منون 666 :

السلام عليكم ورحمة الله وبركاته اخواتي انا كنت متابعه لكن من زمان ودايم ادعي لكن بالشفاء انا بقول لكن قصتي مع مرض السرطان لما كنت في ثاني جامعه لاحظت انتفاخ بحجم الزيتون في رقبتي فرحت للمستشفى الجامعي في الرياض ودخلت عن طريق الطوارىء ومن دكتور لدكتور ومن عياده لعياده وفي الاخير قالو لي سرطان الغدد اللمفاويه طبعا انا كنت ماعرف وش السرطان ولابحياتي سمعت عنه لان عمري كان عشرين سنه ولاقدشفت احد مريض بهالمرض المهم قالي الدكتور لازم تاخذين جرعات كيماوي وقال ان شاءالله ماراح تحتاجين الا لست جرعات فقط لانه كان في بدايته المهم كل اسبوعين اخذ جرعه كانت عباره عن ابر ومر تقريبا ست شهور وخلصت الجرعات وسويت اشاعه وقالو سليمه ولله الحمد ورجعت لجامعتي وكانت فترة امتحانات وامتححنت ونجحت ولله الحمد وانتقلت للمستوى الثالث بهالفتره طلع الانتفاخ مره ثانيه وبنفس المكان سبحان الله راجعت الدكتور وقال لازم عمليه علشان نشيل الورم وسويت العمليه وشالوه ولما حللوه طلع نفس المرض يعني رجع مره ثانيه وقال لازم تاخذين كيماوي مره ثانيه ونفس الجرعات سته وبعد ماخلصت منهم قالو لازم تاخذين اشعاعي لمدة شهر ورحت واخذت الاشعاعي ولما خلصت اخذ علي الدكتور اشاعه وقال الحمد لله تعافيتي وكالعاده رجعت لجامعتي ودرست واختبرت ونجحت ولله الحمد وبعدين حسيت بالام ببطني فضيعه وبعده بيوم نزلت علي الدوره فقلت اكيد هاالام علشان الدوره المهم بعد اسبوع كان لي موعد عند الادكتور ولسا الالم ماراح المهم خبرت الدكتور وعملي اشاعه ولما طلعت الاشاعه قالي الدكتور للاسف المرض رجع مره ثالثه بس وين في البطن هالمره بصراحه قلت خلاص الموت احسن شي عندي فقال لازم عمليه علشان نتاكد وسويت العمليه وبعده قالي نعطيك كيماوي بس مكثف يعني اجلس بالمستشفى خمس ايام في البدايه رفضت واعطاني مهله افكر بس لما شفت دموع امي وهي قاعده تدعيلي قلت خلاص رح اخذ الكيماوي لاني انا بصراحه مخبيه عن امي وابوي انه اللي فيني سرطان هم يدرون اني مريضه بس مايدرون وش اللي فيني بالضبط لاني اتفقت انا واخواني وخواتي اني ماعلمهم ورحت للمستشفى واخذت اربع جرعات مكثفه بين كل جرعه والثانيه اسبوع فلما كنت اخذ الجرعه الرابعه جاني الدكتور وقالي انا طلبت لك تحويل لمستشفى الملك فيصل التخصصي فقلت له ليش قال عندهم لك علاج افضل من علاجنا فرفضت وحاول يقنعني لين اقتنعت وطلعت من عندهم واعطاني اوراق للتخصصي قال راجعي عندهم المهم طلعت من عندهم وانا جلد على عضم يعني صرت هيكل عضمي ويديني صار لونهم بنفسجي من كثر الابر رحت للتخصصي بالرياض وقابلت الدكتور شودري وقالي انتي لازمك عملية زرع نخاع العظم روحي مع الممرضه وهي تفهمك ورحت معها واشرحتلي كل شي طبعا وافقت على طول حتى يوم قالتلي انه العمليه تسبب عقم قلت اصير عقيم ولا اشوف دموع امي كل يوم وبدت المراجعات والفحوصات واخذو عينه من نخاعي لاني ماحتاج لمتبرع وجلست من شهر خمسه بالرياض علشان الفحوصات الى شهر ثمانيه وانا ماشفت لاامي ولاابوي باخر شهر ثمانيه دخلت للتنويم واخذت جرعة الكيماوي المكثفه الخامسه وبعد ماخلصتها نقلوني لتنويم زراعة النخاع وعملت الزراعه ودخل شهر رمضان وانا بالمستشفى وطلعت قبل العيد باربع ايام بعد ان من الله علي بالشفاء التام فقالو ماراح تطلعين من الرياض الابعد ثلاث شهور ولاتطلعين لمكان مزدحم فجلست انا واخوي بشقه بالرياض وكل اسبوع اراجع عندهم وبشهر 11 كان لي مراجعه ولما خلصنا قالي اخوي انا لازم اروح احجز لنا تذاكر علشان بنرجع لاهلنا قلت كيف بتحجز لنا وانا ماخلصت الفتره المحدده اللي هي 3 شهور قالي انا قلت للدكتور وهو وافق طبعا كنت مشتاقه لاهلي ولامي ولابوي ولبيتنا ذيك الليله مانمت من الفرحه وجلست افكر قلت اكيد صاير شي في بيتنا علشان كذا قال اخوي بنرجع وطول الليل وقلبي ناغزني جا الصبح ورحنا للمطار وصلنا البيت واول مادخلت حسيت قلبي انقبض فيه شي مو طبيعي في البيت وكان عندنا رجال كثير وقت الضحى شفت امي وسلمت عليه وعلى خواتي وكانت امي تعبانه شوي قلت وش فيك قالت مزكمه ورحت لغرفتي علشان ارتاح اشوي الا الرجال بدأو يزيدون وحرمه طالعه وحرمه داخله بالخير عرفت ان ابوي مااااااااااات ااااااااااه ليت مت انا قبله ياناس 6شهور ماشفت ابوي حسيت اني ابنجن نفسي اطلع بالشارع واصرخ باعلى صوتي ويييييييينك يابوي ليش تروح وتتركني وانا جايبه لك خبر شفائي من المرض الى الان ماني مصدقه اقول بيرجع لنا ابوي ماراح يتاخر عنا الان مرت سنتين على وفاته الله يرحمك ياابوي ويجعل قبرك روضه من رياض الجنه وجميع موتى المسلمين امين يارب العالمين والان انا صارلي سنتين و4 اشهر من زراعة النخاع والحمد لله انا الحين طيبه ولله الحمد هاذي قصتي مع المرض نقلتها لكن باختصار والان كل شهرين لي موعد اتمنى لكن الشفاء ومرضى المسلمين اجمعين واي سؤال انا حاضره رح اجاوبكم عليه لاتنسوني من دعواتكم

السلام عليكم ورحمة الله وبركاته اخواتي انا كنت متابعه لكن من زمان ودايم ادعي لكن بالشفاء انا...