السلام عليكم ورحمة الله وبركاته
أخواتي العضوات، الحقيقة بأني ما سجلت في هذا المنتدى إلا عشان غرض واحد فقط وهو تحذيركم من أحد المنتديات!
ممكن معظمكم ما يعرفه لأنه منتدى يجذب الشباب والصغار عموماً!، وحتى لا أكون سبب في لفت الصغار والشباب مثلي له قررت نشر هذا الموضوع في هذا المنتدى لأن معظم مرتاديه أمهات أو كبار على الأقل وأكيد راح تكونون الاحرص على أبناكم وأخوانكم وأهاليكم منه!
وعشان أحطكم بالصورة، هذا المنتدى والذي يسمى ( *****************) مختص برفع أفلام الكارتون " أو الإنمي " والدراما الآسيوية،والأفلام والمسلسلات الاجنبية وطقتهم..
وأنا من متابعي الكارتون عموماً، وفي هذا المنتدى وجدت تشكيلة ضخمة من الكارتون القديــــم والحديث وكل شيء يخطر على بالك.
وجميع حلقات الكارتون أو معظمها كانت مرفوعة من موقع: AnimeDown
( وهذا الموقع جميع حلقاته حصرية ومعظمها للبيع فقط!، ومعروف أيضاً بتحريفة للكلمات الغير لائقة عند الترجمة، وقطع المقاطع المخلة أو الفاضحة!)
ولأن حلقات موقع AnimeDown للبيع فقط فيعتبر هذا المنتدى اللي يرفع حلقاته مجاناً مصدر جذب كبير للشباب والصغار!، لأنه مو بالسهولة شراء حلقات من أي موقع عموماً!
اللي حصل بالتفصيل الدقيق الممل، هو أني عرفت المنتدى من أحد المنتديات المختصة برفع الإنمي، فلما دخلته وجدت تشكيلة كبيرة ومنوعة من الكارتون أو الإنمي، ومع البحث لاحظت بأن فيه إنميات او كارتونات ذو توجه شاذ عن الفطرة السليمة وتقوم فـٍرق خاصة في ذاك المنتدى بترجمتها أول بأول!!
وأعطيكم مثال حتى تكونون بالصورة أكثر : ( مثل الكارتونات الإباحية، الشذوذ، وغيره ..)
طبعاً أنا انصدمت، قلت هذولي مسلمين والا وش وضعهم بالضبط؟! ، وكانت ردود الأعضاء صدمة بالنسبة لي لأن الكل كان متحمس معهم ولا نفر اعترض على اللي كانوا يترجمونه ويرفعونه بالعكس كانوا في نهاية الرد يقولون: جزاك الله خير بانتظار التكملة!
اللي يشوفهم من بعيد يقول هذولي مسلمين رايحين فيها!!، وهذا اللي جاء ببالي في البداية..
عموماً انا ما تدخلت!، قلت كلهم خاربين ماتفرق..
لكن الطامة الكبرى حصلت لما دخلت أحد المواضيع وكان عباره عن حلقات كاملة مترجمة لإنمي قديم وكان من ترجمة وانتاج AnimeDown!
حملت 10 حلقات دفعة مرة وحدة، أول ثلاث حلقات كانت طبيعية مثل ماهي، لكن الحلقة الرابعة هي اللي كانت مختلفة! ، مقطع غير الإنمي اللي أنا تعنيت تحميله
يعني تخيلوا كيف الموقف!! ، لما جيت أفتح الحلقة حتى أتأكد من جودة صفاءها تفاجأت بأنه كان مقطع او فيلم إباحي مدته نصف ساعة، وكان مروع لدرجة جداً مخيفة!
أنا على الأقل فاهمة الطبخة فأبلعها، لكن الصغار والأولاد اللي ممكن يحملون حلقات هذا الكرتون اللي حملته ويتفاجؤون بأن المضمون عكس الظاهر لهم! ، ولا صدمة نفسية حتى خصوصاً للصغار!!
المهم أنا قلت مسكين اللي رفع المقطع " وكان مشرف!" شكله فضح نفسه بنفسه! ، فتحت الحلقات الثلاث الباقية فتفاجأت بأنها كلها أفلام إباحية أيضاً! ، والمصيبة بأنهم ناس حقيقيين يعني!!
قلت حلوة هذي كل شوي يغلط برفع الحلقة؟! السالفة فيها إن دامهم أساساً يترجمون الكارتونات المخلة!!
فقلت هالمرة لازم أتكلم وأنبهم على الأقل! ، لما دخلت أسجل في المنتدى تفاجأت بانهم قايلين : ( لإتمام تسجيلك اكتب في الصندوق " سبحان الله" ) فما أدري أنا شكيت هل هم مسلمين أو وش وضعهم بالضبط ؟؟
الزبدة سجلت بإسم: Shanzy! ، ونشرت موضوعي ثلاث مرات كل واحد في قسم مختلف حتى يشوفونه بسرعة!، موضوعي كان بعنوان: " رأيت العجب العجاب!!، ولا أحد نطق" شيكوا عليه الاول في القسم العام ، والثاني في الإنمي العام ...
الثالث وكان في قسم الإنمي المترجم، ... اللي حصل إني شيكت على موضوعي في اليوم اللي بعده فتفاجأت بأنه حُذف وطردوني من المنتدى بكبره!!
فهل هذا يعقل؟! ، هل هذا فعل انسان سوي أو مسلم ؟!
أنا ما أبي أشكك في ديانتهم، لكن هذا قطعاً مو عمل مسلمين، على الأقل لو كانت تلك المقاطع مرفوعة عن طريق الخطأ فعلاً لسألوني عن أرقامها! ، وأي موضوع ؟! ووش اسم رافع الحلقات !! خصوصاً وأن اللي رفعهم مشرف ولونه أحمر!!
لكنهم بالمقابل حذفوا موضوعي وطردوني، وتبقى لي الآن موضوعين شكلهم مادروا عنهم في الأقسام اللي ذكرتها، حتى يكون عندي دليل ملموس!
المقاطع اللي حملتها جداً جداً مروِّعة!، وأنا على الأقل فاهمة لكن جتني أم ركب!، فما بالكم بالصغار والأولاد وغيري من الشباب!، فهل راح تمر عليهم المقاطع السلام عليكم وانتهينا أو راح تترك فيهم أثر الله أعلم مدى عمقه!
هذا كلــــه غير مسألة الحلال والحرام، وكيف ممكن يأثر هالشيء على عقلية الشخص نفسه ممكن توصله لأمور أعظم وأعظم واترك لكم التخيل!!
أنا رأيي الشخصي، إن هذا المنتدى غير طبيعي، وله نوايا معينة، دائماً نسمع بالغزو الفكري والأخلاقي وهذا اللي أنا حسيت فيه وأنا أتصفح ذاك المنتدى!
هم فاضحين نفسهم بنفسهم، بإمكانكم تدخلون الموقع والمنتدى وتشيكون على الكارتونات اللي يرفعونها!
انا حدي والله كارتون، والله اعلم عن المسلسلات الأجنبية اللي يرفعونها ووش نوعيتها! ، إذا الكارتون وهو الكارتون طلع كذا، فما بالك بالمسلسلات الحقيقية ؟!!
اللي يقهر ويعصب ، إن حتى اللي يتجنب الكارتونات المخلة ويحمل الكارتونات النظيفة موب شرط يطلع منها!!
مثل ماحصل معي، يكفي إن الكارتون اللي كنت أبي أحمله من ترجمة وإنتاج AnimeDown اللي معروف بتقطيعه للمقاطع المخلة وتحريفه للكلمات الغير لائقة مثل ما ذكرت!
أنا كنت بأنشر عنهم في جميع المنتديات حتى يكون الجميع بالصورة!، لكن هذي الطريقة ممكن ماتنفع لأني ممكن أكون نبهتهم عليه وبدل ما يتجنبونه يروحون يقصدونه وبهالطريقة حقق هذا المنتدى زي مابدك مبتغاه!
اللي يخليني أشك فيه أكثر!!، أن المنتدى ممكن ماله ست شهور، اشتهر بشكل مفاجئ مع أن ماله إعلانات، أنا أحس إن وراهم شيء أكبر من مجرد مجموعة يبون يغزونا فكرياً وأخلاقياً والله سبحانه وتعالى أعلم!!
عشان كذا يا اخوات، رجـــــــاءً انتبهوا ، واحرصوا على ابنائكم واخوانكم وكل من تعرفونه لا يدخلون هذا المنتدى بكبره، ولا يحملون منه شيء!! لأن الظاهر مو شرط يكون مثل المضمون!!
مافيه أحد بيقول : والله أنا ماراح أحمل أشياء مخلة!، بأدور لي شيء نظيف!
لأن حتى النظيف مو مضمون، مثل موقفي اللي حصل معي!!
يعني الأخ صاحب الموضوع رفعهم 4 مرات بالغلط مثلاً ؟؟؟، يبيلها تيقظ وتركيز وحذر!!
هذا اللي سجلت عشانه وياليت تنتبهون،..
وآسفين على الإطالة
أختكم/ بنت نجد
Bent Najd! @bent_najd_3
عضوة جديدة
تحذيــــــــــــــــــــــــــ ـــــــــــــــــر انتبهوا لأبنائكم من منتدى.....
90
7K
يلزم عليك تسجيل الدخول أولًا لكتابة تعليق.
حسبي الله ونعم الوكيل وجزااااك الله خير على التنبيةحسبي الله ونعم الوكيل وجزااااك الله خير على التنبية
السلام عليكم ورحمة الله وبركاته
جزاك الله عنا خير الجزاء ونفع الله بك
لابد من نشر هذا الموضوع على أوسع نطاق
فأرجوا منك أختي السماح للكل بنقله لتعم الفائدة
جزاك الله عنا خير الجزاء ونفع الله بك
لابد من نشر هذا الموضوع على أوسع نطاق
فأرجوا منك أختي السماح للكل بنقله لتعم الفائدة
الصفحة الأخيرة
أنا أصلا ماأحب كراتيين أنمي مهي دااخله رااااسي
وأعرف هااذا المنتدى اللي يحملها
مانقدر نقوول غير حسبي الله ونعم الوكييل ويين الرقااابه في السعووديه
جزاك الله خييير على التنبيييه!!