تجيني ( ضيقة ) في هذي الاماكن ( في احد مثلي؟)

السلام عليكم
بنات انا عندي مشكلة من سنوات ...
قبل كل شي ،.. انا انسانة احب السفر والفنادق
والشاليهات والطبيعة وكل شي حلو احبه
دايم اقنع زوجي انه نسافر بررة ... وبحكم
ظروفنا نادرا نسافر ...
لين هنا مافي مشكلة ☝🏽☝🏽
......
المشكلة انه اذا سافرنا ورحنا لفندق تجيني
ضيقة ... وشي يشبه البكاء واحاول اكتم
مشاعري عشان مايحس زوجي ( ويحلف ماعاد
يسفرني ) والله الفنادق من خمس نجوم وطالع
وجميلة وودك تتسدحين فيها بس انا ما اتحمل
... حتى لما نخرج نتمشى وكذا ... واول مايقول
زوجي يلا نرجع الفندق تجيني خنقة 😭
واحياناً اقوله بنزل اللوبي تحت ... واجلس
قد ما اجلس بس برضو متضايقة
بالذات لما ينام زوجي بالفندق واجلس لوحدي
احاول اسلي نفسي بالجوال لكن برضو الضيقة
خانقتني ... واجلس على الشباك او البلكونة
واتفرح في الناس ( احس بسكينة اذا شفت
العالم )
واول ما اصحى من النوم بسرعة ما اتحمل
البس بسرعة وانتظر زوجي تحت
هذا موقف ☝🏽☝🏽
الموقف الثاني ... حتى في الشاليهات والكباين
نفس الشعور ... وربي اني ما اتهنى ويجيني
شعور بالقرف كم شخص نام على السرير ؟؟
ومرة زوجي اعطوة العمل دورة خمسة ايام

بمدينه جدة ومن افخم الفنادق ... وكنت بطير
من الفرح ودي اكسر الروتين واقوم احزم شنطتي ...
واطير لجدة .. واول ما اوصل الفندق انبهرت
فيه ... لكن جاتني الضيقة واحس متوترة
وطفشت زوجي يلا نخرج يلا نخرج ....
احس مو على بعضي .. كأني مقروصة
حتى التماشي في السفر (اذا كل يوم) تجبلي
الضيقة كأني اقول في نفسي ( وين اروح ؟ )
الفندق مابغاه .. والتماشي تعبت منها ...
هجولة من يوم نصحى لين الليل ( انا احب
كذا ... بس ليش في السفر اتضايق؟)
مع اني وربي في المدينة اللي انا عايشة فيها
لو اطلع كل يوم ماعندي مشكلة
بس المشاكل هذي تجيني في السفر ...
لا تقولوا لا تسافري ... وربي اني احب السفر
وطاريه واحب ريحته .... بس لما اسافر تجيني
ذي الحالة
نفسي اعرف هل هذا طبيعي ؟ هل في احد مثلي ؟
واللي تعرف دعاء يحل هذي المشكلة
ياليت تعطيني اياها

ملاحظة :

هذي الحالة كانت تجيني سابقاً على خفيف

... لكن مع مر السنيين زادت الحالة