سلامات
ليش مختفيين يابنات
عساكم بخير
الجوهرة اعطينا تفاصيل ولادتك

مساء الخيرات يا صبايا
كيفكم وش أخباركم الله يبارك فيكم وعقبالكم يارب
جيتكم بأكشن ولادتي
طبعا انا فكيت الربط في مستوصف خاص وقالت لي الدكتوره اتوقع في اي وقت تجيك ولاده لان عنق الرحم عندك لين وكل يوم وانا انتظر
قالت اذا ما حسيتي باي طلق تعالي يوم الأحد اكشف عليك وفعلا راجعتها يوم الاحد قالت الرحم. عندك مفتوح 3 طبعا قبل لا أمرها مريت السوق وقعدت امشي فيه
قالت احتمال بكره تجيك ولاده تعالي العصر واذا حسيتي باي ألم توقفي عن الأكل والشرب
وسوت لي تحليل طلع معاي فقر دم وكتبت لي إبرة حديد
ورجعت البيت وقفلت شنطة أولادي وشيكت على شنطتي وطول الليل والطلق زايد معاي بس سبحان الله ما إذن الفجر الا كل شي يروح😩
نمت وصحيت وفطرت أولادي وسبحتهم وتسبحت
خليت الشغالة تجهز الاغراض وتغدوا أولادي طبعا ما أكلت شي خفت تجيني ولاده يادوب في الفطور تمر وحليب بالحلبة والزنجبيل وعليها
وديت أولادي عند اهلي ووقتها أختي كانت مسويه عشاء وعازمتنا وتقولي تعالي ما تدري ان الوعد قرب😩
المهم رحت للدكتوره وكشفت وطلع فاتح 4 لكن بدون اي الام
طبعا شكلها سوت لي تحريض قالت قدامك من اربع الى ست ساعات وقالت روحي البيت واكلي اي شي وأول ما تحبس بألم وقفي عن الأكل واذا زاد الطلق تعالي
وقتها اشتهيت السينابون عشان القرفة
وندق مشوار عشان نشتريها وفعلا اشتريتها وشربت عليها موكا وحم متأخر 🙈
ورجعت البيت على صلاة المغرب وبدا يزيد الطلق وانا اتصبر وأتحمل وفادني هذا التجمع في معلومات كثيره منها المشي وقت الطلق وفعلا كانت اذا جاء الطلق اخذ نفس واذا راح امشي مع ذكر الله
لحد صلاة العشاء يادوب صَلَّيْتَ ورحت للمستوصف ويوم كشفت ما فتح زياده 😫😭
قالت خلاص لازم نفتح موية الجنين وفعلا فتحتها بدا يزيد الطلق لحد ما فتح 5 ورحنا للمستشفى اللي ناويه أولد فيه طبعا طلعت معاي الدكتوره
والحمدلله ما طول الطلق وكان اسهل من أولادي الباقين طبعا بفضل الله ثم التنفس وصلت المستشفى وجهزوا الغرفة وبدا الجد رغم ان الطلق ما كان قوي بس اكثر شي عانيت منه خروج الرأس وهذا اول مره يصير لي ماني عارفه السبب مدري عشان الطلق كان خفيف ولا ما عندي طاقة حاولت ادفع ادفع لحد ما ربي فرجها وخرجت بنتي للدنيا بعدها اعطوني بنج عشان الخياطه لما فقت جاتني رجفة شديده شكله نقص في السكر وقعدت على هذا الحال ساعتين لأنهم قالوا لا تاكلين الا بعد ساعتين والحمدلله أمي جابت لي حليب وعصيدة وبعدها راحت الرجفة
فلك الحمد ولك الشكر يا ربي
عذراً على قرقرتي والله يكتب لكم جميعا الولاده السهله الميسرة
التوقيع

الجوهرة الحالمه
الف الف مبروك والحمد لله على سلامتك

ماشاء الله
ولادة سهلة وميسرة بفضل رب العالمين
بس والله صبرتي على نفسك ماشاء الله
وزين سويتي بالمشي يساعد كثير
كم يوم صار لك بين فك الربط والولادة؟؟


يارب عقبالنا ونحكي لكم قصة ولادتنا بالسلامة

السلام عليكم انا سابقه بذا التجمع مرتين ربط واللحين الحمدلله حامل توني من يومين داخله الثالث ولسى ما راجعت لاني مسافره عشان احدد موعد الربط و ياليت اللي من الرياض تقولي فين صلحت الربط لانه اول مره بالرياض اصلح ربط تقولي ع مستشفى كويس و كيف اسعارهم وربي يسهل لي حمله وولادته