هالحادثه الخايسه
ما دقيت سلف الا بعد 5 سنين
ما يستفاد:مهما تعود ولدك على شي
لاتخليه يفله عشان ما يجيب العيد مثلي
التدخين:
طبعأ هذي السالفه كل ما ذكرتها فطست ضحك
.
.
.
كنا كل اربعا نروح لقرايبنا
وكان مجموعنا حنا يالذكور ( توني اعرف هالكلمه)
4
وطبعاً من زود الفضاوه
والطفره(حطو تحت ذي خمسين خط )
مافيه شي نسويه
مره نشتري ولاعه وما فيه شي ما نشبه
ومره نشتري كورة بلاستيك بريالين(اهم شي الوزنية وما تكون مايلة)
وكل واحد لازم يقط
حتى البنات
لازم يقطون
وأبيخ شي اذا تسطحت ولا اذا طلع احد هالشياب وشقها
ومره نشطف ابو ريالين ونشتري حق الريحه (من زود الفضاوه
)وكل هاذا وحنا طفارى
جاء ذاك اليوم اللي ملينا من هالروتين الممل
وجانى رفيق السوى بفكره عن طريق الأستهبال
كان ماسك ورقه وملفلفها وكنه يدخن
عاد دخلت مزاجنا هالفكره والعياذ بالله
ليش ما نجرب ندخن!
وبعد المشاور والتفكير الطويل
رحنا لأخر الحاره
وقعدنا ندور زقاير
ولقينا وحده منعفصه رايحه في رجلها ما بقى فيها الا القطنه
وناخذها ونروح لأقرب شجره
ويشبها كبيرنا
ويشفط ذيك الشفطه وكلنا نراقبه(كننا نتفرج على فلم)
ويطلع الدخان
وحنا مسبوهين
وكلن يحتري دوره
ويجي دوري عقبه
واقولهم انتبهو لحد يشوفنا
قالي صاحب الخبره اللي قبلي
لاتشفطه لصدرك مثلي
عشان ما تدمن ههههههالمهم سمعت النصيحه
وأشفط بخشتي بس وأطلعه
وهاكذا حتى جربناها كلنا
طبعاً اللحين ريحتنا دخان والبيت مليان رجال يعني بننقفط
وش نسوي ياولد
قال الكبير اللي معنا
نفرش اسناننا ونتعطر
دخلنا للبيت هوا
وعلى طول للحمام اللي فوق
الكبير معه فرشة أسنان
بس حنا بأطابعنا
يوم خلصنا تعطرنا ونزلنا
قال هالكبير وراى ما تنامون عندي
قلناوالله ما نضن امهاتنا يوافقون
قال حاولو
وننشب بامهاتنا
لين وافقو
ونمنا عنده
طبعن متعه ما توصف انك تنوم عندهم
ابو الفلهجاء الصبح وقمنا
وقعد الكبير ومسوي مصدع
يا ولد وش فيك
قال مدري بس شكلي ادمنت (تباً لك يا شيخ ادمنت من زقاره مخلصه)
قلنا وش تحس به
قال احس اني خرمان ومصدع
وقعدنا نوسوس
ياولد كني مصدع
لين لعبنا على انفسنا
وش السوات اللحين
قال الكبير مالها الا الشاهي هو اللي بيفك الخرمه(والله ياهو لاعبن علينا)
ويصلح لكل واحد كوب
ونشرب ونشرب
بعد ما افطرنا بيض
طلعنا ندور في الحاره
ولقنا بكت في 3 زقاير
قال الكبير انا ما بعد انخرمت باخذ لي زقاره
قلناله ماله داعي تدمن
قال معد اقدر اتحمل
احس ان راسي بينفجر
قال واحد وانا بعد احس راسي بينفجر
قلت الحق على الزقاره الاخيره قبل ما ينخرم عليها الرابع وقلت انا بعد
قال الثاني للرابع ابقيلك نصفها
ويشبها لنا خوينا الكبير
ونشفط ونشفط
وكل ما مر موتر وطيناها
ونعود ونشبها
لين راحت كلاملحها
يوم ما بقى الا اخر الزقاره يجينا واحد مدرعم بموتره من اول الشارع
صار اخو خوينا الكبير
طبعن ذبينا الزقاير ووطيناها
بس المكان ريحته تتن
والله يا وجيهنا صغرت معد ندري وش نسوي
قام الكبير قال لحد يتكلم عشان ما يشم شي وغير مكانكم
طلعنا من تحت الشجره ورحنا للجه الثانيه كننا نتلاحق
وقف جمبنا اخوه
قال وش عندكم
قال خوينا الكبير
فاضين وندور
قالم اركبو اوصلكم للبيت
قال الكبير لا ودنا ناخذ لنا لفتين ونرجع
قال بصركم
طبعنا من عقبها وان ماشبيت زقاره ابد (صرت رجال)
وصار خوينا الكبير راعي سوابق وعنده خبره ابن اللذين
ما يستفاد:مهما كان الصغير بريء وحبيب
له نقاط سودا في حياته حاول انك تعرفها قبل ما ينفلت
نلعب حريم:icon28::
طبعاً هذي اللعبة اشك ان فيه احد ما قد لعبها
بالنسبة لي كان دوري سواقهم في هذه اللعبه
وسبب اختياري لهذا الدور كانت امنيتي اسوق
وثانياً دايم علي الكاميره (لأن الحريم راعين سعسعه)
المهم
كنت اتمتع بها اللعبه
وكان لي بنت خاله قلق
اذا جت خربت جوي
كانت تكرهني وما ادري وش السبب
وكانت اكبرنا
فكانت هي اللي تحدد الأدوار
وكان دوري كل ما جت ولد جيرانهم البثر
وكان دوري في اللعبه
ما يتعدى 3 دقايق اتبيثر على عيالها
وتجي هي وتصفقني
وفي الأخير تطلق علي بالمسدس وأموت ويسجنونها(كمل بعد )
المهم انا مليت روتينها ممل
كل يوم نفس القصه
واذا جت تحرمني من اغلى شي السواقه
المهم صار هذا دوري
وانا منقهر
وضايق صدري
ودايم تجي وتصفقني وتذبحني
لين الجاء الوقت اللي طلعت اللي بقلبي(واتقي شر الحليم إذا غضب)
وبنفس الدور وجاء الوقت اللي خلصت مصفقتني وبتذبحني
طلقت علي وانا ما طحت
قالت لي وهي معصبه
طح ذبحتك
قلت لا انا الرجل الحديدي ما اموت
قالت طح ولا طلعناك من اللعبه
طبعاً في هاللحظه سويت نفسي الرجل الحديدي اللي ما يظره شي
وعشان ما يحسون اللي قاعدين يلعبون معنا اني ما خربتها
بسرعة رحت لبنت خالتي هذي
وامحط فيها وأمحط فيها وأبقسها (على اني الرجل الحديدي)
وهي تزاعق وتستنجد وما حولك احد
اللي يلعبون جايزلهم التمثيل كنه صدقي
وبعد ما طلعت حرتي ونتفت شعر راسها
وقامت تصيح
حسيت ان الوضع بدا يصعب
خلاص اللحين طلعت اللي بحرتي
قلت بطلت
وهي الفخته
ومن ذاك الليوم معد لعبوني معهم حريم
يخاوفنا اتهيظ واصير الرجل الحديدي
ما يستفاد:إذا غلطت على احد وسكت عنك لا تتمادى مره ثانيه
عشان ما يقلب عليك ويصير الرجل الحديدي
شطحه
أخوي الفاغر:
عندي اخو اصغر مني
بس بالفهاوه سعة الصدر يعطيك
المهم قبل فتره جته حاله
كل ما نام يحلم حلوم تخوف
ويقوم يصيح
وأستمرت معه الحاله
لين قالت جدتي ورى ما تقرون عليه
المهم قعدنا نسأل ونسأل
لين لقت امي وحده تقرى ويمدحونها الناس
قالت لي ورا ماتروح تشوف بكم تقرى على اخوك
قلت ابشري المهم قلت لأخوي قم معي بنروح
قال وين قلت بوديك لوحده تقرى عليك(طبعاً هو خواف ياخف اوديه للمستشفى)
طبعاً ابيه ياخذ على الجو عشان اذا وديته هو وأمي ما يغثها بالصياح
قال وشلون تقرى
قلت اقول لا يكثر وأمش معي
المهم رحنا لبيت هالحرمه ولقيت عند الباب زحمه
ولقيت رجال قاعد عند الباب
رحت لمه انا وأخوي
قال مايدخل الا الحريم والبزور
قلت ادري بس جاي اسألك
قال سم
قلت بكم تقرى هالمره
قال النفثه بـ70 ريال
قلت ومتى ينتهي دوامكم
قال من الظهر لين المغرب بس
قلت يعطيك العافيه
ركبت انا واخوي الموتر
سألني :
وش النفذه اللي بـ70
قلت مهيب نفذه
نفثه
قال وشي طيب
(طبعن توهقت مدري وش التعبير الأنسب)
قلت :تطلع هوا وكنها تتفل
قال وشلون
ومثلتله
قال يعععععع يعني تتفل
قلت لا يكثر بس بكره بجيبك انت وأمي وبنخليها تتفل عليك
قال نعم !
والله ما اروح
رجعت للبيت وقال لأمي والله ما اروح
قالت انقلع بس ما علينا منك
وبعد شد وجذب وصياح وتسطير
تم الأتفاق بين امي واخوي
بأنها ما تنفث على وجهه وإذا طلعنا نشتريله حلاو
وديتهم اليوم الثاني
وقعدت احتريهم
يوم طلعو وأشوف اخوي الصغير مخنفر
دريت ان الأتفاق ما طبق
ركب هو وأمي
قلت هاه بشري قالت لا الحمدلله
ماقال شي رجال
قلت هاه وشلونك الحين
عطاني نظرات ولا رد
دريت انه معصب
رحت للبقاله ونزل وقام يشتري
وبعد ما وصلنا للبيت وزرط كل الحلاو
قال والله معد اروح
قالت امي اقول خلك رجال
قال:والله ما علي منكم والله ما اروح
قلت تونا شارينلك حلاو ولا قلت شي
قال:موديني لوحده تتفل في وجهي
قلت هذا نفث
قال الله ياخذك انت وياها
واللي علم امي عنها
قالت امي يالهيس اعقل
وصطرته على علباه
وقام يصيح
قالت امي والله ما علينا منك
مغير غاثني كل ليله تقوم وتصيح
منيب فاضيتلك
قال:طيب حرام عليكم يعني عشاني احلم
تودونني عند وحده تتفل والله مهوب على كيفي الحلم هو اللي يجيني ولا انا ما ابيه(يحسبنا مودينه عندها عشان تتفل عليه ويتادب فاهم الموضوع غلط )
قامت امي تضحك عليه
انهبل زود:قال ايه اضحكي بلاها ما تفلت في وجهك
انا مت من الضحك
قال:وانت وش يضحكك ايه بلاك ما شميت ريحت سعابيلها ههههههههههههه
طبعن بعد ما متنا من الضحك عليه
وضحنا له وش فكرت النفث وأنها تقرا قران وتنفث وان شاءالله انك بتطيب
وافق بس قال بلبس طاقيه وأنزل راسي خخخخ
واللحمد لله اللحين معد يحلم
The End
منقـــــــــــــــووووول
انا بنت والموضوع منقول بلاش اشاعات رجاء>>>تخاف بكره يقاطعونها خخخ