تحديث/ عندي مشكلة واطلب رأي محايد

للي مايعرف موضوعي:
https://www.hawaaworld.com/عندي_مشكله_واطلب_رأي_محايد-4875636/post/99253568/count/1/


السلام عليكم


شكراً لكل الي شارك ونصح ووجه. استفدت منكم، وبهذي الأيام الفضيلة الله يسعدكم ويعطيكم خير الدنيا والأخرة.
موضوعي تقريباً كتبته قبل سنة، كنت بوسط مشكلتي ومافكرت صح، الحين لما هديت وبرد جرحي تأكدت ان قراري صحيح بفضل من الله، تطلقت من زوجي برغم عندي طفل منه. مريت بأيام ماقدرت اقوم من سريري من الاكتئاب وبفضل الله ومساعدة اختي قدرت اقوم على حيلي، الطلاق مو فشل اذا انتي انسانه ماغلطتي ولا خدعتي ولا خنتي، اذا انتي نيتك صادقه من قبل بهالزواج، فعناته انتي مافشلتي، الله يجعله اكبر امتحان لي بهالدنيا ولا يصدمنا بعزيز ولا قريب يارب
سبب كتابتي لهذا الموضوع، لـِ أي وحدة تعاني او مرت بشي يشبه الي مريت فيه، أول شي لاتخافين انك تواجهين أي شخص ضرك ، أحيانا سكوتنا عن الغلط بحجة انه نبي الشخص يفهم من نفسه ويتعلم من اغلاطه ، بيرجع علينا بشكل سلبي، وهذا الي صار سكوتي خلا طليقي يتمادى بالغلط ويتواصل معها اكثر ويروح لها ، لو من اول مااكتشفت طربقتها على راسه وطلعت كان يمكن خاف او حس ان الي يسويه بيهدد زواجه.
ثانياً خلي املك بالله كبير ولا تستنين أحد ينصرك على الي ظلمك، وحتى لو عندك اطفال لا تخافين عليهم الي اطعمك هالاطفال بيرزقك القوة انك تحمينهم.
وثالثاً القضاء، لا تخافين انك تلجأين للقضاء لو طليقك قصر بالنفقة على اطفاله،لاتقولين عيب او غلط او وش بيقولون، تكلمي معه او خلي احد يكلمه، لكن لو عابط، روحي للقضاء يفصل بينكم ، مافيها غلط ولا اهانه لأي احد ، مجرد انك حفظتي حق اطفالك وحميتيهم من الجاحه لغير ابوهم.
وأخر شي، رسالة متاكدة انها مو لكثيرين منكم، بس هالفئة للأسف موجودة،
البنت أو المتزوجة الي تكلم شخص مرتبط، خافي ربك واعرفي انه حتى لو بالنهاية اختارك وكسر قلب زوجته، بتدور الدنيا وبيجي يوم تحسين بنفس الأحساس ، ادعي ربك انه تدور على بالدنيا ، ولا تذوقين مر عذاب الأخرة. توبي لله، الله واسع المغفرة، استمرارك بالغلط وحبك للتملك انسان مو مكتوب لك ، يدل على دنائة نفس.
اتمنى اننا نكون دايم راضين عن حياتنا واختياراتنا، والحمدلله من قبل ومن بعد