تحذير هام: لكل حوامل الشهر التاسع

مساء الخير يا بطات يا حلويين

طبعا أنا عارفة أنك هلا بالشهر التاسع بتكوني زهقانة و مش طايقة حالك وبتستني تولدي -بالسلامة يارب- و مستعدة تعملي أي شي عشان تبدا بوادر الولادة معك من تحريض و شرب مشروبات ساخنة وأعشاب وأكلات و وصفات و تمارين و و و..

ولكن..

ما بدك ولادتك تكون مسهلة بإذن الله؟ وتكون تجربتك مريحة و مش مؤلمة أو مزعجة؟
مين أهم؟ الولادة المبكرة أو الصحة والعافية؟ كلنا حنولد بإذن الله ولكن في الوقت المناسب لما اجسامنا تكون مستعدة مش لما احنا نستعجل اجسامنا وندخل حالنا في أوجاع و آلام ما الها داعي..


سبب كتابتي ل هالموضوع هو ذهابي اليوم لزيارة إحدى صديقاتي في المستشفى اهنيها بولادتها..هاي البنت قصتها كالتالي وأرجو أن تأخذوا الموضوع بجدييييية والموضوع مش جديد عليكم ولكن منتشر..صديقتي هاي خلصت التاسع وأخدت 10 ايام من العاشر وما كان عندها بوادر ولادة أبدا وكانوا اللي حواليها يحكولها اشربي خروع اشربي قرفة اشربي كمون وكانت ماسكة حالها لآخر لحظة وما حبت تغامر في نفسها إلا لما حكولها بموعدها إنها لو ما اجاها الطلق رح يحتجزوها يوم الاربعاء -مبارح- وإعطائها طلق صناعي..المهم هي بكرية وخافت طبعا فا استسلمت للنصايح وشربت خروع و قرفة ونامت..وصحيت عالفجر من الوجع و لقت دم أحمر نازل منها وخلص لا مفر يعني المهم جهزت حالها واتوجهت للمستشفى وهناك كان طلقها كل 5 دقايق وفعلا لقوا رحمها فاتح 4 سانتي..ولكن..ضلت من الساعة 7 صباحا ل 3 عصرا وهي على 4 سانتي ولكن الطلق اشتد وصار كل دقيقتين وطفلتها تعبت واكسجينها قل! المهم اعطوها ابرة الضهر وضلهم يراقبوا الطفلة وضلت على هالحال واعطوها بعدين طلق صناعي لغاية ما ولدت 1 الفجر تاني يوم!
طبعا لما حكتلي عن التجربة قالتلي ندمااانة اني شربت خروع و قرفة لأنني تبهدلت من الوجع..

واكيد انتو سمعتوا كتييير عن تجارب بنات مع الخروع والقرفة وبتزكر وحدة كتبت انها نفس الشي طلقها حامي بس الرحم ما فتح والبيبي تعب من كتر الطلق وكانت شاربة قرفة و الدكتورة لامتها..

بس بدي ازكركم انو اي مشروب اعشاب سواء القرفة ولا الكمون أو الزيوت متل الخروع هدول كلهم عبارة عن مسهلات يعني ما الهم مفعول مباشر عالرحم..اللي بصير انو متل اي شخص بيشرب مسهل بجيله مغص لأنه امعائه بتتعصر و بيروح الحمام ع طول وأنتو بكرامة..فالحامل بصير معها نفس الشي ولكن تعصر الأمعاء بيزعج الجدار المجاور له وهو الرحم وبيضغط عليه و بيجبره انه يتقلص كمان فا بتصير الوحدة بوجعين: وجع طلق و وجع مغص!! وبكون الجسم مش جاهز للولادة فا عشان هيك الرحم ما بيفتح إلا بالعافية لأنه مش موعده..ونفس النصيحة لوقت الدورة عشان هيك دايما بقولو ممنوع الأكلات اللزجة وقت الدورة متل الملوخية والبامية لأنها بتسهل و نفس الشي بتخلي الأمعاء تنقبض والرحم الممتلىء ينقبض معاها..

أتمنى أنكم تاخدوا الموضوع بجدية وما تستعجلوا لأنكم رح تولدوا أولا وأخيرا وعادي لو الوحدة اتأخرت بتكون الحسبة من الاساس غلط بس طبعا تضلها تتابع مع الدكتورة..

الله يقومنا جميعا بالسلامة ويفرحنا بأولادنا يارب