Al-Farasha @al_farasha_1

كبيرة محررات

تجهيزات البيبي بالصور

شفت الموضوع هذا بمنتدى اخر للعضوه ام اسكندر و حبيت انقله لكم حتى تعم الفائده

السلام عليكم

ياليت تخلوا الموضوع متجدد بنصايحكم
لانه كثرت مواضيع ( شنطة الولادة ) ( شنطة المستشفى) ( قائمة تجهيزات المولود)
مع ان في اختلاف بحاجاتك عن حاجات غيرك
ولازم تخلي ببالك ان المواضيع هذي ما تنطبق على أي طفل
لان هناك فروقات بين احتياجات المواليد
سأذكر لكم هنا بعض الفروقات في بعض التجهيزات:

- مقاس new born
الكثير ينصح انه لا تاخذي مقاس نيو بورن عشان ان المواليد خلال فترة الاربعين يكبروا بسرعة
لكن <<<< ركزي هنا ... في اطفال يولدوا خدج قبل موعدهم ويكون حجمهم مررررررررة قليل يعي حتى نيو بورن كبيرة عليهم
وفي اطفال يولدوا مكتملين في نهاية التاسع بس وزنهم يادوب 2 كيلو<< زي ولدي مابدأت البسه مقاس 0-3 الا لمن صار عمره شهرين
باختصار: لو كنتي عارفة ان وزن جنينك قليل اشتري ع الاقل بدلتين نيو بورن تمشي فيهم فترة الاربعين

- المقاسات ( بشكل عام)
قبلما تتورطي بالشراء ولمن توصلي البيت يطلع المقاس اصغر من السن او اكبر منه .. تأكدي في المحل
افتحي البدلة في المحل ولاحظي طولها
لان احيانا يكون مكتوب من 0-3 والبدلة بالعافية تجي ع الطفل لعمر شهر بس
واحيانا تكون مكتوب من 0-3 وهيا كبيرة بنفس مقاس 3-6
في بربتوز اشتريته مكتوب عليه 12 شهر << جاء على ولدي لين صار عمره 5 شهور بس

وفي بربتوز مكتوب عليه نيو بورن ومع ذلك لبسته ولدي لين صار عمره 4 شهور.

لأن بعض شركات تصنيع الملابس تخطئ في تقدير العمر لكل قطعة وأيضآ لاتنسوا اوزان واحجام كل طفل تختلف عن غيره

- المرايل ( الصدريات)
قد تحتاجيها بكثرة يعني تشتري درزن 12 حبة
وقد تحتاجي 2 بس
والسبب .. ان بعض الاطفال يستفرغوا الحليب بكثرة , وبعضهم الله يحفظهم ما يرجعوا ابدآ او يستفرغوا كمية بسيطة جدا مجرد نقطتين تمسحيها بمنديل وانتهينا

- المهادات – الكوافل – القماط. << بكل اللهجات
احتياجك منها يختلف عن غيرك
على حسب هل هناك من يغسل لك الملابس كل يومين << هنا لا تحتاجي غير 2 أو 3 فقط
وعلى حسب هل طفلك يرجع الحليب بكثرة
وعلى حسب هل انتي ناوية تعودي ولدك على اللف دايمآ! لان بعض الامهات تلف ولدها فترة الاربعين بس
وعلى حسب ايضآ انه هل ناوية تشتري بدلات من الاطقم اللي تجي بربتوز وطقمه مهاد.. يعني مايحتاج تزيدي تشتري مهادات ثانية لوحدها

وياليت تاخذي الوان فاتحة قريبة من الابيض دائمآ عشان ماتسمر طفلك

- الشفاط
في حريم كثير ما استخدموه واشتروه ع الفاضي لانهم اعتمدوا ع الرضاعة الطبيعية
يعني البعض مجرد احتاجوه اول اسبوع عشان البيبي دايما نايم والحليب يتجمع , وممكن تستعيضي عنه بالعصر باليد لتخرجي الحليب بكل سهولة لو تعودتي

- الرضاعات
الاحظ كثير في صور تجهيزاتهم اشتروا رضاعات بلاستيك مع انه مضرة للطفل خصوصا عند غليها الدائم لتعقيمها
مش ضروري لمن تدخلي مذركير انه تخرجي برضاعة AVENT
ومش ضروري لمن تدخلي اي صيدلية تخرجي برضاعة PIGEON ورضاعة CHICCO

؟؟؟؟!!!!!

ياجماعة لا تشتروا الا رضاعات قزاز ( زجاجية) عشان ماتتفاعل مع السوائل اللي داخلها وماتتضرر مع الغلي والتعقيم وتخرب ويخرب الحليب

وماله داعي ست او سبع رضاعات تشتريها

يكفي 2 رضاعات تشتريها اثناء تجهيزاتك وانتي حامل

وبعدين لمن يجي البيبي حتحكم الظروف لانه قد يعتمد على الطبيعي فقط

- مقاس حلمات الرضاعة(المصاصات)
ركزي ياحلوة انه في مقاسات لحلمات الرضاعة
احيانا تجي بارقام (1,2,3)

واحيانا بحروف ( ( S,M,L

طبعا الرضاعات اللي تشتريها تجي حلماتها مقاسsmall يعني (S) غالبآ , واذا كنتي تعتمدي الرضاعة الطبيعية وتستخدمي الرضاعات استخدام محدود للشاي والاعشاب يعني ماتغليها الا مرة او مرتين في الاسبوع فربما ماتخرب الحلمة الا بعد شهرين او 3

اما اذا كنتي تعتمدي الرضاعة الصناعي وتغلي الحلمات يوميا فأكيد بتخرب الحلمة بدري

طبعا خرابها يعني تغير لونها او تصير لزجة تلتصق ببعضها وتلتصق الفتحة كمان فتنغلق

لذلك لمن تجي تشتري حلمات زيادة لمن يكبر طفلك اشتريها مقاس M أو L عشان ربما لن تستخدميها الا بعد شهور عندما تخرب الاصلية اللي جات مع الرضاعة

- اللهاية

لا تستعجلي بشراء لهاية او اكثر الا اذا كان نيتك تعودي طفلك من بدري

لان اللي تجي تعود طفلها بعد عمر شهر يرفضها في الغالب

- مناديل الاطفال المبللة
ياشيخة صح حتحتاجيها عشان لمن يكون في عندك ضيوف او لمن تخرجي برا ..بس هيا الخراب اللي تسبب تسلخات للطفل فترة الاربعين لان الام تعتمد عليها في مسح فضلات البيبي وماعاد تغسل له مؤخرته بالماء الا مرة باليوم لمن تروشه

يا امهات خلوكم رحيمات بأطفالكم وغسلوا لهم مؤخرتهم بالماء بعد كل تبرز عشان مايتسلخوا
يعني لا تتسرعي وتشتري مناديل بكميات كبيرة لانه ربما تضطري تتركيها لو تسلخ طفلك لاقدر الله

- الشراريب ( الجوارب)

لاتسووا مثلي اشتريت شراريب بكميات كبيرة مقاس مولود .. ونسيت اني اخذت بربتوزات من اللي تجي كاملة تغطي الرجول!!!

والان الشراريب جديدة ولله اغلبها ما استخدمتها لان بدلات ولدي ماتحتاج!

خذي احتياجك وانتي تقضي بما يتناسب مع ألوان البدلات اللي اشتريتيها

يعني خلي الشراريب اخر شي تقضيه عشان تشوفي ايش الالوان اللي تحتاجيها بالزبط وكم العدد اللي تحتاجي

- الجو

ركزي على كيف حيكون الجو في تاريخ ولادتك وكذلك في تاريخ وصول ولدك الى مقاس 3-6

لان في بعض الامهات يوم يقضوا ياخذو كام بدلة من مقاس 3-6

ركزوا ع الجو عشان ماتشتروا شتوي وماعاد تستخدموهم أو تشتروا صيفي والجو بارد

- فساتين 0-3

بنوتتك خلال الاربعين حتكون باللفة محد حيشوف كشختها

وكمان المولودة تكون مررررة ضعيفة يعني ما حيبان حلا الفستان عليها وهيا ضعفانة

واحلى شي للمواليد البربتوزات الكاملة وليس اللي تجي قطعتين
لأن البنات النونات مو حلوة عليهم الفساتين ولا البنطلونات
احلى شي البربتوزات الكاملة والافرهولات
واتركي الدلع لما بعد عمر الشهرين

وفي فترة الحبي ما تنفع الفساتين والملابس القصيرة عشان الركب

- منتجات جونسون وغيرها
منتجات جونسون اللي تجي كرتونة المجموعة كلها مع بعض
انتبهي لصلاحية كل علبة داخلة لوحدها
لانه في الكرتونة الواحدة تلقي تواريخ الصلاحية مختلفة لكل قطعة
انا لمن اشتريتها في شهر 1 كان الزيت قربت صلاحيته في شهر 2 والشامبو لسا متأخر سنة
يعني رميت بعض القطع وهيا لسا مافتحت الغطاء
وغيري اشتكى ان المناديل خلاص كانت شبه ناشفة

مانقصد انه لاتشتريها
وانما انتبهي لتاريخ الصلاحية على الاشياء اللي تشتريها من الصلاحية
حاولي انها تكون متأخرة لاكثر من 4 شهور

- البربتوزات الداخلية
افضل ألوانها تكون فاتحة وسادة او بيضاء عشان لا تبين من تحت الملابس

- المدس
اشتري حجم صغير لان البيبي المولود صغير مرررررة وممكن يضيع جوا المدس
وعلى فكرة المدس الكبير بدل ما يخلي شيل البيبي سهل.. يصير مرة صعب ويخليكي تخافي تحمليه

- الماركات
الكل يقدر شوقك لتدليع ولدك بأحلى الماركات بس لاتنسي ان البيبي خلال الاربعين يكون باللفة محد يشوفه ويكبر بسرعة يعني مايلحق يلبس البدلة الا مرة او مرتين

وكمان ما حتظلي تلبسيه اياها يوميآ لكل ضيفة تجيكي.. ضروري تنوعي كل يوم وتلبسي ولدك غير عشان يمكن تجي نفس الضيفة يوم تاني وثالث وكمان بعض الماركات قد تخرب من الغسيل ويبهت لونها ..وتنقهري لان سعرها غالي بعكس لو قطعة متوسطة السعر خربت ماحتنقهري كثير

وكمان قد تتبقع عليكي ببقعة ماترضى تروح سواء من وسخ او من نقطة دواء او من شي ثاني وتنقهري ع تمنها

بدل قيمة الماركة الغالية خذيله عدة برتوزات حلوة رخيصة لان البيبي ما يكرفها وحتظل جديدة وحلوة عليه

- الهدايا

الهدايا مشكلتها انك ماتقدري تتوقعي ايش حتحصلي

يعني قد ماتشتري بدلات كثيرة للمولود لانه حتقولي اكيد طفلي بيحصل هدايا ومع ذلك تلقي انه كل الحريم اهدوكي بدلات من عمر سنة او سنتين او يهدوكي فلوس

انتي اشتري لطفلك عدد معقول من الملابس لفترة الاربعين لانه ماتعرفي هل سيحصل ام لا

وكله على حسب هل عدد معارفك كثير ام لا.. لأنه لو مثلا انتي انتقلتي بعد زواجك لمدينة جديدة اكيد معارفك قليل وضيوفك في النفاس حيكونو قليل يعني لاتعتمدي على الهدايا كثير

وكمان خلي في بالك ان في حريم يحبوا يهدوا جلاسة (هزازة)

احيانا تحصلي في نفاسك 2 أو 3جلاسات

لذلك لا تستعجلي بشراء جلاسة او عربية خروج او كرسي سيارة او مرجيحة او مشاية او كرسي طعام لأنه ربما تجيكي هدية

وخليها لمابعد الاربعين

اكتفي بشراء الاساسيات مثل بيت الطفل( سلة موسى) وسريره وملابسه ورضاعاته وخلاص

حتخرجي كثير من بعد وتقضي اللي ناقصك

اضرب لكم مثال بأشياء تكدست عندي : البربتوزات الداخلية لانه اشتريت 9بربتوزات ولقيت وسط هدايا الطقوم 8 بربتوزات لانه يجي بربتوز داخلي تبع اي بدلة

وما احتجت استخدم الا 6 بس

- عدد ملابس البيبي اللي تحتاجيها
يعتمد العدد على وجود من يغسل لك الملابس من عدمه

يعني اذا في حد يساعدك ويغسل لك الملابس كل يومين او 3 أيام ..فماتحتاجي عدد كبير من المهادات والملابس

زي اللي تنفس ببيتها وعندها شغالة

او اللي تنفس ببيت اهلها اكيد شايلينها هيا والبيبي على راسهم من فوق

- طفلك 6-9 شهور

خلال هذا العمر يبدأ الاطفال بالحبو( الزحف) على الارض

فحبذا لو ابتعدتي عن شراء الشورتات في هذا العمر وقمتي بشراء بناطيل كاملة تغطي الركبة لكي لا يجرح ركبتيه خلال حبوه أو اشتري له واقيات الركبة للاطفال اللي يحبوا من أي محل اطفال

- الازرق والوردي والالوان الداكنة

اول ماتعرف الام انها حامل ببنت تلقيها نزلت السوق اشترت كل شي وردي

والامر نفسه مع اللي حامل بولد تشتري كل شي ازرق

اعتراضنا هنا مش على اللون .. انما على درجة غمق اللون

يعني لاتاخذي مهاد( كوفلة) لونها بالكامل ازرق لانها تسمر الطفل

وخصوصا ان الاطفال في الاربعين كل يوم بلون ومع البكاء تلاقيه احمر واسمر

المهادات البيضاء او اللي يغلب عليها الالوان الفاتحة تفتح الولد

وكمان ابتعدي عن الالوان الفاقعة في اللبس عشان ماتسمر طفلك

- جلابيات النفاس

لمن تشتري ارواب للرضاعة ( التي تأتي بفتحات مخفية لاخراج الثدي) لا تركزي على الشكل الخارجي فقط انما ركزي على ان الفتحة كافية فعلا لخروج الثدي لانها احيانا تكون صغيرة جدا

او اشتري ارواب بأزرار افضل.. وانتبهي انه ضروري تكون اكثر من زرارين اثنين

7

7

7

عموما ان شاء الله تستفيدو من كلامي

واللي معاها أي اضافة لاتبخل علينا فيها

ترى انا هذا اللي طلعت فيه بعد اخطائي في تجهيزاتي لولدي اللي عمره حاليآ 6 شهور

والله يحفظكم ويحفظ بيبيهاتكم

ملاحظة: الموضوع جهد شخصي وياليت تثروه باضافاتكم ونصايحكم لكل واحدة تجهز

وايش هيا الاخطاء اللي وقعتوا فيها اثناء التجهيز وما احتجتوها بعد الولادة

76K

يلزم عليك تسجيل الدخول أولًا لكتابة تعليق.

تسجيل دخول

مي موي • 13 سنة

يعطيكي العافيه

Al-Farasha • 13 سنة

ولدي حاليا عمره 6 شهور وصورت لكم اغراضه اللي مازالت موجودة معي عشان يمكن تستفيد كل بكرية وتاخذ فكرة عن مايلزمها ..

وللعلم انا ما اشتريت اشياء كثيرة للمولود لان معارف اهلي كثير وتوقعت هدايا كثيرة

وفعلا حصلت مايقارب 50 هدية

و راح احط لكم الصور حق حاجات ولدي مع الشرح لكل صورة ايها اشتريتها وأيها جات هدية وايها فادتني وايها مجرد مضيعة للمال

مع العلم انها ليست كل ما استخدمت لاني تخلصت من بعض الملابس

واحتفظت بهذي الباقية عشان لو حملت ثاني

ملابس 0-3 شهور

بربتوزات داخلية من مكتوب عليها 3-6 لكن مقاسها الفعلي هو من 0-3

بربتوزات خارجية اشتريتها مقاس NEW BORN لان خلال حملي قالولي ان ولدي وزنه قليل وكمان ولدته قيصري بموعد محدد بنص التاسع يعني يادوب كان زايد على 2 كيلو بشوية جرامات

هذاالبربتوز من CARTERS مكتوب عليه NEW BORN بس لبسه ولدي من عمر شهرين حتى 4 شهور
روووعة مايتغير مع الغسيل ولا يحتاج كوي
كان هدية من واحدة الله يخليها

هذي بجايم شورت
بس الصراحة حسيت الشورت مايناسبه كثير ولو كانت كاملة او بربتوز لكانت احلى
وكمان ولدي اسمر .. ماكان يطلع عليه الشورت حلو لاسمرار رجوله

هذي جاءت هدية بس ما استخدمتها لولدي لاني لاحظت انها بناتية !!!

بس احتفظت فيها عشان اهدي أي نفاس ببنت ازورها

هذي اشتريتها له وطلع فيها كيووووووووت

بجاايم من 0-3 وهي اكثر شي استخدمته بعد النفاس لاني رجعت لبيتي وماكان في لا ضيوف ولا كنت ازور احد

3 بجايم اشتريتها
و 2بجايم هدايا مع اطقم

هذي بلايز اشتريتها بلون سادة عشان يناسب أي بدلة

هذي اطقم جاءت هدية كمان

لسا ما استخدمتها وناوية ارجع اهديها

صورتها بكرتونها, وفتحتها كمان عشان اصورها لكم

..سُلاف.. • 13 سنة

جدا رائع موضوعك ..
ونصائحك في محلها ..
أيام ولدي غلطت .. اخذت كل البربتوزات من 0-3شهور وقضيت له كثير حتى ملابس لـ 6شهور
وبالاخير جلست ماانلبست وحست فيه خلال الاربعين كلها كبير وخليت اخواتي ينزلو يجيبولي نيو بورن .
والملابس ايلي اخذتها لـ 6شهور كانت شتوية ووقتها صيف ..

عشان كذا بهالحمل .. اخذت بس حق الاربعين ..نيوبورن ومن 0-3شهور
وبعد الاربعين حأنزل أشتري لها ملابس حسب حجمها والجو .

..سُلاف.. • 13 سنة

مرة حلوة اغراض ولدك ماشاءالله .. يتهنى فيهم
وذكرتيني بنفسي كنت اخذه الجلاسة واللحاف والعربية اثناء الحمل
وبعد الولاده جاتني هدايا وجلست مااستخدمها ..

Al-Farasha • 13 سنة

نجي للمهادات

بعدما اشتريتها لاحظت انه لافائدة من المثلث حق الرأس اللي يغطي الرأس كالطاقية

زي اللي في هذي الصورة

من الافضل انك تشتري مهاد بدون غطاء الرأس

هنا مهادات عادية بدون غطاء للرأس ويجي تبعها رباط
(اللي فيه لون ازرق كان هدية)

هنا مهاد ثقيل اشتريته للخروج
مرررة حلو للخرجات وكشخة وكمان يناسب من لمن تبدأي تخرجي طفلك بدون المدس

لين دحين لسا ما اشتريت لولدي بطانيات
مازلت اغطيه بالبطانيات هذي اللي جات هدايا مع البدلات
مع انا صغيرة بس تكفيه لانه مازال صغير

هذي بطانية جات هدية بس حسيتها مقاس صغير ماعجبتني
برجع اهديها لاي واحدة نفاس ازورها

المنشفة الزرقاء اشتريتها واستخدمتها
اما الليموني جات هدية ولسا ما احتجتها واغلب الظن اني بحتفظ فيها لين اهديها او استخدمها

هنا مناشف صغيرة وكمان ليف للترويش

هنا بيت للرضاعة كلهم جاءوا هدايا ضمن اطقم الملابس

هذي المرايل اشتريت 4 بس والباقي هدايا ضمن اطقم الملابس