سمارا. :

السلام عليكم ورحمة الله وبركاته من الخطوات الأولى لما يتعلم الطفل الكلام نبدأ من الصغير إلى الكبير يعني من الكلمات إلى الجمل البسيطة إلى الجمل الطويلة. بس لازم تحطون ببالكم إنه مافي عجله وعصبيه صبر وطولة بال ولاحظي الفروقات بين الأطفال أصلا في أطفال خلقة متميزين يبرزون عن بقية الأطفال فمابالك بأطفالنا اللي عندهم ظروف معينة أخرتهم عن النطق فلا تقارنين أبداً المهم التمارين اللي كانت تعطيني الأخصائية كانت تنفخ البالونة وبعدين تطيرها مرتين إلى ثلاث مرات وبعدين تخليها على جنب شوي عشان تشوفها بنتي في البداية كانت بنتي تروح عند البالونة وتناظرها -طبعا إعتبرتها طلب من بنتي-فنفختها وطيرتها المرة الثانية طنشتها لما جت عند البالونة تبي بنتي تطور من أسلوب الطلب هنا بنتي طلعت صوت ورفعت البالونة قامت نفخت لها وطيرتها وبعدين طنشتها إلين في الأخير بنتي قالت كلمة زي بالونة بس عرفنا إنها تقصد بالونة - على فكرة كل مرة بنتي تطلب كانت تردد آآه بالونة إلين بالأخير نطقتها  في طريقة نفخ الصابون الفقاعات نفس الخطوات  وكمان قالت لي على الترجمة للإشارات رحت بنتي عن الموية وتأشر لي أقول آآه مويه كل مرة كل مرة إلين صارت تنطق مويه وكذا مع بقية الأشياء تبي تفتحين لها الباب تقولين آآه أفتح الباب -على فكرة بديت ترجمة إشاراتها لجمل بعد ماكونت حصيلة حلوة من المفردات وكمان من التمارين كانت ترمي مثلا ملعقة على الأرض وتقول طاحت الملعقة ولما تلعب مع بنتي تقول نلعب كورة  بصراحة الترجمة مرررة حلوة لهم مرة مرتين في الأخير تترجم إشاراتهم لجمل يقولونها  وكمان من تمارينها تقول خيريها بين شيئين قولي تبين تفاح ولا موز على الأكل خيريها تبين مكرونة ولا رز تبين سلطة ولا إدام بتتعرف بكذا على أنواع الأكل وتصير تسميها  وكمان من التمارين تقول علميها تشيل أغراضها الشخصية كنت أرسل بنتي تشيل جزمةها بالبداية أمسك إيديها  وأوديها لمكان الجزم وإنتوا بكرامة المرة الثانية نص مساعدة أمسك إيديها لتشيل الجزم وأخليها تروح لمكان الجزم وهيه تحطها بنفسها المرة الثالثة أقل إلين صارت تنفذ بالكلام بس أرسلها وتروح من نفسها وكمان في تحضير السفرة أعطيها الملاعق توديها لمكان الأكل وكمان الله يكرمكم الزبالة صارت ترمي في البداية معاها بمساعدة كاملة وبعدين تنقص إلين تنفذ الأوامر شفهياً(سبحان الله قبل كانت أختي الكبيرة تقول بنتك ماتجيب ولاتنرسل كنت أضحك وأقول بنتي تنخدم مو تخدم اللحين أختي تقول قلت لك إرسلي بنتك ترفضين اللحين صار من التمارين ترسلين بنتك تشتغل كان سمعتي كلامي من قبل كل ماأتذكر كلامها أضحك)  طبعاً هذي التمارين اللي عطتني إياها يمكن تستغربون لكن مفعولها سحري بس الأكثر سحر والأقوى الرقية وآيات القرآن والدعاء والصدقة  وعلى فكرة الأطفال اللي بعائلتنا ماشاءالله تبارك الله من الجهتين نبيهين وفطينين وأنا متأكدة لو إني منتبهة لبنتي كان بتكون مثلهم علموا الصغار مبادئ الاكل يسمون لما ياكلون ويجلسون ويسمون لما يشربون ولما يعطسون يقولون الحمدلله ولمايشبعون يقولونها كمان في البداية تحسينه شي صعب ومستحيل لكن التكرار له مفعول السحر وفي الأخير عيشوا حياتكم لعيالكم خلوها تعليم مستمر لماأتفرج على التلفزيون أعلم بنتي هذا كذا هذا كذا  هذا لونة كذا هذا طعمه كذا لما أكون بالمطبخ أعلم بنتي كل شي هذا بصل هذي ملعقة هذا طماط......الخ أنا إنسانة أطلع وأروح وأزور واللي حولي يلاحظون بس أطنش وأقول خلقتها كذا باردة  إذا قالوا ماتكلمت أقول عادي فيه صغار مايتكلمون بدري وعلى فكرة مو ضروري تفسرين لأحد يعني مرات أرد ومرات أطنش وللأمانة الغالب في مجتمعي مايحبون يتدخلون ويراعون المشاعر    والله يعيني وإياكم نتجاوز هذي المحنة ونعتبرها فرصة بلاء يرفعنا عند رب العالمين أكرمنا فيها عشان ننال رضاه

السلام عليكم ورحمة الله وبركاته من الخطوات الأولى لما يتعلم الطفل الكلام نبدأ من الصغير إلى...