الله يعين ذابحنا الكسل مع هالبرد
بكره بحول راح إبداء بالعميق ولكن بجزء
1/غرفه نومي راح أمسك الإدراج فقط تحت وفوق عميق
2/غرفه أولادي دولاب الملابس فقط عمييييق
3/المطبخ الجزء الأول فقط مع الثلاجة عميق
وبس اكتفي بهذا مع الشغل اليووومي
والله يعيننا ويوفقنااا

صباح الورد

انا الحمدلله متحسنة كثير عن اول عشان كذا انقطعت عنكم احس التجمع للكسولات هههههههههههههههههه

غالبا اصحى ثلاثة الفجر بس كثير نومي متقطع مع الاولاد ماشاء الله عليهم واحد يصحى وواحد ينام

افطر بعد الفجر مع زوجي واخوي السابعة يروحوا الدوام وانا ادخل المطبخ اعمل شغلة فيه وعالبا يكون فيه عسيل بالغسالة الحمدلله مع غسالة اوتوماتيك مرتاحة كثير

نومي فيه غلط حبتين انام الساعة 3 العصر واصحى قرب المغرب وارججع انام 11 او 12 شيء كذا

الاسبوع القادم برجع الدوام وان شاء الله يتحسن الحال اكثر

طبعا كلمت وحدة تجي تشتغل عندي مو هدفي والله الشغل لكن ابيها تجلس مع الاطفال وقت دوامي وماحصلت وحدة تجي مؤقت وتروح فاضطريت اخذ هذي وان شاء الله مؤقت شهرين او ثلاثة وتنحل مشكلة الاطفال

ملاحظة ::

بس التذكير بالتسبيح والحمد والتكبير قبل النوم .. ينبغي ان نقوله بيقين وليس تجربة .. لانه من هدي خير البشر صلى الله عليه وسلم فاللي تذكر بالحديث لاتقول جربوا لان فيه يقين بالنتيجة اهم شيء يكون فيه استمرار ويقين بما عند الله
والله اعلم

السلام عليكم انا عضوه جديده و شفت التجمع يحمممس وابي اشارك معاكم من اليوم ههههه

انا ام ل٣بنات ماشاء الله الصغيره بالروضه

امممم نظامي كان ملخبط وحياتي مقلوبه فوق تحت والسبب الرجوع للصديقات والواتساب اثروو فيني وصرت كسوله ومااطبخ ابي من المطاعم زيهم

قبل لا اعرف الواتس كنت سنعه وعلطول في قسم التنظيف والترتيب وبيتي ينضرب فيه المثل من النظافه بس لما شفت صديقاتي كيف مبردين قلوبهم ومايهمم البيت اهم شي الكشخه والطلعات صرت زيهم واهملت بيتي اهماااااال شديد وصرت اسهر الليل اسولف عالواتس والنهار كله نووووم والعصر اكشخ واطلع 😢


وهالاسبوع كرهت الجوال وكرهت الواتس وصرت نحله في بيتي ماشاء الله الله لا يغير 😂

بديت بدولاب بناتي سويت له فرز طلعت القديم ورتبت الجديد وقسمت الادراج ملابس النوم والطلعات والشراريب وووخلصنا من عفشة الملابس


ودولاب زوجي كان يرثى له اعوذ بالله من الكسل رتبته وعطرته


واليوم الثاني

استلمت المطبخ وعشان اجدد النفسيه غيرت ترتيب الادراج يعني دروج المقاضي نظفتها وخليتها للمواعين والعكس حبيت هالطريقه وتحمست لترتيب كامل المطبخ مع التنظيف العميق والتعقيم



اااااااه مااحلى النظافه تفتح النفس



غرفة نومي كنت مستحيل اخليها مفتوحه علطول نظيفه ومعطرع ومقفله بالمفتاح حتى وقت النوم والفتره الاخيره اهملتها اهمال مو طبيعي صرت ماانظفها اسبوع كامل ولا ارتبها 😨 واللحين الحمد لله رجع لي حماسي ورتبتها وغيرت الموكيت وجبت ابجورات عشان احس بالتجديد واستمر



المجلس اول باول انظفه وابخره لانو زوجي يجلس فيه مستحيل اخليه وسخ


وغرفة المعيشه مرات يبهذلوها البنات لدرجة مااعرف من وين ابدا بس جبت اكياس كبيره وقسمت الالعاب فيها

وجمعت الاغراض كلها ورتبتها في سلال ورتبت الغرفة بالكامل



باقي الصاله وطاولة الطعام ناويه ادلعها




وداعاً للكسل والنوم والطلعات واهلاً بالنشاط والنظافه والايجابيه وربي ماافيه راحه اذا البيت وسخ او مبهذل انا مستحيل اخليه وسخ بس اهمل الترتيب مرات لدرجه مااعرف كيف ارتبه ويصير البيت مقلوب رأس على عقل بس الحمد لله بدأت اتدارك الوضع




معليش طولت عليكم 😂بس جيت افضفض لاني انقهرت على نفسي لاني اهملت بيتي فتره طويله بدون سبب😩كله من صديقات السوء

امس نمت مت بعد صلاة العشاء وقمت من صلاة الفجر كلي نشاط وحيويه 😻
كنت بجلس اذاكر بعدين قلت خل انظف بيت اهلي هالصبح
افطرت وروقت وجلست اذاكر شوي لما جت ٨ ونص بديت
كنست الدرج والصاله وغرفة الحريم والمجلس ومداخل البيت كل شيء كنسته
بعدين غسلت الحمامات والمغاسل ومسحت السراميك والدرج وانطلقت لقسم الرجال غسلت الحمام والمغاسل ومسحت السراميك

كان فيه على المغاسل حدود الصنبور ترسبات قديمه ودايم نفركها ماتروح !
اليوم حطيت مويه حاره بعلبه + خل + ملح الليمون
وصبيته على الترسبات وخليتها شوي وبعدين فركتها والحمدلله راحت 👏

والحييين يبي لي شور يروقني
اول مابديت شغلت الوقت اللي ينحسب عشان اشوف كم الوقت ببيت اهلي يحتاج صار ساعتين وثلث على هذولي بس 😪 بيتنا كبير ماشاء الله

والحمدلله على نعمه الصحه والعافيه ❤️🌿

وين الحماااااس
الحمد لله أنجزت شغلي
بكره بحول الله
1/غرفتي دولاب الملابس عميق
2/غرفه أولادي الاسره تحت وفوق عميق
3/المطبخ الجزء الثاني عمييييق
وبس اكتفي بهذا مع الشغل اليووومي والله يوفق الجميع