فجعتني اللي من سوت تحليل منزلي وعرفت انها حامل ماتابعت حملها ولا تطمنت لين الولادة معليييييش وين عايشين بأي عصر !!
حتى لو صحتي كويسة وما اشتكي من شيء إرضاءً لضميري و واجبي تجاه الروح اللي احملها بداخلي بروح أتابع واتطمن وأسوي واجبي .. والله ما أصدق وش هذا البرود ياويل قلبي مرره صعب وش هالقلب هذا
ياما ناس مايشتكون من شيء واعراضهم سليمة و وقت الولادة جابوا جنين مشوه تمامًا خالي من الأعضاء الداخلية وغيرها وغيرها
انا لما اكمل شهر ما اروح متابعة زوجي يذكرني يقولي يابنت روحي نتطمن عليك وعلى الجنين نشوف وش السالفة وش الوضع بالذات ان بشهوري الاولى الدكتورة ماتقولي ولاتحدد لي متى اراجع عندها يعني تطمني وتعطيني فيتامينات وامشي واروح لها على كيفي الخاص اغلبهم كذا عكس الحكومة لازم تحديد موعد وإلتزام .

بالتوفيق ياحبيبتي الله يكون معك ويوفقك ويسهل لك كل صعب 💙💙😚

انتِ تسدحين النونو على جنب ؟
طيب كيف يتعدل رأسه من وراء لأن بعد الولادة يجي الرأس طويل من فوق وطالع من وراء وشكله مو مقبول
وإحنا نحرص ان يكون نايم على ظهره
اهم شيء بعد الرضاعة ياخذ وقت ويطلع الهواء من معدته وبعدها يناام مرتااااح
والله يابنات مرت اخوي الله يصلحها هي وامها ماتسمع كلام احد تعبنا واحنا نقول لها اسدحي البنت على وراء وعدلي راسها علشان يدخل وحطي شيء مقوّى وخلي راسها لاصق بمقدمة السرير حتى يضبط من فوق وتدخل جبهتها
وتطنش تطنش لين كبرت وتعدت الست شهور وظل راسها طووويل ويخوف والمشكلة شعرها يتلفلف وهي ماتهتم ولاترتبها وكله شعرها مفتوح حسبي الله عليها البنت حتى جبهتها طالعه لبرا مدري كيف شكله والحين من كثر التعليقات على بنتها من أهلها نفسهم اللي مانصحوها تدرين وش سوت ؟ حلقت لها علشان شعرها مايتلفلف ويقوم
كل هذا علشان ماتمشطها
قمة الإهمال صراحة وقلة سنع تستفزني جدًا والله تصعب علي بنت اخوي
وكل مانزلت من شقتها تمسكها امي تروشها وتنظفها وتمشطها
والعام الماضي بالشتاء كانت صغيرة ماكملت سنة تخيلوا تخليها اسبوع كامل بدون ترويش !!
يعني الطفل يعرق وهو نايم ويستفرغ والريحة الله لايوريكم الكل يكلمها وينصحها ترد والله برررد اخاف عليها !!
واذا استفرغت وجاء شيء على شعر بنتها من الاستفراغ عندها حل مؤقت تدرون وش تسوي ؟ تآخذ مناديل مبلله وتمسحها فيه 😷😩😩😩
اخر شيء صارت اختي الصغيرة اللي اصغر من أمها تروح لها فوق وتروشها وتنظفها
تقول لها يللا شوفي مرضت بنتك؟ صار لها شيء ؟ نظيفه ومرتاحة واحسن منها مافيه
ومع ذلك ماتعلمت لازالت على نفس الطبع الله لايبتلينا
غلطة العمر مسكين أخوي والله يشتكي حتى من شقته كله وسخه ومغبرة وحالتها حاله ويقول حتى طبخ ماتطبخ لي !!
شفيني انا الحين قعدت احش هههههههههههههههههههههههههههههه
قسم بالله لاعت كبدي وانا أكتب كنت وين وصرت وين ماهذا يا اخواااات 😂😂😂😂
يارب بكره تكون عند اهلها وما تنشب لنا بجمعتنا مع خواتي ياااااارب 😭😭

عطشانة ياروحي ..


أكسري هذا الملل بأي شيء تحبيه ونفسك تسويه قبل ما تولدين لأن البيبي من يجي ينسي الام كل الاشياء اللي تحبها وكانت تسويها
اقرأي ، تابعي أفلام ، صوري لو تحبين التصوير
سوي أي شيء يسعدك ..
هالفترة الأخيرة صعبة علينا والإنتظار ممل أنا ودي اسوي شيء مميز قبل ما أولد مليت من كل الأشياء اللي احبها ومتعودة اسويها بس مو لاقيه ، وأحط طاقتي بالترتيب
او اتفرج على ديكورات بالإنستقرام علشان استفيد منها بغرفة بنتي وبس والله كذا مقضيتها .

السلام عليكم
كيفكم ياجميلات .روز نسيتي تطمنينا عنك وجلستي تحشي بمرة اخوك هههههه الله يهديها ةيصلحها
الصباح رحت الحمام الله يكرمكم ولقيت افرازات كثيره بيضاء والكلوت مبلول وخفت😥 وقلت للزم اسوي تحليل بس فالليل راحت علينا نومه وقفلت المختبرات ومارحت
ونمت الساعه2 وبطني مره متحجره وكل 10د اصحى من التحجر وحلووم الله لايوريكم عن الولاده ووالله تعبني التحجر