تدخلات الناس التي لا تنتهي في حياتي

السلام عليكم
بنات انا شنو شعوركم لما تتعرضون للنقد الهدام واضع خطين تحت كلمة الهدام وانج تتعرضين لهالنقد من ناس عزيزين عليج وما تقدرين تردين عليهم وهم ما يقصرون في اي مناسبه يشوفونج لازم يحنون عليج بهالانتقادات القاسيه
علشان اوضح لكم الصوره اكثر بقول لكم بالضبط شي من الاشياء الي صايرة

انا عندي بناتي ماشاءالله فيهم عافيه شويه دبدوبات وهالشي باين حيل---انا عن نفسي ما اشوفهم متان حيل بس يعتبرون دبدوبات
هالشي تعب نفسيتي! تخيلوا على كثر ما تمنيت ان عيالي يطلعون متعافين على كثر ما انغثيت من هالشغله!
عسى ماحد شافهم الا واعطاني نصيحه بناتج متان بناتج مو طالعين علينا بناتج راح يلومونج لما يكبرون بناتج انتي السبب في سمنتهم بناتج وبناتج وبناتج
لما قلبي ورم من هالكلام! طبعا الكلام هذا يوصلني من خواني ومن اخوان زوجي مع ان هم عيالهم متان بعد!!والادهى والامر ان هم الي كل ما شافوا عيالي دسوا بئيدهم الكاكاو والحلويات ولما ارفض واقول لا تعطونهم يقولون حرام هذولي اطفال عطيهم لا تحرمينهم! والحين جايين يتهموني باني السبب في هالمشكله!
انا طبعي ما ارد ولا اتكلم بس بصراحه طفح الكيل !حاطين عيونهم على بناتي والله اخاف ييصير فيهم شي على يوم بسبب عيون هالناس!
ما قمت اتحمل كلمه من احد! قررت اقعد ببيتي وما اروح لحد! بس في اعتقادي هذا مو الحل
ما اعرف اشلون ارد رد يوقف هالناس عند حدهم بدون ما اخسرهم!
اشلون افهمهم ان هالكلام يضايقني حيل! وان مو من حقهم انتقاد بناتي !
طبعا هذا مثال عن الاشياء الي الناس يسمحون لنفسهم بالتدخل فيها في حياتي وغيره في امثله وايد وايد
انا الي بعرفه ليش الناس تتجرا علي؟ هل لاني ما ارد عليهم احتراما لهم؟ ولا ويهي يقول يا ناس انا ابي نصيحه؟
الصراحه مليت وتعبت وقمت ما احب اشوف احد ولا ازور الناس لاني مو مستعده اسمع اي تعليقات
كلف شي يتدخلون فيه ويتفلسفون بارائهم الي ما تنبلع؟
علموني شسوي انا من صج تعبانه