تخلصي من الوسواس في اقل من اسبوع

السلام عليكم ...


كيف الحال عساكم بخيرين .....


انا عضوة جديدة هنا في المنتدى اسمي هيا و عمري 22 ... من بعد ما ادمنت منتدى حواء و ادخله كثيير عشان القى حل او اشوف تجارب الناس في شي قلت لازم اسجل و اشارك و اساعد الناس بتجربتي ...فعشان كذا حبيت تكون اول مشاركتي عن مرض الكثير يعانو منه ( الوسواس ) و نفسي نصير اصحاب و نشارك بعض كثيير قصص .


((الوسواس ))
الوسواس الي عندي بدأ في الوضوء (( اعيد الوضوء كثير )) بعدها الصلاة ( اعيدها كثيير ))و بعدها العبادات و اشياء كثيرة لدرجة وصلت اني اتخيل اني ارتكب معصية و انا ما سويت شي ...و للأسف تمنيت احد لو كلمني خبرني شو اُسوي و كيف أتخلص بيها من تجربته بس ما لقيت و فكرت انه الي امر فيه طبيعي ..استمريت سنة او سنتين على ذي الحالة و كنت أرقي عمري و اروح للشيخ و كذا بدون ما اني اجتهد من نفسي و احارب الوسواس ...
لو عرفت من قبل كنت تخلصت منه من زمان بس الحمد لله اهم شيء تخلصت منها و اصد اي وسوسة تجيني .

اول خطوات التخلص منه هو التطنيش مهما حسيتي بخوف و الشيطان يوسوسلك انك غلطتي او الله بيغضب عليك او انك بتدخلي النار الخ الخ ...طنننننششيييييي مهما حسيتي انك بتبكي بسبب الخوف و الوسواس طنشي صديييه صدقيني اذا بدأت الحالة من الصباح و طنشتي اضمنلك لحد العصر او المغرب انت بتحسي براحة و بحرية غريبة و بسعاده لحد ما تنامي لكن لازم تنتبهي ولا ترجعيً تتوسويي و بتنامي مرتاحة ان شاء الله <<<هذا في اليوم الاول
اليوم الثاني بترجع الوساويس فلازم تكوني جاهزه و تصديه و تشغلي نفسك ..تعرفي لما الطفل يزعج امه و كيف انها تكمل شغلها ولا تسمعه لحد ما يسكت كذا انتي سوي لا تشغلي نفسك فيه او تعطيه انتباه ....و كلها كم ساعة و تحسيً بذيك الراحة و الحرية ...هنا لازم تكوني مستعده من البداية لانه الشيطان اذا شافك طنشتي شي بيروح لشي ثاني ما تتوقعيه فكوني جاهزه لأي شي بدون خوف او ارتباك ..و نفس الشي في اليوم الثالث و بعدها بتبدأ الوساويس تخف ان شاء الله و داومي على الاستغفار طول الوقت
صدقيني لما تنتهي من هذا المرض راح تشوفي كل الايام الي فاتت ما تسوى شي راح تندمي انك عطيتي هذي الوساويس هذا الحجم الكبير من الاهتمام و الخوف و هي ما تستاهل ...و مو بس تصدي الوسواس في الامور الدينية بعد في كل امور حياتك يمكن تقابلي الوسواس فكوني جاهزه ...
الوسواس الي عندي جاني في اخر سنة ثانوية و طبعا هذا وقت حرج ما ادري كيف عديته ...بعد كم سنة اختي صارت في اخر سنة بعد و جاها فجاة الوسواس و كانت تنهار مثل ما صارلي انا لكن مسكتها و خليتها تحاربه من البداية لاني اعرف كيف يعذب هذا الشعور عذاب...خليتها تصده و تكون قوية و تدعي... و الوقت الي جاتها الوساويس كان في الاختبارات النصف نهائي يعني في وقت غلط و هي اخر سنة ...في اجازه المذاكره بدأت المعاناه بس ما تركتها مثل ما خبرتك و خلال اقل من اسبوع شفت منه الحمد لله و بدأت امتحاناتها بشكل ممتاز.

اسفة تكلمت كثيير بس والله اريد اساعد عدد كبير من الي يعانو من الوسواس لانه الي مريت فيه حطني في موقف لا احسد عليه و خلاني اعيش ايام سودا كرهتها كثييير ولا تمنيتها لعدوي او لأي احد أكره ...و مستحيل اسمع انه احد يعاني منه الا و اصر عليه يكون قوي و يحارب الوسواس ..لانه اول طريقة تتخلي منه هو من قلبك اولا و تكوني انتي الي تحاربي بنفسك و صدقيني ما تطلعي من هذا الحرب الا و انتي الرابحة ...فكوني قوية بقدر المستطاع و راح تنتصري عليه .
وانا موجوددة ان شاء الله للي تريد مساعدة او تريدني اساعدها اكثر بس ادخلي الخاص و خلينا نتكلم و شوي شوي بتتحسني و ترجعي احلى من الاول ..لكن لازم تعرفي انك لازم تواجهي الوساويس بنفسك و تكوني قوية بجد و كلنا اقوياء و نقدر نصده ولا ننسى الدعاء .


ما اريد شيء غير انكم تدعولي بدعوة طيبة