صباح الخير :)
مبارك علينا التجمع اليديد
ربي يجعله فاتحة خير و ان شاء الله ينضمون لنا خواتنا ياسمونا و زمونه
و غيرهم و غيرهم عشان نتونس اكثر و يتحرك الموضوع :7_5_131:

بنتظر يا حلمي
رفيقة دربي ربي يسعدك ويفرحك يارب

زمان أحلى
ان شاء الله ترجعي بالبشاير والحمل السليم يارب ياكريم

منى
الله يبارك فيك وان شاء الله تكوني من حوامل هدا التجمع

دبي
الله يتمم لك على خير والله كريم ان شاء الله أنظم له قريبا


سلامي للجميع

اللي نجحت عملياتهم يفيدونا
بالترجيع
ادويتهم شنو ؟
اكلهم شنو ؟
هل ارتاحوا ؟ ولا لا ؟

خنوسة :

ردا على الاسئلة ..

بالنسبة لي ادويتي :
١- دفستون كنت اربع حبات ٢ و ٢ و حاليا حبتين ١ و ١ .
٢- بروجلتون ( استروجين ) كنت حبتين وقت الارجاع و بعدها الدكتور رفعها ٢ و ٢ و بعدين رجعت حبتين .
٣- ابر السيولة ( انوهيب)
٤- حبة اسبرين
٥- حبوب دايلون للسكر ( لان عندي تكييس)
٦- حبة فيتامينات للحوامل
٧- حبة فيتامين فيها فيتامين ب١ و ب٦ و ب ١٢
٨- كنت اخذ حبوب هرمون الحليب مع اني مع عندي مشكلة بس الدكتور قال علشان جودة البويضات ووقفتها بعد الارجاع باسبوع نص حبة يوميا قبل النوم
٩- بالنسبة للكرتيزون من بعد السحب كنت اخذ ابر حوالي ٥ خذتها من بعد السحب إلى بعد الارجاع تقريبا يومين او ٣ بين كل ابره و الثانية كان في جدول محدد .. بعدها صرت اخذ حبتين في اليوم ميدرول و لما عرف الدكتور اني حامل بواحد بس نزلها لحبة في اليوم .
١٠- تحاميل سايكلوجست مرتين في اليوم
١٢- ابر مثبته خذت ٣ من بعد السحب إلى بعد الارجاع تقريبا مرتين قبل الارجاع و مرة بعد السحب على حسب ما اذكر
١٣ - خمس ابر كنت اخذها مع ابر الكرتيزون عبارة عن ابر مثبطه لهرمون المخ ( اعتقد من اسمها مع اني مب متأكدة انها مثل الابر التحضيرية )
ما ادري نسيت شي و الا لا :) و معظم الادوية ما زلت مستمرة عليها و احس اني تعبت منها لكن الحمد لله على كل حال و الدكتور قال احتمال على الاسبوع ال١٤ يوقف معظم الادوية ان شاء الله .. و باقي يومين و بكلمه بعدها استفسر منه

الأكل

ايام التنشيط كنت اركز على ان يكون اكلي بروتيني و خاصة البيض و اني اكل يوميا افوكادو و انا متكلمة عن هالموضوع في مدونتي .. بعد الابرة التفجيرية الدكتور طلب مني ان يكون اكلي بروتيني علشان فرط التنشيط و عطاني شراب اسمه ( انشور ) عبارة عن بودرة و ماي و قالي اشربي ٤ او ٥ مرات حتى لو ما تكلين شي ثاني ما يهم المهم تشربينه .. بالنسبة للأكل الصراحة ما التزمت بالاكل البروتين بعد الارجاع وايد لكن التزمت بالانشور و فعلا الحمد لله اول مرة ما يصير معاي فرط تنشيط ..
كنت اكل براحتي ماعدا الكافين وقفته (الشاي - القهوة و البيبسي وغيره) و مازلت اكل براحتي الحمد لله اكل متوزان علشان ما يزيد وزني بس لو بأمشي على الخرافات اللي في نت بموت من الجوع وقت الارجاع ووقت الحمل ..
و طبعا الماي يا بنات .. كنت احسب شربي للماي و ما اطلع مكان الا غرشه الماي في ايدي .. و كنت احرص اني اشرب على الاقل ٢ لتر كل يوم .. و خاصة ماي زمزم كنت قاريه فيه رقية تأخر الحمل والاسقاط .

الراحة

الصراحة في كل محاولاتي ما ابالغ في الراحة. انا سويت العملية في البحرين .. و بعد العملية الدكتور يطلب ان انام على ظهري ساعين حتى الحمام الله يعزج ما اروح .. بعدها قالي طلعي و ركبي الطيارة و روحي بلادج بس انا قررت اني ابقى يومين .. اول يوم رجعت و كنت تعبانه و نمت طول اليوم و العشاء كلته في الغرفة .
ثاني يوم طلعت تغديت و رجعت و ريحت شوي و بعدها طلعت تعشيت في المطعم و تمشيت شوي في الستي سنتر بس على خفيف :)
ثالث يوم سافرت بلادي و ركبت طيارة .. و بعدها خلاص مارست حياتي بشكل طبيعي وانا عندي عيال فصعب اني اتم نايمة .. و كنت اطلع و اروح و عادي جدا
كنت حريصة على كذا شي اني ما ارفع شي ثقيل و ما اتحرك بطريقة تخلي دقات قلبي ترتفع وايد .. و بس و انا عندي محاولتين ناجحين و في الاثنين نفس الشي .. و بمجرد ما خلصت الاجازة الاسبوعين .. رجعت دوامي و الحمد لله
ما خذت اجازة الا لما بدا الوحم و التعب و الحمد لله كم اسبوع و رجعت ..
و الله يعورن قلبي البنات اللي تنسدح كانه خشبة اسبوعين .. هي تضر نفسها اكثر من الفايدة و تقلل سيوله الدم للرحم . و تتعب نفسيتها من الحبسة و الطفش ..
و بعد الحمل بعد تعامل نفسها كانها معاقة .. الحمل حالة ماهي مرض .. و لا اعاقة .. صحيح ان حمل بعد حرمان بس ترى الجنين ما معلق بعلج سبحان الله في قرار مكين . الاعتدال زين

اخيرا اقول ان اكيد هي اسباب و الاهم التعلق برب الاسباب و قيام الليل و الاستغفار و البقرة و الرقية .. و اشدد على الرقية .. و انا جربت هالمرة طريقة الشيخ المغامسي ان اردد ربي لاتذرني فردا و انت خير الوارثين في السجود ٤٠ مرة و الحمد لله ... و لله الفضل من قبل و من بعد دعواتكم يا بنات ان ربي يتمم حملي .. الحمدلله عندي ثقة بربي و بديت احس بشوي اطمئنان بس ما زال القلق موجود و الله يصرف وساوس الشياطين عنا يارب ..



سامحوني طولت عليكم لكن حبيت افيدكم ..

مبرووك التجمع الجديد وإن شاء الله هذا يكون فيه تفاعل اكثر