صباح الخير للجميع ومشكورين كل الي دعوا لي عصفوره
ريما مس كنده سروبه وكل البنات
طبعا مانمت للان مو جايني نوم قلت اكتبلكم الي صار معاي
زي مانتوا عارفين يوم الثلاثاء نزل علي دم ووقف طبعا قبل ماينزل احس نفخه مو طبيعيه ببطني بالذات جهة المبايض واعلى البطن ويوم الاربعاء في النهار رجع بني طبعا البني مستمر معاي من اكثر من 20 يوم عشان كذا بدات احس ان الحمل مو سليم بالرغم من ان الوحام هالكني
الاربعاء في الليل كنت جالسه مع بنتي وزوجي في الصاله وزوجي يستعد بيخرج لصلاة العشاء وفجاة احس بنفس الانتفاخ الي حسيته يوم الثلاثاء قمت وقفت وقلت لزوجي احس بنفخ الله يستر مايجيني نزيف والله يابنات ماكملت كلامي الا ويخرج علي دم احمر رحت الحمام وغيرت وكان كل شويه يزيد ومعليش على الوصف بس والله لاننا نحتاج تجارب بعض
بعدين صرت كل شويه اروح الحمام وفجاه صار ينزل قطع في الاول يمكن حجمها 4 سم وجلست فتره ورجعت الحمام ولا ينزل علي قطعه اكبر ونفس الشي اربع مرات اروح وتنزل علي في كل مره قطعه طبعا هو شكله دم متجمد او اه ما قدرت اعرف بس اخر قطعه والله كان حجمها يمكن 10 سم او تقريبا بطول الكف بس انحف شوي طبعا بعد هذا كله قلت لزوجي شكله اجهاض واكيد نزل الجنين كيف يصمد بعد دا كله وقف الدم من البكره يمكن الساعه 9 صباحا
وطبعا اجازه الافندي زوجي مانام الا بعد الفجر يعني ماراح يقوم يوديني الدكتوره وكنت طول اليوم تعبانه وجاتلي دوخه واعياء موطبيعي وبعد المغرب رحت الدكتوره وحكيتلها الي صار معي وكان ردها :
الدكتوره: اه دا اكيد الجنين بدا ينزل
امسيان : دكتوره بس الدم وقف
الدكتوره: اه وئف اومي اومي خلينا نسوي تصوير هاه المثانه مليانه
امسيان: لا لان الوحم تاعبني ما اقدر اشرب مويه كثير الا اقوم ارجع
الدكتوره : معليش حنشوف
وحطت الجهاز على البطن وطبعا عشان المثانه مو مليانه يدوب بين كيس الجنين
الدكتوره: مش واضح كتير بس هو شكله بدا ينهار
طبعا هي قالتها بالانجليزي للسستر مو داريه ان لغتي ممتازه في الانجلش
امسيان : دكتوره انا تعبت نفسيا وجسديا ابغى اعرف وضعي خلاص سوي تصوير داخلي طالما انه مافي دم وكمان انا مستعده ومهيئه نفسي لكل شي
الدكتوره : عاوزه تصوير داخلي متاكده
امسيان : ايوه
الدكتوره: خلينا نشوف كده الله الله دا فيه بيبي الله الله دا فيه نبض ___ يحيي العظام وهي رميم____يحيي العظام وهي رميم
بصي انتي شايفاه
امسيان : ايوه شايفته بس دكتوره كيف الحجم ؟؟؟؟ كيف شكل الكيس ؟؟؟؟؟؟؟؟؟
الدكتوره وهي تخرج السونار على طول : مالكش دعوه بكل ده دا فيه بيبي دا فيه نبض دا انا كنت فاقده الامل فيه من الاسبوع الي راح ياشيخه انتي ارتاحي والبائي على ربنا مفيش حركه نامي على ظهرك وراحه تامه .
وانتهى المشهد
واخيرا كتبت لي ابر مع التحاميل الي انا اخذها ابره كل 3 ايام وطبعا مازالت تنزل علي افرازات بنيه .
معليش طولت بس حبيت اذكر كل الي صار معي وانا اتكلت على الله وسلمت امري اليه
دعواتكم والله يوفق الجميع

مبررررررررررررررررررررررررررررررررررررررررررررررررررررررررررررررررررررروك يا قلبي امسيان ورب الكعبه فرحت لك والله يرزقك شوفته بين يدك وحاسه مثل احساسك يوم رحت مرتين ومافي نبض كان صغير وقتها بس ما قنطت من رحمه الله حسبي الله لا اله الا هو عليه توكلت وهو رب العرش العظيم

امسيان والله والله كنت حاسة انه حملك سليم ماشاء الله تبارك الله
وامس قلت لك اذا زاد الوحم معناه فيه نبض
الف الف مبروووك خليكي مرتاحة وباذن الله الابر رح تخفف من الافرازات
الله يثبت حملك يارب 9 اشهر وتوصلي للتاسع متلي وتملي وتقولي يارب متى بولد خخخخخخخخ
عقبال مانتطمن على الاوركيدا

خطورة ربي يتمم حملك وتطمني على البيبي ويلا كلها كم يوم ويروح الوحم بالشهر الرابع ورح تحسي حياتك كلها تغيرت باذن الله

حلومة الله يتمم لك بخير وانا معك بالنسبة للمثبتات للاسبوع ال 12 افضل
اما خبر ولادتي حاسة انه رح يبقى ببطنني 9 اشهر كمان>>>>>>ماعندي امل بالولادة خخخخخخخخخخخخ