بدت معاناتي بداية العام الماضي كنت احس بتعب وارهاق بسيط وكنت دايما ابي انام ورجليني دايما ثقيله واحس عضلاتي مشدوده قلت يمكن ارهاق الدراسه والتعب والشغل , مع اني اكل صحي بس حاولت اغير بنظامي الغذائي زدت كمية الفواكه والخضار والعصيرات الطازجه وصرت اخذ فيتامينات اضافيه بس المشكله ماراحت صارت تروح وتجي وفجأه بمنتصف السنه لقيت جسمي مو طبيعي دوار وضيق نفس و ضعف بالعضلات ورجفه وخفقان سريع بالقلب حسيت انه راح يغمى علي تعب شديد لدرجة ماتحمل اسمع اي صوت او اكلم احد ,وصل الأعياء حد اني ماصرت اقدر ارفع يدي واحط لقمه بفمي حتى مضغ اللقمه صعب , رحت الطوارىء اكثر من 10 مرات يمكن احد يجاوبني كل مره يعطوني دوا جديد ولافي فايده وكانت الأدويه تزيد من حالة الأعياء شكو بالغده الدرقيه لكن طلعت التحاليل سليمه,كانو الأطباء ياخذون الوالد على جنب ويقولون له بنتك فيها حاله نفسيه يبغالك تعرضها على طبيب نفسي او خذها مشوار تغير جو ,كنت ارجع البيت ميته قتلو نفسيتي بكلامهم حسبي الله عليهم كفايه التعب الي كان عندي,مرت الأيام و زادت الأعراض صار الدوار غير طبيعي الدنيا تلف حولي صرت اشوف الأشياء مقلوبه وعيوني تتحرك بسرعه ماقدر اشوف اي شي قدامي وغثيان شديد ويستمر الدوار حتى وانا نايمه ويمكن اسوء,صرت ماقدر انام تغفي عيني شوي واصحى من نبضات قلبي السريعه وضيق النفس كنت احاول امد يدي لكاس المويه الي جنبي وماقدر اوصل له من التعب, وصلت لدرجة اني ماقدر امسك فرشاة اسناني كنت اغسل اسناني عزكم الله وانا جالسه على كرسي وصلت لمرحلة ان امي تساعدني بتغيير ملابسي وتساعدني بأكلي وشربي,صرت وانا امشي اسحب رجليني سحب لأنهم مايساعدوني بالمشي كنت امشي وامسك جدران البيت واحيانا يجيني دوار شديد اثناء المشي يخليني اوقع واضرب الجدران,صلاتي قمت اصليها جالسه وحتى وانا جالسه احس اني راح اوقع على وجهي من شدة الأعياء ,كل هذا وماحد ملاقي لي حل من طبيب لطبيب كان الوالد شايلني على كرسي متحرك ومن طبيب لطبيب رحت القلب ,الباطنيه,مخ و اعصاب عملت تصوير مغناطيسي ومقطعي وكلها سليمه,انف واذن وحنجره لعل وعسى يكون الدوار من الأذن الداخليه بس كل شي كان سليم كانو يعطوني تمارين للأذن عملتهم بس بدون فايده, كانت لما تجيني الدوره الشهريه اموت اكثر لدرجه قمت ادعي ربي انها تنقطع عني من كثر التعب الي كنت اشوفه منه كانت مو طبيعيه ابدا,صارت آلام جسمي لاتحتمل الام شديده في جميع عظامي وعضلاتي حتى اسناني كانت توجعني وعظام الجمجمه خلف الأذن ,مافي عظمه بجسمي ماكانت توجعني كنت اروح اطوارئ كل شهر اخذ ابرة فولتارين لألم الجسم, كل المعاناة هذي وانا صابره وادعي ربي يشفيني وينور طريقي لعلاجي ,بالنهايه صرت خلاص مافارق فراشي صرت شبه ميته آمنت بالموضوع وقلت يمكن هذي نهايتي يمكن اموت وماظن اني اعيش اكثر خلاص هذا كله مقدر ومكتوب وهذا الي الله كتبه علي وانا قابله فيه.ضليت عايشه كذا تقريباً 8 شهور ميته على فراشي.
ومره امي حاطتلي التلفزيون على قناة والله ماتذكرها المهم في موضوع عن الروماتيزيوم وعلاقته بألآم العظام وشي كذا صرت اسأل نفسي اذا التحاليل الي خذوها لي سليمه وضغطي وسكري سليم والأشعه الي على الراس سليمه يعني مافي الا شي صايب عضلات جسمي وعظامي يمكن اطباء الروماتيزيوم ينفعوني,قلت للوالد ليش ماتاخذني عند الروماتزيوم قالي لأ يابنتي هذا للكبار بالعمر انتي صغيره قلت له خلينا نجرب يمكن الاقي حل.
رحت لدكتور اردني ماخذ البورد الأمريكي مرتين وشرحت له الموضوع كله قالي باخذ لك تحاليل ولما عطاني الورقه اول مره بحياتي اشوف التحاليل هذي لجهاز المناعه واشياء كثيره غريبه عجيبه المهم اكثر من 20 تحليل اذكر خذو مني 6 انابيب دم لدرجة اني بعدها دخت لمدة اسبوعين ماتحملت.قالو لي راح يرسلوها فرنسا وبعد اسبوعين ارجع استلم النتيجه.
رجعت وانا كلي امل ان بلاقي الحل وتفاجأت بلي سمعته قالي النتائج كلها سليمه ماعدا شي واحد هو فيتامين د3 ناقص ومعدله كان 11 نانوجرام/مليجرام. الصراحه تفاجأت وماصدقته قلت له دكتور تأكد مو معقوله بس هذا الي ناقص في شي اكثر من فيتامين لأن ماظنيت فيتامين يعمل بجسمي كل هذا ,قالي يعمل اكثر يجيب سرطانات وضغط وسكر ومرض التصلب المتعدد والزهايمر وامراض كثيره قالي الحمدلله انها جت على كذا ولقينا السبب ,حمدت ربي رجعت البيت كلي امل ان العلاج هذا راح يغير حياتي.
كنت آخذ 50.000 وحده دوليه كل اسبوع لمدة 3 اشهر, اول 3 جرعات حسيت بتغيير زاد الأمل عندي ,استمريت مع نهايه العلاج الألم اختفى ماصدقت ان نقص فيتامين د ممكن يعمل كذا, انا الآن بعد 4 ونص شهور من العلاج وحالتي في تحسن الصعف العضلي لسى موجود مشيتي شوي مترنحه مامشي طبيعي بس اقدر امشي الحمدلله مو مثل اول ملازمه فراشي والتعب لسى موجود احيانا مااقدر اقوم من فراشي من التعب بس هذا التعب يختلف عن الموت الي كنت عايشته الحمدلله . سمعت من دكتور هولك بمايو كلينك بإمريكا ان العلاج ياخذ من 9 الى 12 شهر لحد مايرجع المريض لحياته السابقه الي يعرفها ويختفي التعب والضعف العضلي.
اي احد عنده تجربه مع نقص فيتامين د حابه اسمع تجربته احس انا الوحيده بس حابه احد يدعمني .
ادعولي .

تحية طيبة للجميع

في الحقيقة ينقصنا الكثير من الوعي والتثقيف والواحد ماينتبه لنفسه إلا بعد مايوقع الفاس في الراس ......

حبيت أفيدكم لأني مريت بمعاناة لايعلم بها إلا الله من التعب والألم حتى زوجي وابني عانوا معاي كثير وابني المسكين كان يبكي لما يشوفني وكأني فاقدة عقلي ........

ماابغى اخوفكم ولكن هذا الموضوع مهم جدا ........ كلنا درسنا أن نقص فيتامين د يسبب الكساح في الصغار ويسبب هشاشة العظام عند الكبار ....... ولكن زيه زي أي معلومه نسيناها مع الوقت ....... وماكان في أحد يوعينا بمدى خطورة نقص فيتامين د

فيتامين د ينقص مع تقدم السن واصبح الآن منتشر بسبب قلة التعرض لأشعة الشمس وبسبب العادات الغذائية السيئة والتي تخلو من الأغذية التي تمدنا بهذا الفيتامين أو أن هناك أسباب أخرى وراثية أو مرضية

ماراح اطول عليكم .

سوي هذا التحليل وماراح تخسري شي راح تطمني على نفسك لأن بصراحة ماتوقعت أبدا أن نقص فيتامين د خطير لهذه الدرجة وأن له دور في مناعة الإنسان وأنه يسبب الجلطات ويسبب أمراض الأوعية الدموية ويسبب السرطان ويسبب مرض التصلب العصبي ويؤدي للوفاة ........ الخ بإمكانكم تبحثوا عنه في النت


وخلوني اكتب لكم معاناتي مع هذا نقص هذا الفيتامين

كنت احس بآلام في العضلات خاصة اليدين قبل نزول الدورة وكان يجيني تعب وخمول واغلب وقتي نايمة وجسمي مكسر سنين وانا على هذه الحالة وزوجي يقولي عشانك ماتتحركي كثير كنت اقوله كيف اتحرك وجسمي تعبان اصلا يقول كثرة القعدة والخمول تتعب الجسم ..... ماهو عارف ايش فيني ... سويت تحاليل للدم وكانت كلها سليمة .. سنين وأنا على هذه الحالة وكانت حالتي تتطور أكثر وأكثر واحنا مااحنا عارفين وش السبب وما كنا ندري أنه فيتامين د قاعد ينقص مع الوقت .... المهم ... كانت آلام يديني وكتوفي تزداد وأحس بخمول وتعب ودوخة وغثيان وآلام فظيعة في الرقبة وتنميل في جسمي كامل أحس بعظام راسي تألمني وألم غير طبيعي في الراس وكأن فيه شي جوى لدرجة أني قلت هذي أيامي الأخيرة واني بفارق الحياة وطلعت لي كدمات في فخوذي ويديني بدون مااضرب في شي وكانت تقعد فترة وتختفي....... وبعدها جتني أعراض نفس اعراض الجلطة تستمر معي لمدة نصف ساعة وماقدرت احرك فيها جنبي الأيسر كامل حتى نصف وجهي وشفايفي وجاني زي فقدان الذاكره وماقدرت انطق الكلمات واذا نطقتها انطقها غلط اسأل الله أنه مايعيد هذه الحالة على ولا على أي مسلمة ومسلم وكان أبني لما يشوفني كذا يبكي وزوجي ينهبل وابني عمره 8 سنوات يموت من البكا ويقول وش فيك ياماما وش فيك ياماما واطالع فيه ولما اجي اكلمه تتطلع الكلمات مخربطه وافقد الذاكره لبعض الأشياء لاحول ولا قوة إلا بالله . .... جتني هذه الحالة مرتين بس الحمد لله في المرة الثانية ابني كان نايم .......... بعدها رحت سويت جميع تحاليل الدم والغدة الدرقية وفيتامين ب 12 وسويت رنين مغناطيسي للمخ طلعت النتايج كلها سليمة ولكن الدكتور وصفلي اسبرين استمريت عليه لمدة 3 اشهر ........ والي استغربه بصراحة من الأطباء أنهم هم أنفسهم عندهم جهل يعني المفروض هذي الأعراض تكون معروفة عندهم من ايش وانهم لازم يسووا تحاليل اساسية على طول من ضمنها د وما ينتظروا .......... المهم قعدت 3 اشهر استخدم الاسبرين ..... وكانت تجيني آلام شديدة جدا في اليدين والكتوف والمفاصل واحس اني لما اوقف راح اطيح احس ماني متوازنه قرات في النت ان الدوخة وعدم التوازن احتمال تكون بسبب الأذن الوسطى رحت وكشفت طلعت سليمة ....... بعدها رحت سويت تحاليل شاملة للدم وتجلط الدم والذئبة الحمراء طلعت سليمة وفي الأخير حولتني الدكتورة على دكتور روماتيزم بصراحة ممتاز جدا اسمه : اسامه حجي في مستشفى التأمينات ........ لما قلت له الأعراض سوى لي تحاليل وطلعت النتيجة ان عندي نقص حاد في فيتامين د نسبته 7 والمفروض يكون من 100 إلى 70 وقالي أن نقص فيتامين د خطير وله دور في مناعة الجسم وعشان كذا نقصه يؤدي لكل هذا ........ وصفي حبوب اسمها ون ألفا عبارة عن فيتامين د مركز وحبوب اسمها : اوستيو كير عبارة عن كالسيوم مع فيتامين د وصار لي الآن تقريبا 5 أشهر استخدمها والحمد لله تحسنت وقال لي التحليل بعد 6 اشهر لأن فيتامين د ياخذ وقت لما ترتفع نسبته في الجسم ............... وحملت اللحين وتعبانه لأن الجنين يمتص فيتامين د ........ وبصراحة خايفة على الجنين وعلى نفسي من هذا النقص ادعوا لي الله يجزاكم خير ولا تتهاونوا وسووا التحليل اللحين قبل بكرة .........

والله يشفي جميع المسلمين والمسلمات يارب

هذه اسئله واجوبه العضوات

المشاركة الأصلية كتبت بواسطة **ام سامر**
الله يشفيني ويشفيكم ومرضى المسلمين ..
بسألكم ..هل ضيقة الصدر من اعراض نقص الفيتامين د لان عندي نقص وفيني الم فضيع بعظامي وخاصه مفاصل الركب وقريت مشاركات الاخوات ويذكرون فيها الضيقه وانا دايم تجيني ضيقة صدر من دون سبب يعني فجأه

نعم أختي يسبب ضيقة صدر وبقوة بعد ياربي لك الحمد ربي يشفينا شفاء لايغادر سقمآ

@@@@@@@@@@@@@@@@@@


اهلين حبيبتي سلاف الله يجزاك خير ويجعل ماتكتبين في ميزان حسناتك

بسألك هل ضيقة الصدر من اعراض نقص الفيتامين لان عندي نقص وآخر مره حللت طلع 23 يعني ان شاء الله بسيط الله يوفقك ردي على سؤالي
مشكووووره

والله أنا كان فيني ضيقة صدر وقلق وكآبة وعصبية والحمدلله من ارتفع الفيتامين عندي خفت بشكل كبير والرقية والأذكار لها دور كبييير لاتهملينها

@@@@@@@@@@@

* أعراض نقص فيتامين D :
- آلالام غريبة بالجسسسم .
- آلالام بالمفاصل والعظام والعضلات .
- أحياناً آلالام بالحوض .
- خمووووول .
- غثيان .
- كدمات بالجلد .
- في الحالات الشديدة ضعف بالعضلات .
- اكتئاب .
- التهاب الحلق .
أعراضه تختلف من شخص لآخر يعني مو شرط كل هالأعراض تحسين فيها
في حالات النقص الشديد ممكن يصير تشوه بالحوض ويصير تعسر بالولادة الطبيعية لاقدر الله.

اهلين مشمشه

نسبة النقص عندي 5
تعبت اسبوع كتمة ضيقه اكتئاب فقدت الشهيه للاكل والنوم
ومن مستشفى لمستشفى ومافي اي نتيجه حالتي كل مالها في تدهور
وبفضل الله ثم بفضل اخت زوجي هيا اللي قالتلي لازم تروحي تحللي عنوو

علاجي كنت اراجع عند طبيب عام وصرفلي ون الفا مع كالسيوم
وغيرت لدكتور باطني غير لي العلاج واعطاني نقط vi de 3

والحمدلله على كل حال

بسألك. ايش اعراض جرثومة المعده وكيف التحليل عنها دم ولا منظار
كثير يقولولي روحي اكشفي ع المعده يمكن يكون منها