سلام ورحمة الله
حبيت انقل لكم تجربتي مثل باقي الاخوات اللي بادروا قبلي بطرح أفكارهم الذهبية في التجهيزات الرمضاية لا حظت ان البعض كان يوقف عند معرفة اشياء صغيرة مثل متي يثلج الشي وشلون طريقة حفظه وأكيد من خلال الردود اللي قرأتها ماكانوا البنات يقصرون
براويكم بعض الصور حق تجهيزاتي واللي عندها اي سؤال اني حاضرة للاجابة
1- بالاول سويت خلطتين لحشو السمبوسة الاول باللحم المفروم والثانية بالجبن الشيدر مع الخضار وحشيت بهم ورق السمبوسة الجاهز وزعتهم في صينية وثلجت القطع بعدين جمعتهم في علبة بلاستيك
وكتبت على كل علبة نوعية الحشوة
2- عجنت عجينة فلافل وخلطتها بالكامل وبسأستخدام الملعقة الخاصة بالفلافل عملت الاقراص ووزعتهم في صينية وثلجت القطع بعدين جمعتهم في علبة بلاستيك
3- عملت فطاير جبن بعجينة قلي وحشيتهم بالجبنة المالحة مع الزعتر والنعناع وبنفس الطريقة ووزعتهم في صينية وثلجت القطع بعدين جمعتهم في علبة بلاستيك
واي نوع من هذه الانواع وقت اللي احتاج ليه أذوبه بالمايكرويف او اتركه يفك تماما بعدين اقليه في الزيت
4- عملت عجينة فطاير وسويت منها بيتزا بالجبن والخضار و بيتزا زعتر مع فطاير سبانخ ودجاج خبزتها نص خبز علشان الخميرة تنفش وبعدين وزعتهم في صينية وثلجتهم بعدها حفظتهم في العلبة البلاستيك وكل علبة عليها اسمها
وهذه طريقتها وقت الحاجة ان أذوبها بالمايكرويف او اتركه يفك تماما بعدين أخبزها بالفرن لمدة 4 - 5 دقائق قبل التقديم
5- عملت كفته لحم وعملت منهم كور وبنفس الطريقة وزعتهم في صينية وثلجتهم وقبل التقديم اتركهم يفكوا او اذوبهم بالمايكرويف واقليهم في شوية زيت
6- معتادة يوميا اسوي سلطة انضجها بالبخار بدل الصالونة لآن اني وزجي ما ناكلها على هالاساس خذيت الخضار الي عادة ما استخدمها ( كوسة ، قرنابيط ، وجزر ) غسلتهم وقطعتهم ووزعت في الاكياس البلاستيك في كل كيس مخلط من الانواع الثلاثة وقت الاستخدام ماعلي الا أشيل الكيس ومباشرة علي البخار وفي 10 دقايق تكون سلطتي جاهزة
وحاضرة لكم لأي سؤال