اللهم لك الحمد كما ينبغي لجلال وجهك وعظيم سلطانك

ام عبدالعزيز كل الشكر لك على فتح الملف هذا وفعلا جا بوقته الله يجزاك خير ويفرج همك ويشفيلك وليدك وكل مرضى المسلمين

كنت اعتقد اني وحيده بهذي المعاناة واتفاجأت بوجود الكثيرين !! الحمدلله على كل حال


1- نوع مرض القلب : تشوة ( مع تحديد الجزء ) .. أم ثقب .. إلخ

بنتي عندها ثقب كبير بين البطينين -ثقب صغير بين الاذينين-ضيق بالصمام الميترالي-اعوجاج بالشريان الاورطي-الصمام الاورطي ثنائي الاجنحه يعني 5 مشاكل او مثل مايسموه الدكاتره عيوب مركبه


2- عمر الطفل
4 اشهر ونصف


3- الوزن و الطول
الوزن 4 كيلو اما الطول ماعرف بصراحه



4- الأعراض
ولدتها قيصري واتبرزت فبطني وجلست بالعنايه 11 يوم ولما طلعت حسيت البنت مو طبيعيه تنفسها سريع تتشنج ويغشى عليها من اقل بكاء وتزرق كلها يصير لونها على كحلي ماترضع زين ابد يعني تشرب حليب 20 مل فقط والاربعين كله وهي بكاء مستمر ويغشا عليها + انها ماتكبر الوزن ثابت



5- كيفيه التعامل معه

طبعا ماخليها تبكي يعني احاول قد ماقدر اسكتها على طول عشان لاتتشنج وتزرق +ماقدر اروشها باستمرار او اعرضها لاي شي ممكن يمرضها لان الدكتور محرصني انها ماتمرض ابدا بالنسبه للحليب رضاعتها جدا ضعيفه والرضاعه الوحده تقعد ساعتين تشرب فيها لان تنفسها مايسمح لها تشرب طبيعي وخشمها دائما مسدود لان عندها تشوه بسقف حلقها ضاغط على الانف من الداخل ومأثر على التنفس يعني تنفسها ضغيف من جهتين 1 من القلب 2 من تشوه سقف حلقها

6- كيفية تغذيته
احاول قد ماقدر اعطيها حليب لان زيادة الوزن مطلوبه لاجراء العمليه


7- التطعيمات المتعلقة بهم غير التطعيمات المقرره للأطفال العاديين
لايوجد


8- ما يجب تجنبه في حالاتهم
اهم شي من تبكي اشيلها واسكتها ومااوصلها لمرحلة الازرقاق والتشنج واحرص عليها من البرد يعني كل يومين وانا موديتها للدكتور اخاف من كحه او بلغم او زكمه لان تاثيرها سئ خاصة انها للان ماسوت العمليه


9- كيفية التغذية مع تحديد نوع الغذاء والحليب
طبعا مابديت بالاكل بس حليب +حلبه


10 - العمليات التي تم اجراؤها
للان ماسوينا العمليه ادعولها ربي يسهل امرها


11- القسطرة وما تلاحظينه على طفل بعدها
ماجربت


12- مظاهر التطور في النمو الجسماني من جلوس او حبو .. إلخ
طبعا وزنها اقل من اقرانها بالعمر وكل حركتها عامة اقل من اقرانها سواء المناغاه او التبسم

طبعا العمليه المحدده لها بتكون عشان ثقب البطين ومحاوله توسيع الصمام اما اعوجاج الشريان والصمام الثنائي الاجنحه هذي تشوهات خلقيه مالها حل الا لما تكبر بيشوفو مدى تاثيرها عليها ويبحثو بامرها

المفروض تعمل العمليه وهي عمرها شهرين لكن للان ماجانا موعد نظرا لازدحام المستشفى ووجود حالات قبلنا


انا مراجعة بنتي بمستشفى الحرس بالرياض

اذا احد عنده خلفيه عن المستشفى وكفاءاتهم ياليت يعلمني لاني ماعرف هم كويسين او لا


اسأل الله العظيم رب العرش العظيم ان يشفي بنتي وابنائكم وكل مرضى المسلمين





اخت قطرة من فضه ماقلتي ولدك باي مستشفى يراجع؟

نسيت اذكر بنتي تاخذ يوميا سالورين مدر البول

وكابتوبريل كل 8 ساعات الى حين موعد العمليه

حبيبه الله يشفيها يارب ويخليها لك ..غيري حليبها لحليب يسمن شوي ..

قطره اللهم آمين ويآمن روعاتنا فيهم يارب

جود..هلا بك ياغاليه ..أمراض القلب مره منتشره بشكل غريب سبحان الله المشكله انه اعمارهم صغيره

الحمدلله والله يشفيها يارب ويخليها لكم ويفرحكم فيها

انا موعدي بكره ان شاء الله تنويم..بيآخذون اشعه وبيحددون قسطره او عمليه الله يسهلها ويجعلها بردا وسلاما يارب

قطره يالغاليه من قطر مو من هنا

وليش ماتحولونها على مركز الامير سلطان افضل من الحرس اظن..

وبسألك وانت حامل مااحد اكتشف.؟

أختي جود الغيد ..
الله يخلي لك الصغيرة ويشفيهـا ويشفي كل مريض ..
مـا علينا اختي إلا الدعاء لهم والصبر والصدقات .. وربي كريم ..

مثل ما قالت لك حبيبتنا أم عبدالعزيز .. أنا من قطر

نسيت ما أقول لكم الأدوية اللي ياخذهـا ولدي ..
اسبرين للقلب .. امبرازول حق الارتجاع .. فيتامين D .. ولدي كان ياخذ سالورين ( مدر البول ) بس وقفوه ..

والشفاء من عند أرحم الرحمين .

الله يشفى عيالكم..