تحذير من فرد الشعر.. تجربتي مع مركزين في الدمام

هاي بنات :26:
أنا شعري بطبيعته كان ناعم وكثيييييير بس مع الأسف من دخلت العشرينات تغير، صار جاف وتموج أكثر :44: لكن الحمدلله على كل حال

المهم، كنت استشور شعري للمناسبات بس بعد ما توظفت من كم سنة صرت مضطرة املس شعري عشان مظهري قدام الزميلات وكذا..
فيه صالون في البحرين ملست عنده شعري من 4 سنين وكانت المادة المستخدمة تقليد على اليوكو بس يشهد الله أن شعري ما طاح ولا تأثر بالعكس كان ناعم وفيه لمعة ومحط إعجاب الكل.. أنا كنت رايحه الصالون على أساس اسوي يوكو وقالوا لي لما كلمتهم بالتلفون ان عندهم اليوكو ولما رحت شفت العلبة غير والاسم يوغو مو يوكو والمادة كورية مو يابانية.. بس اللي سوى لي شعري قال لي هذا المنتج مضمون وما فيه مشاكل وقال ترى اليوكو اللي تبينه كثير يجونا بنات شعورهم معدومة منه ومنتفه ويقولون لنا نعالج لهم شعرهم.. قلت طيب أمري لله.. خليته يسوي شعري بالمادة هذي وكنت خايفة بس الحمدلله ما ضرت شعري أبداً.. بالعكس كان شعري خيااال

المهم، بعدها صار لي تجارب مع عدة منتجات في بعض الأماكن..

أحذركم منها..

ما ابي إلا الدعاء..


أنا عندي خوات سووا يوكو في مركز الرشاقة بالدمام وكانت شعورهم روعة ولا طاحت مع اليوكو.. يعني مجرد التساقط العادي.. وكنت ناويه اروح اسوي في الرشاقة بناءً على تجربتهم وبناءً على نصايح بنات كثير في المنتديات لأن مشغل الرشاقة سمعته كويسه بس صادف يوم رحت لدار اللمسة الأخيرة بالدمام عشان اقص اطراف شعري.. وقعدت اسولف مع الفلبينية اللي تقص لي شعري واسمها (مريم).. المهم في سياق الحديث درت اني ناويه اسوي يوكو في الرشاقة (شوفو الخبث والتسويق الدنيء) قامت تذم في شغل الرشاقة وتقول ان بنات واجد يجونهم من الرشاقة يشتكون بعد ما خرب شعرهم من اليوكو وانها تصلحه لهم بعلاجات وفرد من جديد.. قلت لها غريبة اليوكو في الرشاقة زين وكلن يمدح فيه وعليهم زحمة قالت لا ومصرة على كلامها.. المهم قامت تمدح في اليوكو اللي عندهم وانها هي اللي تسويه وان البنات يجون المركز خصيصاً عشانها وعشان شغلها في اليوكو وسوت لي غسيل مخ معتبر!

المهم، قالت لي (شوفو النصب والدهاء) انتي لأني ارتحت لك بسوي لك اليوكو بسعر حلو.. انتي اذا رحتي للاستقبال عندنا قولي لهم انك ناويه تسوين جذور وبس لا تقولين لهم انك بتسوين شعرك كله وراح ياخذون منك ألف و500 أو ألفين بالكثير واذا جيتي لعندي بسويه لك كامل! قلت بس مو حرام؟ قالت لااا هذول نصابين وياخذون مبالغ كبيرة وحرام عليهم هم.. قلت طيب وفرحت لأنها بتوفر علي.
بس بنفس الوقت كنت مو مرتاحة للفكرة وحاسه ان فيه شي غلط!
المهم اتفقت معاها اجيها في اليوم الفلاني ورحت للاستقبال شافوا شعري وقلت لهم بس جذور قالوا 2000 عطيتهم المبلغ وسلمت شعري للفلبينية النصابة وكان كثير وش زينه تعبت وانا اطول فيه، فيتامينات وعناية ونظافة يالله وصل لهالطول...
اشتغلت فيه 6 ساعات وانا تعبانه ومرهقة لأني جيتهم بعد الدوام بس كله يهون في سبيل اني اطلع بشعر نفس اللي اتمنى..
وطلعت من عندهم بس بصورة ثانية عكس اللي كنت اتصورها!.. شعري هابط كلش وملزق على وجهي ومن قدام عند القذله نازل مرة لاصق ويبي له نفشه وصاير حجمه قليل مع انه كثير.. يعني مرررة ملزق ومدهن.. وعند جذور الشعر التفافات صغيرة كأنه شعر افريقية.. وانا صحيح شعري جاف ومموج بس جذوره ناعمة وسيدا... استغربت.. قلت لها ايش هذا؟ قالت اذا غسلتيه بتشوفين النتيجة.. ورحت البيت ضايق صدري وقالت لي اختي فعلاً اذا غسلتيه بينفش وبتشوفين النتيجة غير لأنها سوت يوكو من قبل وأول ما سوته كان هابط بس مو للدرجة ذي! انا كان مرة هااابط ويفشل.
وانتظرت 3 ايام زي ما قالوا لي وغسلته باليوم المحدد وكان بنفس اليوم خطوبة اخوي :icon28:
تخيلوا انتو عاد :icon33: غسلت شعري و:44:
خيبة أمل

نفس ما هو هابط واطرافه واقفة والجذور غريبة مدري كيف أوصف لكم كأنها شعر مجعد، الشعر الأفريقي الملفلف، كأنها محروقة والظاهر انها كانت محروقة الجذور!! مدري يمكن خلت المادة أكثر من اللازم على شعري أو حرقتها بالسشوار أو المادة المستعملة كانت منتهية صلاحيتها أو مغشوشة أو مخلوطة بمواد كيماوية خطرة وبعدها لما شفت شعري كذا حسيت ان الحركة اللي قالت لي عنها انها تخليني اقول لهم جذور وبس فـيعطوني مبلغ اقل هي حركة مقصودة منهم كلهم يعني متفقين الاستقبال معاها ومسوين تمثيلية عشان يسحبون الزبونات بالسعر الاقل ومسوين فيها ما يدرون!

والمؤلم انها خطوبة اخوي وانا قاعدة في الزاوية بعيد وما أحتك في الناس وطول الوقت حاطة يدي على راسي من الفشيله والإحراج.. ولما جا وقت العشا ما رحت للبوفيه إلا لما خفت الزحمة!

وقلت انتظر كم يوم زيادة يمكن بعد الغسلة الثانية والثالثة يتعدل بس ما في فايدة كل مرة نفس ما هو! وجاني اكتئاب وصرت استحي اقابل الناس وشعري مأسااااة.. جبهتي صايرة شكبر من قدام لأن شعر من قدام ما في! مصفط ومدهن والجذور محروقة وصاير خفيييييييف!! حسبي الله عليهم.
رحت لهم المركز وكلمت اللي في الاستقبال وقلت لها ابي المديرة وقالت ايش المشكلة وقلت لها اللي صار بس بكل قوة عين تقول المشكلة مو من عندنا منك انتي أكيد.. قلت لها انا شعري كان مموج بس مو مجعد ومحروق.. قلت لها كان ناعم بس فيه شوية جفاف.. قالت ليش ما جيتينا بعد 3 ايام يعني بعد ما غسلتيه.. توك الحين تجين؟ اكيد انتي حرقتيه في البيت وجايه تلقين التهمة علينا..
شفت الكلام معاهم ما منه فايدة فقررت اني أضعف الإيمان ارسل رسالة للمسئولين عن المخالفات التجارية وثانياً أقاطعهم إلى الأبد.

وعموماً هذا المركز رغم فخامته وديكوراته اللي متعوب عليها ما يجونهم الا الناس التشيب واللو كلاس.. وانا شفت بعيني نوعية الزبونات اللي يترددون عليهم.. وانا ما عمري تعاملت معاهم إلا مرة واحدة لأنه قريب من بيتنا وكنت مستعجلة ابي اقص اطراف شعري بمكان قريب مو بعيد.

المهم، تجربتي الثانية والأدهى والأمر مع الكيراتين في جولي دام فرع الدمام بحي الشاطئ.. هذا عاااد أتعب وانا اقول نصب وقلة احترام بنفس الوقت! :(
لي فترة من عالجت شعري من مشكلة مركز (دار اللمسة الحقيرة).. قعدت أعالج شعري وريحته من المواد الكيماوية شهور.. تقريباً 8 شهور وكانت فترة كافية ان شعري يتعافى ويرجع زي قبل ولله الحمد.
بس في شهر يناير اللي راح يعني من 3 شهور تقريباً لفت انتباهي عرض مسوينه جولي دام الدمام عن الكيراتين وانه عرض خاص 800 ريال لمدة محدودة وحاطين اعلان وش كبره عند الباب.. وانا اروح هناك عشان اتمرن وبالصدفة شفت الإعلان..
المهم سألت المصرية اللي في الاستقبال (هذي محترفة في النصب بشهادة كثير ممن تعاملوا مع المركز) وقامت تمدح في الكيراتين اللي عندهم وانه أصلي وانه عندهم الوكالة الأصلية وانهم الوحيدين اللي عندهم وكالة ومدري ايش ومن هالكلام وسألتها غريبة الكيراتين غالي ليش انتو بـ800!؟ قالت لمدة محدودة فقط من باب الدعاية والتسويق.
وقبل لا اسوي الكيراتين قلت لها ابي اشوف العلب وورتني اياها وبحثت في النت ولقيت انها دارجة واوكي ما منها ضرر.. (تصنيع برازيلي وتعبئة لبنانية)..
بس نسيت اشوف تاريخ الانتهاء ونسيت اتأكد من اشياء ثانية..

وسويت شعري عندهم.. ما طولت السالفه، ساعة ونص أو ساعتين وانتهينا.. وما طاح شعري وهي تسويه لي..
رحت البيت شعري روعة وحيوي وكأنه طبيعي وشافته أختي وتحمست تسوي مثلي.. لأنها تبي تجرب الكيراتين اللي كلن يتكلم عنه..

وشجعتها خصوصاً ان السعر حلو وقلت لها فرصة..
وقالت بتنتظر لين تمر فترة على شعري تبي تتأكد انه ما فيه ضرر.. ومرت ايام ولا طاحت شعرة واحدة من شعري وقلت هذا فعلاً علاج لأن الي سوت لي شعري سألتني تبين كيراتين فرد أو علاجي وقلت لها ابي العلاجي.. ومع مرور الأيام ولا شعرة طاحت فتوقعت انه عالج شعري من جد!
بس بعد اسبوع وفجأة قب شعري وكش وصار جااااف أكثر من قبل ومنتف خصوصاً من فوق.. والله أعجز عن الوصف :icon33:
وأختي مسكينة صار لها نفس الشي!! لأنها سوته بعد ما سويته بكم يوم.
وراحت للمركز واشتكت لهم قالت لها المسؤولة المصرية لأنك ما شريتي الشامبو الخاص بالكيراتين.. وانا قالت لي نفس الكلام!
أولاً هم ما لزموا علينا نشتري الشامبو وفكرناه شي خياري ومو ضروري.. ثانياً قالت لاختي كان عالأقل استعملتي شامبو للأطفال ناعم عالشعر وعشان ما يطير المادة بس ما قالت لنا هالكلام من البداية..
ثالثاً انا من قبل لما سويت أول تمليس في البحرين استخدمت شامبو عادي ولا تغير ولا قلب بعدها..
رابعاً واحدة من البنات سوت كيراتين بمركز بالخبر ولا استعملت الشامبو حقه ولا صار لها اللي صار لنا..
وأنا حاسه ان الضرر سببه المادة نفسها، يجوز انها منتهية الصلاحية عشان كذا خلوا سعرها 800 وهذا ما يصير حتى لو دعاية وحبوا يسوقون للمنتج مستحيل يوصل إلى 800 للشعر الكامل!! يعني واضح النصب!!!!
بس احنا ما نفكر ونروح برجولنا بس عشان السعر قليل وكم كلمة يلحسون بها مخ الواحد!
وأتوقع يمكن المنتج مخلوط بمواد كيماوية ضارة لأن بعض المشاعل يضيفون مواد للكيراتين.
المهم بعدها بدا شعري يتساقط ويطيح بغزارة وخصل!! لدرجة ان عيني تدمع لما اشوف الشعر بيدي وعالأرض وكل مكان وعلى مخدتي بشكل مخيف.. وطلعت لي قشرة والتهابات في فروة راسي ونفس الشي مع اختي.. وبدينا برحلة العلاج..
تعالجت عند مركز أبولو للشعر في الخبر والحمدلله خف التساقط وخفت القشرة وبدا التساقط يرجع طبيعي زي قبل هالشهر.. وطول شعري مع العلاج..
وأختي سوت جلسات علاج بمركز ثاني وتحسن شعرها..

نصيحتي لكم يا بنات.. الزبدة:
- لا تسلمون شعوركم تاج جمالكم لأي كان.. يعني مهما كان السعر مغري ومهما كان كلامهم معسول وكله مدح (شي طبيعي بيمدحون في شغلهم وموادهم) مهما كان لا تعطون شعوركم لأي كان وتأكدوا زين من المنتج قبل استعماله.
- انتبهوا من بعض المراكز اللي توريكم المنتج بعبوته الأصلية والشهادة حقت الوكالة بس ما يندرى ايش داخل العلبة يمكن مادة منتهية صلاحيتها أو اضافوا لها مواد أخرى أو تم تعبئتها من جديد بمواد مقلدة ومغشوشة.
- اذا تعرضتي لعملية نصب وتضرر شعرك أو بشرتك لا تترددين انك تحطين موضوع في المنتدى وقروبات الإنترنت عشان تحذرين أخواتك وتفضحين هالمراكز اللي تستنزف جيوبنا وتحتال علينا عشان يكون درس لهم وعظة وعبرة لغيرك.

مع أطيب تحية :)