سما العيون
ياقلبي حنا مرافقات لأزواجنا لذلك تشوفين ماعندنا خلفية
والا والله نخدمك من عيونا انا عارفه انك مضطره هاليومين
و ودك تجمعين معلومات تهمك لكن تعرفين المرافقات شغلتهم سوالف وبس
واللي تتطور فيهم وتتسنع تدرس لغة لكن حبيت اقولك ياليت تدقين على السفارة
الماليزية في الرياض و تستفسرين منهم لأن شغلة الفيزا لازم يجاوبك احد عنده خبر
مؤكد وانا اذكر عندنا وحده جايبه سواقها معها من جده وامورها تمام ومرتاحه
لكن لاتزعلين يالغاليه وانتي سألتي اذكر عن الاغراض اللي تجيبينها و قلت للغزالة امهليني
وان شاءالله راح اكتب لك رد كامل اختاري منه اللي تبغينه على حسب حاجتك

وبالنسبة للسوالف هنا ترى حنا مانعرف بعض
انا اعرف فراشة البيت كانت جارتي عن بعد وام عبدالعزيز جارتي عن بعد اكثر واكثر
والحبوبات الثانيات تعرفت عليهم هنا عن طريق الملتقى

ولو تقرين الملف بالكامل تشوفين بداياتنا
حياك الله معنا يالغاليه وتشرفنا انه زاد عدد الحبوبات
اهم شي لاتشيلين بخاطرك شي ولا تظنين ان عدم الرد تطنيش لكن كل وحده تقول يمكن تجي وحده ثانيه عندها اجابة وترد عليها وهكذا ..

شكرا لك اختي الراحله لانك رديتي علي وعبرتيني والله يجزاك خير

الاغـــــــــــــــــــــــــراض بالتفصــــيل :

1- ملابس لك ( لبس بيت - بيجامات - قمصان نوم - لبس انيق للإجتماعات - جلابيه )
وكافة متعلقاتها اللي تهمك مثل جزمك واكسسواراتك
( الملابس الانيقة هنا غير موجوده و ان وجدت فهي غاالية ولا تناسب سعرها
الجزم موجوده هنا واسعارها مقاربة جدا للسعوديه مع فرق ضئيل طبعا مااتكلم عن الماركات العالميه
مثل فندي وشانيل وديور لا اتكلم عن فيور وفيتشي وطقتها
الاكسسوارات موجوده لكنها اغلى من السعوديه
قمصان نوم مافيه شي حلو اغلبها اندروير و الا اشكال بدائية جدا

2- عطورات و اغراض الجسم هنا موجودة العطورات اسعارها جنونية بسبب الضرائب الحكومية
اغراض الجسم موجود هنا بودي شوب و منتشر في كل مكان واغلى بشي بسيط و فيه عندهم صيدليه كبيره
متوفر فيها سكرابات ومرطبات وكريمات واسعارها حلوه ومناسبة لكن اذا متعوده على شي معين جيبيه معك وبالذات كريم جليسوليد الاحمر تعبت مالقيته هنا ولا تنسين مكياجك اللي متعوده عليه جيبيه معك ولا تنسين العود وسجادة الصلاة والجلال

*** نصيحة جيبي معك دلكه سودانيه بدون ريحة بصراحه فضيعه تخليك قطعة زبده
تمشين على الارض من النعومة

3- ملابس الاطفال جيبي ملابس عملية مثل حقت سيتي بلازا موجود ملابس عملية هنا
لكن اسعارهم غاليه شوي و الخامه ماتسوى والجينز الزين هنا غالي وفيه شي رخيص مره لكن بسيط جدا جدا
و ملابس حلو للإرتباطات او الاجتماعات مع اغراضها من جزم وشرابات بالذات
لأنا تعبنا مالقينا شرابات زينه ابد ولا جزم حتى اللي لهم سنوات في ماليزيا نصحوني بالجزم بالذات
طبعا اذا كان ولد اما اذا كانت بنت فيه هنا ملابس للبنات تجنن وتاخذ العقل و اغلبها اسعارها حلوه
لكن الكشخه اسعارها غاااليه يعني جيبي على حسب حاجتك


4- المواعين جيبي طقم سفره صغير انا شريته من المخازن الكبرى انيق وناعم ب50 ريال
هنا اطقم السفره غااليه و اغلبها يبيعونها بالقطعه

يعني باختصار المواعين هنا ناااار و الاجهزة الكهربائية فلذلك جيبي معك :

( طقم سفره - قدور - قدر ضغط - حافظة للأكل - زمزميات - سكاكين و ملاعق - بيالات وفناجيل
دله و ابريق - مقلايات تيفال زي حقة البيض واكبر منها - صياني قزاز بايركس لكن خذي مارينكس ممتازة وربع السعر - صياني كيك موجوده هنا واغلى شوي من السعوديه - سفر " سماط " - مغارف - مبخره للعود )

الاجهزة الكهربائية :
عجانة - فرامة مولينكس الصغيره - قلاية كهربائية - مايكروويف صغير )

الاكل بالنسبة لي :
طحينة حلواني - تمر - مكسرات - بهارات مشكله - بهارات حب مسمار قرفه ... - جريش

طبعا هذي الاغراض هي اللي كانت تهمني و كنت اتمنى انها معي
اختاري منها على حسب حاجتك ولا تشيلين هم العفش
اما انك تشحنينه مع شركات شحن او تاخذينه معك
جارتي جابت معها على الخطوط السعودية 15 كرتون غير الشنط 4 كبار
وماشاءالله وصلت وفعلا ارتاحت تقول اهم شي عندي اوصل انا وعفشي سوى

سما العيون
والله ماعندنا خبر انتي لازم تسألين السفارة الماليزيه بالسعودية
او كلمي السفاره السعودية في ماليزيا علشان يعطونك خبر
بس انتبهي من الفيز
لانهم عذبونا تعذيب هنا على الفيزة اقصد فيزة زوجة تخيلي وصلو الى انهم قالو خل زوجتك تدبر عمرها تسافر برى ماليزيا لاكن الحمدلله بالدعاء ربي فرجها وتدخلت فيها السفارة السعودية ومشى الحال الحمد لله

واااااااااااااء << ترى هذا بكاء

تصدقون لازم تجينا وحده كل فترة تفتش البيت
ليش مدري ؟؟
شكلهم عندهم زيادة عدد ويبون يصرفون انفسهم بالوظايف
و اخترعوا ذا الوظيفة

عساها يارب ماتجيني ابد ابد والله مدري وش ابسوي
خاصة الحوسة مع الطبخ والنفخ الله لايحرمنا الاجر

وش اخباركم صدق بنات عندكم عيد في ماليزيا؟
وش بتسوون في العيد ان شاءالله على خير ؟

اقول سولفوا وش اخر اخباركم مو تطلون وتطلعون
ابي سوالف وسعة صدر

طيب لا تسولفون على الاقل صيحوا هنا نفسوا عن انفسكم <<< احلى يالقوية