شعور عادي
اختي كن قويا

توكلي على الله و لاتوترين اعصابج عشان ما تتأثر بويضاتج
:

الله يرزقكم كل خير يارب

هاي تفاصيل تجربتي مع اطفال الانابيب واحب اقول حق كل وحده تأخرت في الحمل لاتيأس من رحمة الله ... وتاخد بالاسباب ...لانها كلها موفره عندنا من رب العالمين ...

واحبب انوه ان انا عندي : ضعف في التبويض ..


1-عطوني الابره التحضيريه==== المفروض يعطونها في اليوم الـ 20 من الدوره واسمها ( Decapeptyl )... وانا
لان دورتي مب منتظمه عطوني اياها في وقت عشوائي وصرفوا لي معاها دوفاستون عشان تنزل الدوره ... ومن ثاني يوم رحت لهم ...عشان ابدأ التنشيط .... لكنهم ردوني لان للحين مانزل دم عدل .. وبطانة الرحم كانت سميكه ... المهم انا بديت من الرابع ..

2-بديت التنشيط بأبر ( puregon ) بجرع مختلفه مره 150 ومره 100 لمدة 13 يوم تحت الجلد .. يعني في يدج من فوق .. ... والحمدلله ماشاء الله كان عندي 20 بويضه احجامهم زينه ( عشرين وثمانية عشر ) وبعدها بيوم عطوني ابره تفجيريه في العضل ..

3- في الفتره مابين الابره التفجيريه والعمليه( من يوم الاثنين الى الاربعا) .. طلبت مني الممرضه
* مايكون في اي اتصال بيني وبين زوجي ..
* اكثر من شرب الماي ...
* اصوم من يوم الثلاثاء الساعه 10 عن الاكل ومن الساعه 11 عن الشرب ...
*اجيهم بدري يوم الاربعا اللي هو يوم العمليه عشان يسوون لي كل الفحوصات الاعتياديه ( الوزن-الضغط-ويعطوني التخدير ..واهم شي عشان زوجي يروح يعطيهم العينه )
***طبعا ادا كان الزوج من الاول عينته فيها ضعف او لزوجه او او او ... مايخلونه هو يعطيهم ...!! لا ... هم يسحبونها بواسطة ابره من الخصيه .. بس الحمدلله زوجي سليم .. وهو عطاهم العينه بنفسه ...
*دخلوني غرفة التجهيز .... وحطولي ابرة التخدير في يدي ... ( تحت اصابعي بشوي ) وتموا يسألوني عن تاريخي المرضي ... هل كان عندي امراض من قبل و و و و ...
*ودوني لغرفة العمليات .. ومن هناك ... انا تميت اسولف معاهم ..وشكلي صجيتهم لاهم يوم شافوني مصحصه حطولي اكسجين .. ومن اول ماحطوه ... انا اختفيت هههههههه ... صرت مب معاهم .. وهم شافوا شغلهم ....
*طبعا من بعد ما خلصوا بساعتين تقريبا قمت من البنج .. مع شوية الام في بطني .. وتقلصات خفيفه ... وجابوا لي اكل لان جيتهم صايمه .... وبس ....
*قالوا لي انهم سحبوا (ثمان ) بويضات ... مادري ليش ماسحبوا الباقي وفكوني من شي اسمه تكيس ...!!
بس اكيد عندهم حكمه في هالشي ...!!! وقالوا لي اتصل فيهم بكره(الخميس) عشنان اسأل عن البويضات تلقحوا ولا لا ....
*+++++++
* المهم اتصلت فيهم اليوم الثاني الصبح وسألتهم قالوا لي اتلقحوا 4 من الثمانيه ...والحمدلله ....
وطبعا الباقيين تخلصوا منهم اكيد كانوا ضعاف او غير مناسبين للحمل ...
* وقالت لي اجي يوم الجمعه الصبح ارجعهم ... يوم رحت لهم . قالوا لي اشربي ماي قد ما تقدرين عشان يساعدنا نشوف الرحم بوضوح في التلفزيون وفعلا شربت لما قلت بس..... مع اني من النوع اللي اكره الماي عالريق بس قلت كله فداء في سبيل الوطن خخخ

.. دخلوني نفس غرفة العمليات اللي سحبت منها وحطولي مثل السناد حق رجلي الثنتين وفتحوا المهبل بحديده اعتقد يسمونها(بوزالبطه)و طبعا بدون بنج بس مافي الم ابدا ... الا ضغط المثانه من كثر الماي ... تحسين انج تبين تروحين الحمام ..وو سألأت الدكتو قلت له حط لي الاجنه الاربعه ... قالي ماينفع يمكن حملين بـ 4 توائم قلتله مافي مشاكل يادكتور ..قالي ...لا احسن بس ثنتين ... نخاف يصير لج تعب من الاربعه .. وتميت اترجى فيه ...قالي يا ماما انتي 20 سنه ووزنج ما يساعدج ماتقدرين تشلين 4 في بطنك ؟.امسكي الاثنين احسن من انج تخسرين الاربعه

..سكتني بصراحه ..خخخخ ؟؟
. وبس جاب مثل الانبوبه البلاستيك ودخلها في المهبل ومنها دخل البويضات ... وخلاني اشوفها يارب عقبال مانشوف البيبي وجنسه ونسمع دقات قلبه
والله ماتتصورون فرحتي بسم الله ماشاء الله وانا اشوف البويضات يدخلون للرحم زز ماتتصورون شلون صغاااااار وايد صغار سبحان الله .... شفتوا لون الفقاقيع في الماي صغيره ...!!! هالشكل البويضات ... سبحان الله...وبس بعدين طلعوني ... وقالوا لي خلج على ظهرج ساعتين .... عاد انا مصختها تميت ساعتين ونص خخخخ .. عقب رحت البيت بس ماجهدت نفسي ابدا ومن يوم الترجيع لين اليوم ماطلعت من البيت وما اطلع من الغرفه الا نادر عشان الحمام بس ... طبعا هاي اول يومين .. وتدريجيا بديت اروح المطبخ بس بدون ما اسوي شي ...وصلاتي وانا جالسه والله يغفر لنا يارب ويستجيب دعائنا ..
**نقطه ماقلتها ..الدكتور صرف لي تحاميل مثبته اسمها سايكلوجيست 400 مرتين يوميا ... وهي دورها مثل الدوفاستون تثبت الاجنه ووو تزيد سماكة بطانة الرحم .. ونصحني اشرب سوائل كثيره ماء او عصاير..واتنب الامساك والصراخ والجماع ووو الكحه والحركات المفاجئه ...
** وطبعا التحليل بيكون بعد اسبوعين من الترجيع انشالله .. والله يستر لان هالنقطه هي اصعب نقطه الله يثبتنا يارب ... ويثبت الاجنه في رحم كل محرومه يارب....
**في اليوم التاسع ماقدرت ..حسيت بلوعه وترجيع من اول ما اقوم الصبح ..قلت يمكن نفسيتي تعبانه او شي @!! استبعدت الحمل اصلا ماكنت ابي اتوهم اني حامل عشان ما انصدم صدمه قويه ... المهم طاف هاليوم ووو جا اليو ماللي بعده ماقدرت انام من الم بطني ..الم شديييييد مثل المغص اخر بطني ....قلت لاااا ما يصير خلني اكشف وخصوصا ان موعد دورتي المفروووض يكون مصادف لليوم العاشر من العمليه ...مع العلم انها غير منتظمه ... بس بعد تخيلتها منتطمه
*رحت التحليل وانا خايفه لا اتفشل من زوزجي وخصوصا اني قلتله احس اني حامل ..!! وهو يقولي انطري لين يوم التحليل الاصلي اللي هو اليوم الـ 14 لكن نااصريت ... ندمت شوي وانا في السياره من الخوف لكن ..
* رحت المختبر حللت .. وقالت لي بعد ساعه..انا في هالساعه كان قلبي يدق بسرعه ..رحنا البيت .. واول ماوصلت اتصلت على طول المختبر وكلمني الهندي : هاميل من غير شعور ههههههه مايديري يمكن اني مسويه انابيب وانتظر النتيجه هههه ...
* والحمدلله رب العالمين ززز قلت حق زوجي وفرحنا وصليت ركعتين شكر وللخين اقول الحمدلله على نعمتك يالله يارب لاتحرم احد هالفرحه ...








اسفه عالطواله ..واي استفسار عن العمليه انا حاضره ....

اختي منهو دكتوورج تكفييييييييييييييييييييييييييي يييييين
وكم عمليه انابيب عملتي من قبل ؟؟؟

انا من قطر سويتها عند د. شحاته في مستشفى حمد
وهاي اول مره اسويها
بس المره اللي راحت تعتبر مب مكتمله

*****

ياقلبي يعني ماكنتي تتحركين من مكانك ولا تشتغلين في البيت
ولااااا شي ...!!كنت حاطه كل شي عندي في الغرفه مقابل السرير...
التلفزيون والكمبيوتر وواير النت
ولا شي كان بعيد عني
حتى التحاميل ( عزكم الله) كانت جنبي
ما كنت اتحرك الا للحمام والصلاه وانا قاعده عشان اتجنب الحركات المفاجئه ...
للعلم انا عندي خدامه ..عشان جي ما احتجت انظف شي او اغسله
و حتى اني ولا مره طلعت من البيت خلال الـ 10 الايام الاولى الا عقب للتحليل وعلى طول رجعت البيت ومن عقبها صرت اطلع للمواعيد بس وروحتي ورجعتي من بيت اهلي اللي كنت انام عندهم بالاسبوع واسبوعين .. ...

*****

اشلون ماشاء الله عليك قدرتي تجلسين ساعتين ونص والمثانة عندك مليانه ،، انا افضي مثانتي قبل ما اروح لغرفة ارجاع الاجنه لكن المحلول الغذائي مايخلنيني لازم بعد ارجاع الاجنه اروح الحمام وانتوا بكرامة .مايرضون لي اتحرك يجيبون لي شي اتبول فية لكن ما اقدر وانا منسدحه لازم الحمام
انا يوم امتلت عندي المثانه وقف الهوا عندي ولا رضيت يجيبون لي شي اتبول فيه فشييله
وحتى يوم تحركت ندمت وااايد لاني خفت العمليه تفشل وخاصه عقب ما سمعت ان الاجنه تثبت في اول 4 ساعات
بس انا كانت حريصه اني ما اتحرك بقوه او امشي بسرعه كانت خطواتي موزونه واحاول ما اشد نفسي وايد سبحان الله تخافين على البويضات المرجعه مثل ماتخافين على شي في بطنج سبحانه ...
بس نصيحه اللي خلاص وصلت فيها تخليهم يجيبون لها شي لان الواحد مايضمن حركته ...


****

كم لك متزوجه ؟؟
يمكن تضحكون لو قلتلكم انا بعد يومين باكمل سنتين ( انا متزوجه في 16/9/2004)

لكن انا بديت اكشف من اول شهر للزواج ويوم شفت ان فيني ضعف قلت ما بخليه يزيد ولازم اعالجه لان الشي لين خليتيه يزيد ويصير صعب

عشان جي اشوف اني استهلكت نفسي مع الادويه والحبوب والابر وروحه ووجيه المستشفيات وهالشي خلاني اقول خلاص مليييت سووووولي انابيب

حتى الدكتور يقولي انتي صغييره وايد ع الانابيب وللحين العمر قدامك

للعلم عمري 20 سنه ( بعد يومين بادخل 21 مع يوم زواجي 16/9/1985 )

قلت له انا ما باتم صغيره على طول اكيد العمر يمشي ...

وهو يوم شاف اصراراي وفي الاخير قعدت اصييييح وعطيته شوي من الدموع سوالي العمليه ولا هو كان رافض انه يسويها نهائيا


*****

عايزة بس اسالك الترجيع بجد مش مؤلم؟؟؟؟؟؟؟؟؟؟؟؟؟
اعمل ايه بالضبط بعد الترجيع ؟؟؟؟؟؟؟؟؟؟؟؟؟؟يعنى الطبخ و الحركة علشان هنكون فى رمضان؟؟؟؟؟؟؟؟ والله مش مؤلم ..


انتي بتكونين تحت تأثير بنج كامل .. يعني مافي الم ولا شي

بعد العمليه بتكون فيج دوخه البنج بس وشد بسيط من تأثير العمليه

اما في رمضان نصيحه : كوني في بيت اهلك عالاقل يكون في احد مهتم فيج في اكلج وشربج

لان الحركه جدا مضره

واهم شي الزوج يكون متفهم ان فتره وبتعدي على خير انشالله لازم يقدم تنازلات شوي ..يصبر ان زوته بتكون ممنوعه من( الجماع - الحركه - الطبخ - المجهود الزائد) .


****

بعد كم يوم من الترجيع حللتي والتحليل كان عادي او رقمي؟؟


حللت في اليوم العاشر من الترجيع ... تحليل رقمي والنسبه كانت 80 . ولله الحمد ..

يعني فوق معدل الابره التفجيريه ...


****
هم بيرجعوا بويضتين و ثلاثة فلمل يثبت واحد بس الاثنين بينزلوا ازاى؟؟؟؟؟؟؟؟؟ تيجى الدورة ولا ايه؟؟؟؟؟؟؟؟

ما يصير تجي الدوره خلاص مدام ثبت واحد يعني انتي حامل

والبويضات الباقيه تتحلل في الرحم او تختفي خلاص يصير مالها اهميه لانها ماثبتت مثل الاولى


*****

حبيت اسأل كم كانت نسبة هرمون الحمل يوم يلي حللتي (اليوم العاشر )
يوم حللت طلعت النسبه 80 ماشاء الله وعقب حللت في اليوم الـ 14 طلعت 800 وشي

لازم النسبه ترتفع لين نهاية الحمل .. وماتقل


*****

عزيزتي انتي حامل بتؤام او واحد

الحمدلله رب العالمين وقولوا ماشاء الله توأم ..

*****

مجنونة قطر يالغالية انتي رحت وطلبتي على طول انك تسوي طفل أنابيب وإلا كنتي تتعالجين وعلى حسب حالتك سوالك الدكتور العملية؟أفيديني أكثر لأنه ودي أسوي هالعملية بس الدكتور اللي أنا أتعالج عنده موب راضي يسويها يقول بدري لازم نجرب الأدوية والتنشيط بالأول بعدين نفكر بالعملية لا وبعد يقول أستني سنة أو سنتين مع العلم أنه ما بقى بالعمر كثر الي راح<<<فشيلة اللي يسمعك يقول أم مئة سنه
وعندي سؤال ثاني هل بهالعملية يشترط وزن معين لجسمك حتى تسوي العملية أنا عارفه ان السؤال غبي بس العلم بالشي أفضل من الجهل به صح والا لا


انا عالجت من بدري يعني من ثاني شهر تقريبا من زواجي

( من شهر 11/2004>>>شهر 5/2006)وكنت اعالج من غير توقف ... ومداومه عالعلاج مضبوط وما كان فيه فايده .. عشان جي اشوف اني استهلكت نفسي بالادويه والابر ... رحت للدكتور وانا اصيح لاني خلاص كنت منفجره علاقتي مع زوجي توترت وايد ولا قدرت اتهنى في زواجي عدل وحتى اني استقلت من شغلي والسبه هالمشكله اللي وترتنا كلنا .. لانه كان ميت يبي عيال وانا ما الومه من حقه بس ما باليد حيله وما كنت عارفه شاسوي
وانا نفسج دكتوري كان رافض نهائيا بس قمت ووقفت قلت له خلاص باسويها برا ..يوم شافني مصره قالي تعالي تعالي خللاص بنسويها لج ... لان يقولي انتي توج صغيره ووو ( لسه عروس ) على قولته ... قمت قلت اذا انتظرت اني لحين عروووس بتجي عروس فوق راسي وانا مادري .... خلني اتلاحق على عمري وبلا رباده ...


اما الوزن .. لا ماعتقد كنت اشوف بالعياده مالت الانابيب كل الاوزان والاحجام ... !!

الخلل من البويضات مب الوزن الله يصلحها

ياما بنات ماشالله امهات 100 كيلو وحملوا طبيعي .. وياما امهات 40 كيلو حملوا الله ييسر لهم وللجميع انشالله
صح ولا لا ....


تحملي تخلين حماسج يخف ... وتوكلي عل رب العالمين هاي اسباب وميسره


دكتوري كان يقول انا افضل الوحده ماتشحطط نفسها مع العلاجات الشهريه لانها تهدر الفلوس و الصحه والنفسيه ... وصج كلامه .. والله عمري ما ارتحت بالعلاج قد ما ارتحت وانا اسوي العمليه الحمدلله رب العالمين الله يرزق كل وحده على قد نيتها ....


*****

بس ودي أسألك حبيبتي.. اللي زوجها عنده قلة عدد الحيوانات المنويه
تستطيع أن تتلقح بها البويضه السليمة خارجيا..
وبسألك كم كلفتك عملية الأنابيب....

اييه بأذن الله ... لان القله الدكتور يجمعها ووو يطلع منها الممتاز ويلقح فيها البويضه
اما عن التكلفه سبق وجاوبت انها مجانيه بحكم اني قطريه ....


*****
حبيبتي بغيت أسالك كم عدد البويضات الملقحة اللي رجعوهم لك ؟؟؟؟

اللي تلقحوا 4 ورجعوا لي 2

*****

ماتعبتي من البنج؟؟؟
امبلا والله حسيت بدوخه ووو لوعه بعد البنج على طول ...


بس اهون عالاقل من الانتظار 14 يوم !!


*****

كيف كنتي مع البروجسترون اللي هيا ابر التثبيت لأنوا أنا مررة متعبتني وجاني ترجيع ولوعة ضربات القلب ارتفعت مررة .
أووالله يمكن اللي صار معايا من الأبرة التفجيرية لأنوا أعطاني وحدة في الخمس الأيام اللي بعد العملية.
فكنت أبغى أسألك انتي صارمعاكي كده؟؟؟؟؟؟؟

انا ما استخدمت ابر استخدمت تحاميل بس ماكانت تسبب لي خفقان
بس كانت ممله و سوتلي اسهال .. بس الحمدلله عدت على خير ...


*****
حبيت اسألك انتي نمتي على ظهرك عندهم بعد الترجيع لمدة ساعتين ؟؟
لاني سويت 3 عمليات اطفال انابيب وكلها مايخلوني عندهم خمس دقايق ويقولو خلاص روحي للبيت وبعدها بيوم اسافر بالطيارة لان المستشفى مو بنفس المنطقة الي عايشة فيها
هل هذا الشي يأثر

يا اختي مادري بس انا تميت حول الساعه ونصاو ساعتين على ظهري بعد العمليه ...
>>> المفروووض دايما الواحد يتخذ الاسباب ....


*****

اختي مجنونة قطر
احس صدري يعورني وحلماتي تحرقني فهل هذا طبيعي ؟؟
وهل حسيتي باي شي اسفل البطن في الايام الأولى للترجيع ؟؟ طمنيني
الايام الاولى لا ..
بس ثامن وتاسع يوم كان يجيني مل مغص الدره اخر بطني ... وماحسيت بألم في الصدر ...
الاعراض تختلف حبيبتي


...


كنت ابغى اسألك بعد الابر التحضيريه والدوفاستون متى نزل دورتك؟
لان انا دورتي منتظمه لكن لما قرب موعد العمليه اتاخرت الى الان يعني شهرين اعطاني الدكتور دوفاستون مانزلت وذحين استخدم ابر( Decapeptyl بس ابغى اعرف هي تنزل الدوره؟

هلا حبيبتي ..
شوفي انا بالاساس دورتي غير منتمه نهائيا
واخذت الدوفاستون على دفعتين عشان الحلوه تنزل وبعد 4 او 5 ايام نزلت الدوره الحمدلله وبديت بالعلاج ..>>الابر التنشيطيه
ما عن الابره التحضريه ماعند علم اذا تنزل الدوره او لا ...


....

مجنونة قطر :

الله يتمم لج على خير يارب ويرزقج بالضنا الصالح وييسر لج امورج..

انتم السابقون ونحن اللاحقون زين اللي قلت لي انه الاربع بويضات = اربع اجنة

بحن على الدكتور شحاته يحطهم لي كلهم لو نجحت بويضاتي بإذن الله وخاطري يسوي لي

مجمد لو لاقدر الله فشلت العملية مرة ثانية ..

بإذن الله على اول شهر ثلاثة بتكون عمليتي ..

يارب ارزقني وارزق كل خواتي بالذرية الصالحة المعافاه عاجلاً غير آجل..