- التخصصات :
- أهم المواد إلي هتفيدك في الدراسة :
في تخصصات كتير علشان كده هقلك كل تخصص مهمته ايه علشان تبدأ تشتغل عليه من بدري لأن كل تخصص طريقه غير التاني
1-تخصص الإرشاد النفسي:
مهمتك هنا انك بتعالج المرض النفسي لكن بتكون بسيطة في الشدة والمدة وبالتالي انت بتقابل حالات وبيكون دورك انك تحل له المشاكل البسيطة زي مثلا(فترة الإنتقال من الدراسة للجامعة او من الجامعة للعمل بيكون الشخص تايه وبيكون محتاج لنصيحة) , مشكله مع الاهل ,سقوط في مادة ,مشكلة دينية وبيكون دورك انك تلفت نظره للحل الي مش شايفه (التوجيه والنصيحة) او ممكن يكون عارف الحل ومش قادر يعمله وبالتالي يكون دورك (الدعم) واعطاء الثقة بالنفس
2-العلاج النفسي:
يشبه تخصص الإرشاد لكن الفرق ان الأمراض النفسية بتكون اشد واطول علشان كده بتحتاج فترة اطول في عدد الجلسات ودورك انك بتعالجة عن طريق الكلام (لكن دا بيحتاج لتدريب والجامعة مش هتعلمك عنه اي حاجة) وبالتالي بتكون محتاج تاخد دبلومات ودورات وانك تنزل تدريب عيادات زي
*دورة العلاج النفسي في مستشفى سيد جلال لد/ محمود حمودة حوالي يومين في الإسبوع ومجاناً هى للخيريجين لكن إنت ممكن تبدأ تاخدها من بدري في ناس أصدقائي عملوا كده وكانوا بيدخلوا بس بدون ما يروحوا يسجلوا أسمائهم - (ملحوظة لو إنت في المستقبل ناوي تفتح عيادة يبأة لازم تاخد رخصة مزاولة المهنة وفي الحالة دي بيكون في إمتحانات ودرجات وغياب وحضور علشان تاخد شهادة في الآخر وبتحضر لمدة سنتين لكن غير كده بتحضر عادي ومحدش بيحاسبك.
*كورسات عن العلاج النفسي في مستشفى ابو العزايم.
*دبلومة علم النفس الاكلينكي (لمدة سنة قي جامعة القاهرة وسنتين في جامعة عين شمس ببتاخد بعد التخرج).
*كل الخطوات دي المفروض بتتاخد بعد التخرج لاكن انا بكتبهالك هنا علشان تبدا تعرفها من سنة اولى وتحضرها حتى لو مش مسموح لك الدخول (في دورات مجانية اصدقائي كانوا بيحضروها من سنة تانية وكانوا بيعرفوا يدخلوا عادي مع انها للخريجين .
* ابحث عن دورات اكتر في العلاج النفسي في الحسين وسيد جلال بتكون مجانا.
3-التشخيص :
يعني إيه تشخيص (دراسة الحالة) ؟ يعني إنك تقدر تحدد الحالة إلي جايلك عندها مرض إيه بالظبط وإيه المشكلة إلي بتعاني منها ( ودا بتحدده في عدد من الجلسات على حسب المرض وبناء على التشخيص بتبدأ تحدد العلاج والخطوات المناسبة للحالة ),
وأنا حبيت أحط التشخيص في خانه لوحده لأنه له كورسات لوحده وغالباً لما بتيجي تدرب بعد التخرج في عيادة لازم تمر بمرحلة التشخيص دي ( علشان تعرف تقابل حالات يعني لازم تكون متمكن منها حتى لو هدفك هوالجزء الي اتكلمنا عنه فوق إلي هو العلاج النفسي).
*ملحوظة مهمة : التشخيص مش بيكون خطوة مهمة أوي في تخصص الإرشاد النفسي لأن المشاكل ودرجة المرض النفسي بتكون بسيطة.
التشخيص بينقسم لجزئين :
*أسئلة محددة بتسألها للمريض علشان تححد المرض (الأسئلة دي بتعرفها في سنة 4).
* بتطبق إختبارات نفسية علشان تقدر تشخص المريض (والإختبارات دي بتكون مهمة جدا ومهم إنك متوفتش ولا سكشن ليها لأنك مش هتعرف تفهمها لوحدك وبتاخدها من سنة 3 ) ولأنك بتحتاجها جداً بعد التخرج :
*إختبار ال MMPI.
*إختبار ال HTP (بتقيس بيها حالة الفرد النفسية من خلال الرسم و ال Tat ( بتقيس بيها حالة الفرد النفسية من خلال إنك بتعرض عليه بطاقات فيها صور وبتطلب منه يحكي قصة من خياله على الصورة دي ومن خلال القصص بتبدأ تحلل حالته)
*إختبار وكسلر وبينيه ( مهمتهم هو قياس درجة الذكاء ).
وبالتالي لو إنت مقرر من بدري إن تخصصك هيكون في التشخيص فلو بدأت تاخد كورسات فيهم جنب الدراسة أو إنك تبدأ تحضر سكاشن مع سنة 3 علشان تبدأ تطبقهم على حالات أثناء الدراسة و هيكون سهل عليك جدا بعد التخرج تشتغل بيهم.
4- تخصص الأطفال :
*تخصص العلاج النفسي للأطفال : نفس مهمتك في الكبار لكن بتختلف في وسائل العلاج والتشخيص وبالتالي على حسب تحديد التخصص إلي إنت هتشتغل فيه بعد الخرج.
*في أمراض معينة بتحتاج إنك تتخصص فيها لوحدها زي مثلاً مرض التوحد و الإعاقة العقلية يعني كل مرض من دول بيبأة له مقاييس وبرامج علاجية خاصه بيه.
وبالتالي أهم الأماكن الي بتشتغل فيها بعد أما تتخرج هى
*العيادة : بتكون محتاج تدريب سنتين في المستشفى علشان تعرف تشتغل في مجالك بعد كدة.
*المدرسة : وبتكون مهمتك إنك بتطبق الإختبارات على الطفل علشان تشخص المشكلة إلي عنده.
*البحث العلمي في المجال النفسي : وأعتقد دا نفس مهمة الماجستير إنك بتبحث عن معلومات عن موضوع محدد وبالتالي ممكن تخرج المعلومات دي في شكل كتب.
*الفرق بينك وبين الطبيب النفسي : الطبيب بيكون متخرج من كلية الطب وبيعالج نوع ودرجة معينة من الأمراض النفسية عن طريق الأدوية أما دورك إنت بيكون متمثل في العلاج بالكلام.
*علم النفس الفسيولوجي (سنة أولى) : بيشرح إزاي المشاكل النفسية بتأثر على الجسم و ببتحول لمرض عضوي
* الإحصاء النفسي (سنة 1و2 ) و علم النفس التجريبي (سنة 3): بيشرحواإزاي أثبت أقيس علم النفس قياساً كمياً يعني مثلا أنا بقول إن في علاقة بين الذكاء والنجاح طيب بنسبة قد إيه بيأثر الذكاء على النجاح وبالتالي بجيب مجموعتين من التلاميذ الأولى فاشلة والثانية ناجحة و بيمروا بنفس الظروف الإقتصادية والإجتماعية والأسرية (ودا علشان أعرف أقيس مدى تأثير الذكاء فقط على النجاح) و بالتالي ببدأ أجيب نفس إختبارات الذكاء للمجموعتين وهكذا..
*الفلسفة (سنة 1): بتعلمك إزاي تثبت أي صدق أي معلومة بالدليل والبرهان.
*مقاييس شخصية (سنة 2): بتتعلم فيها تطبيق الإختبارات النفسية إلي إتكلمنا عنها فوق.
* مناهج البحث (سنة 2) : بتتعلم منها إزاي تعمل بحث علمي يعني إزاي لو في مشكلة غامضة تقدر تطلع ليها الحل.
*قدرات عقلية : والجزء المهم فيها هو السكاشن العملية لأنك بتتعلم فيها إزاي تطبق إختبارات الذكاء بينيه ووكسلر.
*التحليل النفسي و علم النفس المرضي (سنة 3 و4) : دا نوع من أنواع العلاجات ومن أكثر المواد الممتعة والغريبة وبتعلمك إزاي إن ورا كل مرض ظاهرة في سبب غامض وبمجرد وضوح السبب دا المرض بيتعالج.
*الأمراض النفسية للأطفال (سنة 4) : ( المادة دي مهمة جدا علشان تشخيص أمراض الأطفال وبرده هتفيدك جدا في طريقة تشخيص أمراض الكبار).
*الطب النفسي (سنة 4) : أهم الأمراض النفسية والفروق بينها زكيفية التشخيص.
*إعاقات عقلية وصعوبات تعلم : ودي مهمة لو ناوي تتدخل التخصص دا لأن دا له مقاييس وعلاجات خاصة بيه.
أخيراً الملخص :
*حدد التخصص الي عايزه من سنة أولى وإبدأ ركز في الدورات بتاعته هيريحك كتير بعد التخرج.
*لو عندك وقت ممكن تحضر مع سنة 3 أو 4 المواد والساكشن إلي عايز تعرف عنها أو حابب تتخصص فيها
*المواد إلي ذكرتها فوق عملية وبالتالي مش هتعرف تفهما غير لو حضرت المحاضرات وخاصة المقاييس النفسية والإحصاء وعلم النفس التجريبي.