تجهيز شنطة الام والطفل للمستشفى

السَّلامُ عليكم بنات شخباركم
بعد ماجهزت شنطتي وشنطة البيبي حبيت اعطيكم لسته للاشيا اللي ممكن الام تحتاجها
اولا قسمت التجهيز ل٣ شنط
الصغيرة: لاغراض البيبي (المستشفى)
الوسط: اغراض الام (المستشفى)
الكبيرة: لفترة النفاس عند امي وفيها المتبقي من اغراض الام والبيبي
شنطة المستشفى للام:
- الملابس :
* لبس الاستقبال+ سلبرات+شيلة +عباية اضافية
- ملابس داخلية
* ( ستيان رضاعة/هافات قطن/ مشدات/ سراويل قطن طويلة / فنايل قطن/ روب خفيف /و روب ثقيل/ لحاف خفيف)
- ادوات شعر
* (فرشة/ربطة/ عضاضة/تاج/مشابيص)
- نظافة
* (فرشة اسنان/معجون/مقراض/ديودرنت/شامبو/صابون/عطر/مسك/حفاضات اولويز/ فوط برايفت/غسول طبي/ليفة/معطر جو/مناشف صغيرة وكبيرة)
- عناية
* (مشدات/دلاغات/بايو اويل/ كريم مرطب/ كريم للحلمات/كمادات دافية وباردة/من العطار مره وملح فارسي/وزيت جوز الهند الطبيعي)

- وماننسى شاحن للجوال + شنطة المكياج اليومية تاخذينها اخر شي معاج
واهم شي بعد لاتنسين مرطب الشفايف لان شفايفج دايما تكون جافة وقت الولادة وبعدها
واي ادوية انتي مستمرة عليها اخذيها معاج
والاشيا اللي تستخدمينها يوميا مثلا نظارة او عدسات اذا نظرج ضعيف
اذا تحبين تصورين ودي كاميرا
شنطة البيبي :
حطيت فيها الاساسيات وسكرتها من زمان اول ماخلصت اغراضه
طريقة ترتيبي لها كانت الملابس حطيت كل بربتوز داخله حفاضة ولبس داخلي عشان ما احوس اذا جيت ببدل له او اذا الممرضة بتجيبلي
خليت كل الشنطة تقريبا نفس اللون عشان ما اتعب وانا انسق اللبس مع المهاد مع القحفية كله كان درجات الابيض والبيبي بلو
وانا شارية بعد مدسين ولبس ماركة بنفس الالوان فقلت عشان اذا وصخ او شي البربتوزات الباقية تمشي مع المدس
وخليت حفايض احتياطية زيادة ومهادات خفيفة ولحاف
بالاضافة الى مصاصات اصغر شي من افنت ومرضاعة بيجون احتياط لاني ناوية ارضع طبيعي فماكثرت وجبت حليب احتياط ومسحات زيت للحفاضة ومات تبديل الحفاض وباقي الاشيا مثل فوط صغار ومريلة ومناديل مبللة وقطن كبير عشان ابلله اذا ابي انظف حفاضته او وجهه بالاضافة الى كريم الحفاض
وشنطة النفاس:
فيها تقريبا نفس الاشيا بس بعدد اكبر بالاضافة الى الصوابين والمهادات الباقية وحفايض اضافية واكياس تخزين حليب الام وبجامات مريحة اكثر للام وتناسب الرضاعة الخ..
وبس والله اتمنى اكون افدكم وياريت كل وحدة تشاركنا اهي شنو تحط بالشنطة واذا نسيت شي ذكروني