في البداية اخر مرة تواصلت معكم يوم الاثنين قلتلكم اني رحت للدكتورة وسوت لي تحريض مرة ثانية ورجعت للبيت وفيني الام محتملة طلوق باردة تجيني كل نص ساعه ومرات ربع ساعه ماخلتني انام ولا اكل شي و ع الساعة 2 قلت لبنتي تسوي لي خلطة الاعشاب وتجيب لي تمر يوم جابتها لاعت كبدي وحسيت اني بستفرغ قلت خلاص مابيها رجعيها ودخلت أخذت دوش حار كنت متأملة اني قربت خاصة انها بعد الدوش انتظمت الطلوق كل ربع ساعة المهم قعدت أتألم وامشي واقرفص وأحاول اضبط أعصابي وأطبق التنفس الين إذن الفجر قال زوجي انا بروح للمزرعه خلني أوديك للمستشفى شكلك واصلة حدك قلت لا بصبر بعد مابي اجيهم الا اذا تواصل الطلق خاصة المستشفى قريب 5 دقايق مابيهم يلعبون فيني بالطلق الصناعي والكشف 😩 ما دريت وش ينتظرني ، قلت رح انا بروح مع اخوي وأختي قد ارسلت لأختي مسج تستعد ،، قال طيب وانا بخلص شغلي واجيك هناك قلت ماعليه ،، راح وانا قعدت ببيتي اتلوى وتدق امي تهاوشني علمتها اختي اني اطلق ، قالت روحي للمستشفى تقعدين تتعذبين بالبيت روحي خاف مشيمتك وضعها خطير والا تحتاجين دم والا يعطونك طلق صناعي وتفتكين لمتى تصبرين قلت خلاص اصلا مت ومازال الطلق كل 5 دقايق بس مووووت الله يرحمنا برحمته ،، كلمت اخوي وجاني دخلنا المستشفى وقالوا ي الله تخطيط وجاء دكتور ياخذ معلوماتي وأول ماعرف اني معي انفصال مشيمة توتر وعصب وقال انتي عارفة انفصال المشيمة يعني عملية فوراً ، وقال هاتوها لغرفة الإشعة وما أخفيكم كنت ميتة تعب واقول ي رب عملية وارتاح فوراً وسوى لي سونار وطلعت المشيمة وضعها كويس مرتفعه قال حتى ولو مش باين لازم تبقين تحت التخطيط لو ضعف النبض او نزل دم كثير قبل الولادة تدخلين العمليات قلت الله يكتب لي الخيرة ، ورجعوني كشك الولادة والطلق حاااااار بس متقطع وفجأة صار يتباعد خاصة لما يسدحوني عشان التخطيط ولما امشي خلااااص مقدر اخطي خطوتين من شدة الطلق ، جتني نيرس هندية حسبي عليها نفسها بخشمها وماتبي تكشف وتصارخ علي تقول انتي مافي بكرية ليش كذا >> ماتبيني أتألم ولا ابكي ولا اصرخ ،،، الصدمة بعد الم 7 ساعات من الليل وانا طلق منتظم كشفت قالت لسسسسسا 2 ونص قومي امشي قعدت ابكي وشكيت انها تكذب او ماتعرف انا مو اول مرة واعرف مدى تحملي للألم هذا الطلق مو اقل من 5 او 6 >> ع بالي كل شي زي ماتوقعت ،، جاتني وحدة فلبينية وقَعَدت اترجاها تكشف علي مرة ثانية هذا الساعة سبع ونص الصباح قالت الين يخلص التخطيط بعد نص ساعه واقعد اتلوى بمكاني بس مازلت بوعيي وأحاول اضبط أعصابي وادعي واستغفر واصلي ع النبي وماخليت ذكر ولا دعاء الا ماقلته الله يرحمنا برحمته كنت الوم نفسي وأبكي ليش مارحت للرياض وأخذت إبرة ظهر او مسكّن او كمام الأكسجين اللي فيه بنج اي شي يهون علي مو طايحة بغرفة تصيحين محد يجيك وإذا جووك قعدوا ينافخون تحسين انك وحيدة محد يحس بك ،، وبعد ساعه جت الفلبينية وقاست قالت 3 سم انا هنا قعدت اسحب أسلاك التخطيط قلت فكوني بنزل من السرير ماعاد أتحمل وفكتني ونزلت وأول ما مشيت خطوتين جتني الطلقة اللي تقص الظهر وجلست ع ركبي نفس الحبو ع ارضية المستشفى واصرخ من قلبي ي بنات قعدت من الساعة 8ونص الين 11 والرحم 3سم ومانزلت موية الجنين ولا دم جت ممرضة سعودية وقَعَدت اترجاها اقول فكي الموية عشان يحمى الطلق ويتواصل ويفتح الرحم وتقول بعيد الجنين ماقدرت افتح الموية ،، جت الهندية قلت عطيني طلق صناعي انا طلقي موت بس مو متواصل عشانهم كل شوي تخطيط وإذا انسدحت تلخبط مايصير منتظم قالت لالا انتي فيه طلق ممنوع طلق صناعي اذا فيه طلق >> هذا من راسها لأَنِّي اعرف نيرس فلبينية عجوز بنفس مستشفانا هذا كنت ادعي اني القاها وللاسف يوم ولدت وخلصت دخلت علي بدا دوامها ، المهم اذا شافت الرحم 5 والا 6 بس الطلق متباعد تحط إبرة طلق صناعي بالغذاية عشان تعجل بالولادة وتساعد الوحدة توسع لها وتحرك البطن وفعلاً مرتين اطيح فيها لما يكون الرحم 6 سم تقرب وتجهز عدتها وتبدا شغل ونص ساعه بالكثير وانتي والدة ،،، اكمل لكم وش صار رفضت الهندية تعطيني طلق صناعي والله كنت اترجاهم ي طلق صناعي والا عملية انا مت تقطعت من الطلق وفقدت السيطرة ع نفسي اذا جت الطلقة احاول أتنفس ابيها الين تروح بس فجاة ألقى نفسي صرخت بأعلى صوتي وهزيت قسم الولادة هز ، اختي اللي جت معي ماتروح مع احد للمستشفى تقول بس بروح معك لانها راحت معي باخر ولادة وكانت ولادتي ميسرة بفضل الله وتقول انتي صبورة وماتخوفين بروح معك بس عقب ذَا طلعت لها ونقابها كله دموع تقول هونت من العرس ،، المهم مالكم بالطويلة كنت ادعي ما يأذن الظهر الا وانا والدة طووولت كني بكريه يوم إذن الظهر قعدت ابكي وكلمت زوجي قلت خلااااص انا بمووت خلهم يسوون لي عمليه قال اصبري ي بنت الحلال ساعه ان ماولدتي جيتك قلت انا بموت وانت تقول ساعه وسكَّرت بوجهه وراح كلم امي قالت لا ماعليك منها لا توقع الا اذا قالك الدكتور تعال وقع ،، وانا قعدت اصارخ عليهم حرام عليكم انا مت ساعدوني والا سوولي عمليه ، جت السعودية بعد الظهر قاست وقالت فتح 5 سم ي الله امشي بعد تفاءلت شوي بعز الالم وقمت بمشي ونفس الشي مو قادرة امشي جلست ع ركبي وحطيت يدي وراسي ع كرسي عندي وكل ماجتني الطلقه حطيت وجهي ع الكرسي كان اسفنج وكتمت أنفاسي وصراخي الين نهاية الطلقة يمكن هذا ساعدني شوي لأَنِّي قعدت نص ساعه كذا وفجأة حسّيت اني بدفع وناديتهم وجوو ركض يهاوشوني قومي عالسرير ويسحبوني كاني ذبيحة 😩 ويحطوني ع السرير قالوا 8 سم بس لاتدفعين باقي الراس بعيد شوي بعدين يطّلع الرحم كله >> مدري وش سالفة يطّلع الرحم كله ،، النيرس السعودية قالت اصبري الطلقة الثانية ركزي ع التنفس لاتدفعين عشان يفتح الرحم زيادة وينزل الراس كامل >> كانه بكيفي قعدوا يقربون اغراضهم انا صرخت وقلت خلاص بيطلع غصب عني جت ركض وقربت قالت ي الله ي الله ادفعي >>>> هنا انا دخلت بمعاناة جديدة وهي الدفع ريقي نااااشف والنفس بح من الصراخ ولا فيه أكسجين ولا شي بس متجمعين ع راسي يصرخون دفي دفي بيبي موت انتي ازعاج يبي ولادة ي الله الحين ولادة دفي 😩 ،،، والمصيبة انا بولادتي الاخيرة خيطتني دكتورة بمستشفى خاص وقلت ترا مابي تجميلية ابي خياطة معقولة اخاف اولد بعدين بعمليه زي زوجة اخوي قالت لااا بتصيرين زي البكرية تولد عادي وارجعي لي اخيطك الكلام هذا قبل اربع سنوات وهي راحت الله يستر عليها ,, نرجع للدفع عشان تعرفون وش دخل الخياطة القديمة ، انا اعرف كيف ادفع مو اول ولادة لي بس هالمرة دفعت ودفعت وصرت مرة اصرخ ومرة ادفع من شدة الم الطلق مدري اصرخ والا ادفع والطفل مو راضي يطلع وهم يعصبون علي يقولون لاتوقفين دف طيب انا ينقطع نفسي ويلهمني ربي قلت تكفوووون شقوني والا اشفطوه قالت السعودية انتي مسويه خياطة قبل قلت ايييييه قالت خلاص بوسعلك وتوسع شوي قالت ي الله اذا جتك الطلقة ادفعي دفعة طويلة ونفس الشي بنص الدفع ينقطع نفسي واصرخ وتاخذ الهندية المقص مدري المشرط انا كنت مغمضة بس اسمعها تتكلم وتقص من الجهة الثانية ودفعت للمرة قبل الاخيرة قامت الفلبينية حطت بفمي شاش كانوا اربع عندي حتى عاملة النظافة قطت معهم ماسكة ايديني بعد ماحطت الشاش دفعت بقوة وطلع راْسه وارخيت وصاحوا كملي دف بيبي موت وأكمل بطلوع الروح ويطيح الله يصلحه الساعة 2 و40 دقيقة ساعه كانت كلها دفع ،، قعدت ابكي معه واحمد الله والنيرس السعودية تقول خلاص لاتبكين الحمدلله ارتحتي ،، عقبها جت الهندية تنافخ تقول انا مافي سوي خياطة دكتور بيسوي لك خياطة قلت ليش مابي دكتور قالت انتي في مشكلة كثير التهاب خياطة اول مافي كويس ويجي الدكتور مصري وانا حاطة يدي ع وجهي وأبكي ، هو كان جالس ع الكاونتر برا يسمع اللي يصير بس ما يدخل الين ينادونه الله يجزاه خير والله ي بعض الرجال ارحم من الحريم هي تنافخ تقول انتي مافي صبر وخياطة كثير وهو يقول الحمدلله ع السلامة وحصل خير بس انتي خياطتك القديمة التهبت وفيها خراج لازم اخيطك انا وتاخذين مضاد قوي 7 ايام وترجعين لي لو ماخف الالتهاب ونشف الخراج لازم أسوي لك جراحة وافتح الخراج وانظفه ي ربي رحمتك كل هذا من الخياطة التجميلية ! مع اني كنت زي الفل 4سنوات وارتحت من الالتهابات والإفرازات وماكنت اشكي من شي وطول حملي أراجع مع دكتورة ماقالت لي شي مدري وش سالفة هالخراج ،، الله لايعيدها بغت تذبحني شكل كل اللي صار لي بسبب هالخياطة وبالاخير خيطني وراح وحطولي مضاد وخلوني بغرفة الولادة 3 ساعات عشان الدم نقص صار 8 يقول نخاف من النزيف والحمدلله ع كل حال طلعت من المستشفى بعد 24ساعة ،، كنت بغرفة الولادة اسمع صوت رجال برا وأطباء يضحكون واقول يا حظهم رجال 😞 الله لايضيع لنا اجر ويجعل ما جانا تكفير ذنوب ويجزا امهاتنا الجنة ي رب ،، عندي كم استفسار راجعة لكم ان شاءالله 💕.

سحوبه. و. سمااء
الحمدالله على السلامه الله يعوض تعبكم بصلاح عيالكم
ويجعلهم من البارين الصالحين المصلحين يارب

...
بناات كيف احط الزيت زيتون على التطهي
اصبه كذا صب ؟؟ او احطه بقطنه واعصره؟؟
اخليه نقط خفيفه ؟؟! ولا اغرقه ..؟؟!!

ياحبيبتي صبي كميه ع التطهير ... لما احسينه يسيل من تحت الشاش وكل شوي حطي

آمين يارب😢