حنين ترا عادي انا بدايت حملي كذا افرازات بس طلع عندي التهاب خفيف وصديد باالبول وكنت مره موسوسه باالاجهاض اللهم يتممم لك ارتاحي ولاتفكرين بشي بنات ترا كنت بداية حملي لين اربع اذكر كنت اشرب نشاء مع مويه بارده ملعقه صغيره سبحان الله يقولون يثبت بعد ربي اصلا اقرو مكونات الدافستون تلقونها نشاء ذره حبيت اقولكم 


ادعولي انا بتاسع وخايفه من الولاده عسى ربي يسهل 🙈

الله يستجيب دعواتك امنيتي ويسهل ولادتك يارب و يقر عينك
بالنونو .. ماوصلتني الرساله بس عادي فديتك عاذرتك والله

استودعت الله اجنتنا الله اللذي لاتضيع ودائعه الله يتمم لنا
على خير يارب .

صباح الخير 
شكراً على الافادة
رحت للموعد بينت عندي الاجنة بس النبض قال لي على الاسبوع الجاي يبان يقول بدري وربي يسهل كمان الدم قال انو مو من الاجنة الحمد لله
 دعواتكم بثبات اجنتي نفسياً مو مرتاحه مع الدم الي ينزل 😞

12/12 حمد الله تطمنتى 
كم عددهم بان؟ ولا تستعجلين ان  تختزلى منهم لان مو شرط يبان النبض للكل كثير حالات من التوايم
يتوقف نمو احد الاجنه بفتره من الحمل وهذا الى انتى تبينه ماتريدين التعدد الاجنه
حنين الافراز الصفر لازمنى من بدايه الحمل للولاده  ويفحصونه احيانا يصاحبه التهاب واحيانا الافراز بدون التهاب. وحيانا يصادف ينزل افراز بنى وبرضو عادى. هو الخوف من الاحمر

اليوم الأربعاء الساعه3 الفجر بنام ماقدرت خوف وتوتر وقلق احساس غريب اخيراً الوقت الي يفصلني عنك ياروح ماما قريب وأخيرا برتاح من تعب الحمل والثقل وأخيرا بصير ماما وبيصير عندي عائله صغيره ثواني ويتغير التفكير يمكن .. طيب ليكون بنتي ... اعوذ بالله من الشيطان الرجيم
نمت وصحيت 4 الاحلام كلها كانت بغرفه العمليات
توضيت وقرأت سوره البقره اذن الفجر صليت قريت اذكاري استودعت نفسي الله وبنتي وكل شي احبه
الساعه صارت 6 تمنيت الوقت يوقف كل مازادت الدقائق نبضات قلبي تزيد معاها اخيراً قدرت انام
الساعه 7 المنبه رِن ..رِن
قمت تحممت.. جهزت نفسي انا وأختي وزوجي
الساعه 9 كنت بالطوارئ دخلت.. عملت اوراقي..هنا الممرضه توديني غرفتي الممرات طويله رجولي ثقيله بنتي تضغط نفسها لتحت واحس شي ينزل مني معقول ولاده دخلت غرفتي ،لبست ملابس العمليات ، هنا الممرضات يقيسو الضغط والحرارة ، موتوني يدور وريد مافيه، جابو أخصائي عشان يفتح ابره المغذي اخيراً الحمد لله مشي الحال ،تخطيط نبض الجنين ياربي مو قادره انام ع ظهري بطني مرفوع حيل وكاتم ع أنفاسي حرقان ذبحني مو قادره أتحمل ، زوجي: اصبري كلها ساعات وبترتاحي من هالتعب وبتروح الكرشه وترتاحي
موعد العمليه الساعه 12 ولسا مااحد جاني
الساعه 1 ونص يله مدام عمليه دفوني ع السرير ودخلوني غرفه ماقبل العمليات
د بندر : كيفك يابنتي؟
انا :الحمد لله زينه
د: الحمد لله امورك كلها تمام ها مستعده؟
انا : اي دكتور بس امانه قول الممرضات يدخلوني زوجي عندي بغرفه الافاقه؟
د: ان شاءالله بقول لهم
انا: وكمان خليهم يركبو القسطره بعد التخدير
د : والقسطره بيركبوها بعد التخدير
زوجي: هههه جمان كان لازم تكون دكتوره
د: هههه
بعد دقيقتين
د: انا دكتوره التخدير اخترتي تخدير نصفي صح ؟
انا : ايوه
د: (لزوجي) أستودعها الله وأشرت للممرضات يدفوني
.
.
انا : هذي غرفه العمليات
دالتخدير: ههه ايوه دي ساحه القتال
(حسبي الله عليها لعبت بنفسيتي)
أخذت ابره الظهر بعد معركه مع الدكتوره العنيفه
وبديت افقد الإحساس بالحزء السفلي
دالتخدير : انت متوتره وخايفه بعطيك ابره تنيمك
نمت وصحيت ع اربع دكاتره علي دكتورين عند راسي يدفو بطني
انا : حرام عليكم عذبتوني ليه تعملو كذا بنتي طالعه فوق صح ورجعت نمت وصحيت ع صوت بكاء بيبي
ياربي معقول هذي بنتي الي تبكي معقول انا وبنتي بنفس المكان ومعقول صرت ماما
مرت 5 دقايق ومازالت اسمع صوت بكائها
انا: كيف بنتي ؟
مااحد يرد ياربي معقول مااحد يسمعني
انا : دكتور بندر
د: نعم
انا:بنتي زينه
د: ايه الحمد لله لو فيها شي ماخليها هنا
انا: والله؟
د: والله زينه بس تبكي لانها جوعانه
ارتحت الحمد لله غمضت عيوني وفتحتها الا الممرضه واقفه عند راسي ومعها بنتي اااه ياربي هذي بنتي هذي الي جلست سنين انتظرها معقول هذي لي انا يارب يكون حقيقه ومايكون حلم جميل
جلست اطالع فيها مااقدر اشيلها اشرت للممرضه عشان ابوسها احلا احساس بالدنيا تمنيت الوقت يوقف قبل ماتاخذها الممرضه
طفشتهم كل شوي اسال كم باقي ..اخيرا خلصنا
(ابره الظهر ماتخليك تحسي بالم ابدا بس تحسي بحركاتهم ع جسمك يعني ضغط وشد حتى بعد العمليه لما كانو الممرضات يعقمو بطني كنت احس بحركات أيديهم يمين ويسار بس بدون الم )
جو كل الدكاتره الي بغرفه العمليات باركولي وتحمدولي بالسلامه
الموضوع المحرج طلعو الدكاتره من غرفه العمليات بس كان فيه ممرضات ودكتور مااعرف ايش شغلته وكان بيطلع ناديته قلت له امانه لاتروح خليك عندي هههه جا وقف عندي شافني خايفه يقول هذا اول بيبي صح قلت اي رحمني 😭😭
كل ماتذكر السالفه استحي من نفسي ياربي الواحد من الخوف يخبص
ودوني غرفه الافاقه ماطلعت الا لما قدرت احرك رجولي للان مااحس بشي بس احس برجفه خفيفه(الغرفه فيها تقريبا 10 أسره كلها رجال كل ماطلع واحد من غرفه العمليات جابوه المهم طلع الدور الاول للولاده بس كان يومها زحمه طلعوني للدور الثاني وعملت العمليه فوق)
يقولي زوجي كنت انتظر قريب من غرفه العمليات وبس طلع الدكتور باركلي وأخذني الحضانه اشوف البيبي ويقولو سألته ان شاءالله جمان ماعدبتكم قال خانقتنا وجرحت دكتوره التخدير وووي يافشلتاه مااتذكر هالحكي الله يستر وش خبصت بس أخصائيه التخدير تستاهل برد كبدي فيها هههه
لا وبعلي العزيز يقولي والله ان الدكتور محترم وابن حلال يله سنه ونص ونرجع نعيد العمليه عنده (انا توي طالعه من العمليات والالم لا يوصف وانت تقول بيبي ثاني ) صرخت فيه صرخه >> يستاهل
هذا الأكشن آدري طولت بس من الملل ومايعمل نسيت متى اخر مره لبست عباتي 😂😂