معزوفه

الحمدلله ع سلامتكم ومشكوره تعبناك الاكشن طويل


♥️♥️

ياعمري الحمدلله على سلامتك ومبروك قدوم إلياس 😍 ربي يقر عينك فيه

هلا والله اعذروني انشغلت من طلعت من المستشفى والنوم ملخبط والمغص مايخليك تتهنين هذا غير الاختبارات مامداني اقرا كلامكم برجع اقراه على رواقه
بكتب لكم اكشن الولاده بالتفصيل اللي لها خلق تقرا😂 تجيب لهاسناكات

يالله الحمدلله كل ما اتذكر اللي صار احس انه حلم

قلت لكم رحت السبت وكشفت كان ٣ ونص ولا رضت تسوي تحريض قالت لازم تتنومين ولا لسويت لك بتولدين بالشارع اذا جيتي بكره اسويلك

طلعت ع مسؤوليتي

اليوم الثاني الاحد كان عندي طلق من الصبح قلت بس هذا ولاده واستحيت اجي اكتب لكم لاني ادري بيروح كالعاده وفعلا نمت والظهراختفى كل الالم وخلصت اشغال البيت وكملت الشنطه وجبت خدامه تلمع البيت وصرفت بناتي بيت اهلي
والحقيقه ماكنت ناويه اروح المستشفى بس الحركه اختفت من المغرب الى الساعه ١١ ما احس فيه احرك بطني رجيته رج مايتحرك والعاده يستجيب لي اذا كلمته وحركته واكلت حلا ولا في فايده والله اني متت خوف وزوجي ميت اكثرمني بس ساكت

وبس رحت سويت تخطيط وحطت الجهاز على بطني ولا في صوت يمه الدموع بتطيح واهي تقولي من متى مختفيه الحركه وتحوس مو شايفهصوت 😭😭 ظلت شوي الا بعد قلبي طلع صوت قلبه
واتصل على زوجي ع طول واقوله الحمدلله سمعت قلبه وقال والله اني ميت خوف صار له شي وجالس اتحسف ليش طلعتك امس ولك هديهعلى البشاره الحلوه ذي 😭 عمري كان خايف اكثر مني وساكت طول الوقت >> اهم شي الهديه ذكروني اطلبها 😂

بعدها بدأ يتحرك بشكل نشيط سبحانه الله مدري انزعج من التخطيط ولا ايش بس صار كل شي تمام والتخيطيط مافي طلق ولا شي والرحمنفس اليوم اللي قبله ٣ ونص
جات دكتوره ثانيه غير اللي يوم السبت وقالت خلاص نطلعك مافيك طلق ولا يحتاج تتنومين وكانت الساعه ١ ونص الليل وزوجي يضحك يقولبس تجهزتي على الفاضي وسهرتينا يلا الحمدلله اهم شي تطمنا عليه

طلعت مامداني اوصل البيت على ٢ كذا جلست اكل شاورما. وكولا الا بدأ الطلق وانا اقول لا مستحيل توي راجعه مافيني اكيد زي كل مرهطلق خربوطي وبيروح اذا نمت
رحت اكمل غسيل وترتيب المكان وتوي دخلت التجمع اقرا سوالفكم ودي ارد اقولكم عندي طلق شكله بس قلت بخليهم يتحمسون علىالفاضي واذا نمت بيروح والنفسيه ما اقولكم كانت في الحضيض

زعلت على بناتي ليش مارضو يرجعون معي من بيت اهلي يبون ينامون هناك واهم جلسو يعتذرون لي وانا مو راضيه اقولكم نفسيه اللهيهديني ذيك الساعه مدري ايش جاني

المهم توي انسدحت الساعه ٣ الفجر والالم ماراح واسمع الغساله خلصت بس مو قادره اقوم اطلع اللي فيها والالم يزيد يوم جات ٣ و٤٠ بديت احسب الوقت وطلع كل ٧ دقايق اجي طلقه مدة دقيقتين 😳
على الساعه ٤ تأكدت انه طلق منتظم وحقيقي

بس قلت مسكين زوجي توه نايم من ساعتين بصبر الى الصبح خل ينام شوي
بس هو جلس وقال شفيك تتألمين طلق قومي اوديك
وماقدرت البس عباتي من الالم انتظر الطلقه تروح واركض والبس وبعدين انتظرها لين تروح واركض انزل الدرج وانتظرها تروح واركض اطلع الشارع😂😭 وكذا طول الوقتلين ركبت السياره (مدري ليش ضحكت شكلي كان زي لعبه الحبار بالمسلسل الكوري المشهور😭 ترى الطلقه كذا غصب تخليك توقفين حتى لو بنصالشارع بس تروح الطلقه حط رجلك اخوي عامر هههههههه)

وصلت وعلى طول دخلوني جات الدكتوره قالت ايش مسويه بالبيت رحتي تبخرتي 😂 قلت ماسويت شي من الله بس طلعت منكم ووصلتالبيت بدأ الطلق لحاله

قاست الرحم وقالت ٤ مدري ٤ ونص كذا وطلبت ابره الظهر قالو لازم تحاليل قبل وتطلع بعد ساعه 😳 ها من متى هالكلام مت قهر واللهعلى نظامهم الخايس ماقالو لي من قبل انها تحتاج تحاليل وهذا نظامهم

والطلق حمى وفتح ٦ قالت بفتح لك كيس الماي عشان يسرع الطلق قلت لاا اول الابره
وطبعا كل ماجات طلقه كنت اسوي التنفس شمي وره وطفي شمعه وامسك في حدايد السرير بكل قوتي واخلي عيوني تتشتت فوق تحتعشان ما اركز بالالم وكان يخف شوي ونفعني
وجلست انتظر ساعه لابره الظهر وجات قالت بعد باقي ٤٠ دقيقه 😭😭

وقاست قالت ٦ ونص خل افتح لك يمكن تولدين سريع لان طلقك منتظم وعنق الرحم لين ورضيت بعد اقناع زوجي لي وفتحت لي الكيسوزاد الطلق صار حااار موت ورا بعض ما اقدر اتنفس الا جات طلقه ثانيه حتى التنفس ماعاد يمديني اتنفس قمت افتح عيوني كذا كانيميته وزوجي ينادي فيني يفكرني مت او جالسه اموت😭
وبعدين حسيت نفسي بدف وتجي تكشف صار ٧ ونص
وتقول لاتدفين تنفسي بس وزوجي يقول لاتفجرين روحك صبري وانا مو بيدي هو يجي احساس الدفع ويرجع مره ثانيه وتقيس ٨ ونص علىطول ينادون الدكتوره وتقيس ٩ وتقوم هي تقول يلا دفي كانك تتبرزي اقولها ما اقدر قالت عشان ينفتح كامل
مامدا كملت كلمتها الا جاني احساس الدفع ودفعت بكل قوتي وطلع حتى هم مابعد يفكون قطعه السرير اللي تحت ويتجهزون سبحانه اللهفتح ورا بعض سريع

هذا يابنات اللي لاحظته ان فعلا طلق الولد مايرحم ورا بعض عكس البنت تعطيك راحه بين الطلقات
بس طلقه سريع مايطول مثل البنت هذا بالنسبه لي من تجربتي

المهم اكمل لكم طلع البيبي بس المشيمه ماطلعت وجلسو يضغطون على بطني والآلم تعرفون افف مزعج بعد ماتعذبت لين طلعت المشيمهوخيطو كم غرزه شق البيبي قالت بسيط جدا الشق بس
قالت عندي نزيف في عنق الرحم متضرر متورم من كثر الربط واحتمال يحتاج غرز وخياطه وحطو لي شي زي القطن فوقها مدري ايشماده توقف النزيف وبيعطوني مهله ساعتين اذا ماوقف بيدخلوني عمليات
وانا بيني وبينكم كنت مطمنه كل شي تمام لين جات الساعه الحاسمه جات تكشف وتدخل حدايد تخيلو فيني خياطه وتوي والد وتوسعبالحديدة وتضغط في بطني بقوه ومن داخل وبرا ماقدرت اتحمل بموت تقول لاتشدين ما اقدر اشوف تحت وبعدين ماعرفت تشوف شي وانامت ألم قلت ما اقدر خلاص قالت لازم ندخلك عمليات وتفحصك هناك ومن قالت هالكلمه ودموعي اربع اربع مو قادره امسك دموعي من القهرتألمت وتحملت الكشف وبالاخير بعد عمليات وبنج وانا عندي فوبيا من البنج ما أجلس بسرعه واذا جلست اموت في حاله صعبه وتخوف
وجلست اوصي زوجي على بناتي اقوله ماضميتهم قبل اروح اولد وزعلانه عليهم كنت والبيبي ماشفته عدل حتى😭اعتني فيهم وضمهمواهو يقول ايش هالكلام بتطلعين وتضمينهم وانا لاني دخلت البنج وانا منهاره صارت حالتي ازفت دخلت العمليات ٩ الصباح ماحسيتبالدنيا الا الساعه ٢ متخيلين طول هالوقت الدكاتره وزوجي محتاسين معاي يقول دخلوك علي كانك مجنونه لو اني اعرف حالتك ولا كان قلتسوو فيك شي عاد يقولي حطو علي تخطيط القلب وهذي ومن الحركه طاح وطلع ان مافي نبض وانا كانت وضعيتي راسي طايح كاني ميتهوزوجي يقول قام يركض يصارخ على الممرضات يجون يفكر وقف قلبي 😢
حزني صراحه واهو واقف ع راسي طول الوقت لان السرير مرتفع وانا كنت اقوله امسح ع راسي الم الم بموت الم والحقيقه ما اذكر شي منهالكلام اللي قاله.

يوم بديت احس بالدنيا اذكر معدتي كانت تعورني وابي ارجع مو قادره من الالم ارجع اصلا بطني فاضي
وما ارتحت لين رجعت العصاره حسيت نفسي بديت اصير طبيعيه الحمدلله بس بطني جهه السره والرحم كان فيه سكاكين متضرر من كثرالضغط عليه حسيت اني والد قيصري ما اقدر شي يلمس بطني حتى البيبي
الحمدلله يارب لك الحمد على نعمه الصحه وبالنهايه هذي ابره الظهر مو مكتوب لي اخذها بكل ولاده يطلع شي ومايعطوني اياها الحمدللهخيره

جات بعد مارتحت الدكتوره وقالت وقفو النزيف بدون خياطه ولا شي ونظفو لي الرحم كذا لاحظت الدم اقل من ولادتي اللي قبل المكان يغرق
وصراحه حسيت انهم دخلوني وانا ما احتاج غرفه عمليات كانت تقدر توقفه في غرفه الولاده بس انا ماقدرت اتحمل الم كشفهم واهم مطولينمو دقايق واحس هذا لانها مو خبره والله اعلم او انا ما اتحمل الاآلم بالحقيقه بس الحمدلله اهم شي طلعت سليمه من عندهم
لو ان مادخلوني بنج وسالفه النزيف كان قلت لكم كانت اسرع واسهل ولاده بس ارجع اقول الحمدلله كل هالتعب ينسي المهم السلامه

خلني اقولكم الصدمات وزن البيبي قالو بالسونار ٢٩٠٠ وبعدها بأسبوع ماتغير قالت ٢٩٠٠ او٢٨٠٠ كذا انصدمت ماتغير
المهم بعدها بكم يوم سويت بالطوارئ تفصيلي يوم الحركه توقف ٦ ساعات قال ٣ ونص تخيلو🤣

ويوم ولدت الصدمه هههههه كيلوين ونص وهذا اصغر بيبي اجيبه مع اني كملت شهري مستغربه ليش نتفه كذا بس شكله من ابر السيولهوقفتها بدري ولا كنت منظمه عليها اساسا كنت اخذها يوم ورا يوم واتوقع هذا السبب حملي اللي قبل انتظمت عليها

والملابس يابنات اللي صار مقاسه هو (المقاس الاول) من نكست ومن مذركير جاو مقاسه وحلوين الحمدلله شاريه ٤ قطع المقاس الاول وطوله٥١
اما حتى شهر لا كبار لسى يبي له اسبوعين او ٣ اسابيع اتوقع ويبدأ يلبسهم

فاللي مثلي تحب البيبي مرتب اول الايام تاخذ كم قطعه مقاس الاول والافضل تاخذي كذا مقاس لان ماتدري طفلك كيف حجمه والسونار مومضمون نهائيا

ربي يثيبك على حمدك ❤️ الله يقر عينك فيها ويفرحك دنيا وآخره

، 🧐