السلام عليكم خواتي اخباركم ان شاء الله بخير طبعا هذي اول مشاركه لي في هالقسم وحابه اقول هالقصه الي صارتلي للحريم الي مثلي على نياتهم ويصيروا حذرات وموا اي شي يصدقوه عاد بدخل في القصه قبل سنه كنت ساكنه في بيت قبل هذا البيت ..كان عندنا جيران ×××الله يسترر عليهم .....كانت عائله كبيره .في يوم من الايام دق الباب الظهركنت اسوي الغذاء افتح الباب الا جارتنا طبعا اول مره تدق بابي افتح الباب ورحب فيها وقلتلها ادخلي شفت معها شنطه مدرسيه وثنتين من بناتها صغار انا يوم شفت شنطت المدرسه على بالي بتقولي ابيك تذاكرين لبناتي :hahaha: قلتلها خير ان شاء الله في شي حسيت انها بتقول شي ومستحيه قالتلي ابي اخلي الشنطه هذي امانه عندك قلتلها وش فيها قالت فيها فلوس وذهب وأوراق لخالتي وخالتي مسافره وأمنت الشنطه عندنا قلتلها طيب ليه تبين تخلينها عندي قال زي منتي عارفه البيت مليان شباب (قصدها اخوانها) وبصراحه نخاف يسرقون الفلوس اوذهب وقلت بنخليها عندك واذا جت خالتي بناخذها ..قلت انا اوكي خليها وبأذن الله مايجيها شي وفي الحفض والصون وخلت الشنطه وراحت طلع زوجي من غرفت النوم ويقول وش تبغا قلتله على السالفه شفت وجه تغير قلتله وش فيك قال عطيني الشنطه قلت والله ماتلمسها هذي امانه ..حنا بيتنا دور ارضي وشباك غرفت النوم على الشارع واي احد يوقف عند شباك غرفت النوم ويتكلم والمكيف طافي نسمعه قال زوجي سمع العجوز تكلم جوال وتقول قولوله يهرب ولا عاد يرجع للبيت لاأن الشرطه والمخدرات راح تجي وتفتش البيت وقول ماعليك الاغراض مراح يلقونها بنصرفها ..المهم زوجي قال الكلام هذا وعطيته الشنطه وفتحناها لقينا شنطه دوبلوماسيه عرفتوها هذي الي تنفك باأرقام .ملفوفه بمنشفه بيضاء طلعنه الشنطه الدوبلماسيه والمنشفه ولقينا بكت دخان فيه حشيش شكلهم من العجله نسوا لا يدخلونه داخل الشنطه وهزينا الشنطه مافي صوت ذهب قال زوجي تسمعين صوت ذهب قلتله لا بس نسمع صوت شي كأنه حجر مستطيل لمن نهزها وشمينا الشنطه قال زوجي ريحتها حشيش قلت لزوجي يالله نبلغ عليهم قال تبين تنكبينا قلت والله لورطها زي ماكانت تبي تورطنا قال زوجي لا انا اعرف كيف شال الشنطه وراح دق الباب عليهم وقال لهم خذوا شنطتكم حنا مسافرين الوالد تعبان بنروح يومين وبنرجع وخايفين على شنطتكم لا يسير لها شي وهي عندنا ..وجا زوجي ويهاوشني ليه تاخذين الشنطه قلتله امنتها عندي قال مصدقه نفسك لو فيها فلوس وذهب مراح تحطها عندك وش يضمنها انك بترجعينها مراح تجحديها ..وجلسنا نطالع من العدسه حق الباب نفس الحرمه الي جابت الشنطه طلعت السطح ومعاها الشنطه تبي تحطها في السطح وشوي ونزلت وجاء راعي سياره وركبت ومعها الشنطه المدرسيه الي جابتها عندي ..زوجي راح الدوام وانا بلغت عليهم وعطيتهم العنوان ورقم الشقه وحكيتلهم القصه كامله بعد ربع ساعه اطالع من الشباك الا وفي سياره من بعيد وتراقب البيت صارت تجي كل يوم وبعدين معد شفناهم وبعدها بفتره طلعنا من البيت وهم بعد غيروا بيتهم لانهم صاروا مشهورين في البيع ........وسلامتكم تعبت وانا اكتب ابي رايكم في قصتي
ز
اللمسات الذهبيه @allmsat_althhbyh
عضوة جديدة
يلزم عليك تسجيل الدخول أولًا لكتابة تعليق.
لاحول ولاقوة الابالله احنا الطيبه الزايده والثقه العمياء بتودينا في ستين داهيه ... الحمدلله اللي ربي نجاكم من شرها وحفظكم من كيدها ....
نمشي على النيه في زمن اقشر نعوذ بالله من شره...
نمشي على النيه في زمن اقشر نعوذ بالله من شره...
ياوييييييييييييييييييييلك الحين يعرفونك ويجون عليك في الليل ويزطونك الين تبيض عيوووونك ويقولو انتي اللي بلغتي عنا
خخخخخخخخخخخ امزح بس بغيت اسوي لك اكشن
خخخخخخخخخخخ امزح بس بغيت اسوي لك اكشن
الصفحة الأخيرة
والله اني استفدت اشياء من هالمنتدى
ماكانت تخطر ببالي عواقبها
لاني دايم على نياتي