كيفكم يا حلوات؟ اليوم ببدا معكم تحدي يبغاله عزيمة وصبر وارادة هو حلو وجميل وان شاء الله راح نلتزم بيه مع بعض ونشجع بعض.
هو تحدي تطويل الشعر للضعف ( دبل) في مدة ستة أشهر فقط.
*شروط التحدي سهلة وبسيطة:
١- تكتبي تعليق اشترك بالتحدي وتحطي بالانش طول شعرك طريقة قياس طول الشعر راح تكون برابط باخر الموضوع.
٢- تحفظي صورة الجدول الي بنزله في أخر الموضوع وكل بداية شهر تحطي كم الطول وترسليه ( براحتك لو تعليق او خاص)
٣- لا تبخلي علينا بطريقتك لتطويل الشعر
* عنايتي بشعري لزيادة طوله:
١- استخدم شامبو وبلسم خالي من السولفات
٢- بخفف من استخدام الحرارة قدر المستطاع
٣ - ماراح اسوي بروتين لشعري هال٦ شهور مع ان ماله علاقة ولا يضر طول الشعر بس ابغى ابعد عنه الكيماويات عشان استخدم زيوت براحتي لان حرام الجهد والمال في البروتين والزيوت تفك نتيجته.
٤- راح استخدم طريقة التدليك والراس مقلوب لمدة ٥ دقايق قبل النوم ( والطريقة انك تقلبي راسك وتدلكي يفضل تكون أطراف أصابعك فيها أي زيت تفضليه وتستمري تدلكي ٥ دقايق بعدين تمشطي شعرك) تستخدم اسبوع واحد فقط في الشهر لان لو تعود عليها الشعر تصير ما تعطي نتيجة وما يكون عليكي الدورة وقتها.
٥- راح اعتمد بديل الزيت من قارنير بالافوكادو وزبدة الشيا كحمام كريم احطه على شعري من مرة لمرتين بالأسبوع واخليه قد ما اقدر.
6- راح ابدا استخدام خلطة لتنبيت وتطويل الشعر كالتالي ( ٨ فصوص ثوم، بصلة صغيرة، زنجبيل أخضر، زيت جوز هند، زيت خروع، اي زيوت ثانية تناسب شعرك لزيادة الكمية فقط)
نحط زيت جوز الهند بكمية لا بأس بها ع النار لين يذوب نحط معاه مفروم الثوم والبصل والزنجبيل ونخليه ع النار ينطبخ ٥ دقايق بعدين نحطه يبرد فصحن نحط زيت الخروع ونحط ملعقة من كل زيت نحبه لشعرنا ( يفضل تفادي زيت الزيتون لانه يسبب تساقط للبعض ومو للاستخدام المكثف) الزيوت الثانية اختياري مو شرط اهم شي الخروع وزيت جوز الهند بعد ما يبرد شوي نصفيه معاها ونحطها فعلبة ويستخدم اقل شي ٣ مرات بالأسبوع ( انا استخدمه على الجذور فقط وعادي يستخدم ع الشعر بطوله بس اشوفه ماله داعي لان ريحته قوية وعالجذور يحقق هدف التطويل وتقعد الكمية وقت أطول)
أدوات المشاركة:
طريقة قياس طول الشعر
جدول مراقبة طول الشعر الشهري:
تحياتي وتقديري
