تدخلها في حياتنا

السلام عليكم
كيف حالكم بنات
الصراحة بخاطري اتكلم شوي احس نفسي لازم اتكلم
زوجي متعود كل مايطلع الصباح يقفل الباب من برا ويتأكد منه

لعدة اسباب واهمها عندنا طفل عمره سنتين ولما صار يمشي كثير يغافلنا ويطلع عند الباب

بنت خالتي سكنت مقابل بيتي قبل أشهر قليلة
يوم صباح جميل خالتي جات تاخذ بنتها وتروح معها
طلع زوجي من قدامها ومثل العادة قفل الباب ومشى
موقف عابر ومالك حق تتدخلي

وراحت خالتي تتفسح بس مانست الموقف
رجعت وتكلمت مع امي انها شافت زوجي يقفل الباب
وكانت التهمة هي زوجي يعنفني ويقفل الباب علي وعلى عيالي وانتشر هذا الخبر عند الجميع وامي صدقته انه زوجي يضربني

ايش دليلك ياخالة
شفت زوجك يقفل الباب عليكي
وانا ما اقول الا لاحول ولا قوة إلا بالله بس من الكلام الزايد والاشاعات

بموقف ثاني
اختي
زوجها متزوج قبلها عنده ولد وما استمر زواجهم
الولد اعرف انه ساكن مع امه وبعيد ومايعرف اختي ولا اخوانه وعلاقته مع الاب فقط
ماعندي حق اتدخل ولا بعمري سألت اختي عنه او عن طليقة زوجها

لظرف ما انتقل الولد وسكن مع ابوه بشكل دائم

ماحد درا بالخبر الا بعد اسابيع وعن طريق الصدفة

لي سويته اني نصحت اختي بحكم انها بموقف زوجة الاب الان

وهذي سوالف كثيرة بالمجتمع مثل ماتعرفون ولها حساسيتها وشايفة كثير نماذج ولانروح بعيد اختي الثانية عندها ولد من طليقها ونشوف معاناته واكيد كلكم تشوفون نماذج سواء سوالف المنتديات او الحياة الواقعية
خالتي مدري ايش لي ازعجها بوجود هذا الولد
من فترة وهي نازلة تخبيب في راس اختي عشان تبعد الولد من البيت اقل شي على بيت اهل ابوه بحجة انه وجوده بيسبب حساسية

واختي رفضت تاخذ بالموضوع لانها اساسا تخاف من زوجها
دخلت امي فيه وكلمت الاب بتحريض من خالتي !
الولد قاعد على قلبكم ولا ياخذ مصروفه منكم
هذا ولد وهذا ابوه وله حق مثل اختي وعيالها

الرد كان دبلوماسي جدا من الاب
لاتسوي ازعاج على الموضوع ولا بيصير كلام ثاني

كلمت امي انك تبغى بنتك الثانية تصير مطلقة مالنا دخل بينها وبين زوجها وابنه وحياتهم وهي تسمع اختها ومندخل مسلسل الله اعلم حلقته الأخيرة
بالحالتين خسارة
ممكن اختي تتطلق او ممكن الاب يسمع ويطرد ابنه وكسبنا ذنب بالدنيا الفانية

ممكن تكون خالتي تحبنا صح لكن تدخلاتها مرة اوفر وكثير يمكن بحكم انه ماعندها عيال الا ولد وبنت تعتبرنا بناتها وعيالها ومن واجبها تخاف علينا
ايش نتكلم معها او ايش نسوي ولها مواقف كثيرة وبسببها كبر خلاف اخوي وحرمته وطلقها
انا انتشرت سمعة اني اتصفق كل يوم من زوجي والشاطرة تسألني وخايفة يوصل الكلام عند اهل زوجي والله المستعان ساعتها

انا والله وكيلي يابنات ما اتكلم هنا عشان لا سمح الله اسوء على خالتي وامي او عشاني فاضية واسولف بس
مجرد فضفضة فقط لأني منزعجة جدا من هذي الاحداث وقاعدة اشوف انه اختي بتلحق الثانية عشان سبب تافه ولا عشان السمعة لي لاحقتني بسببها
طولت كثير تحملوني شوي